މެޑްރިޑް (ޖެނުއަރީ 3) - އެތުލެޓިކޯ މެޑްރިޑަށް ކުޅެމުން އަންނަ ޕޯޗުގީސް ޕްލޭމޭކަރު، ޔާއޯ ފެލިކްސް އަށް އާސެނަލާއި މެންޗެސްޓާ ޔުނައިޓެޑުން ފާރަލަމުން އަންނައިރު، އެތުލެޓިކޯގެ ވިސްނުމަކީ ލޯން އުސޫލުން އޭނާ ދޫކޮށްލުން ކަމަށް ރިޕޯޓްތައް ބުނެފި އެވެ.
ޕޯޗުގަލްގެ ބެންފީކާ ދޫކޮށް، 2019 ވަނަ އަހަރު، ޔާއޯ ފެލިކްސް، 23، 142 މިލިއަން ޑޮލަރުގެ ޓްރާންސްފާ ފީ އަކަށް އެތުލެޓިކޯ އަށް ބަދަލުވުމަށް ފަހު، މިހާތަނަށް އެ ޓީމުގައި އޭނާގެ އަސްލު ލެވަލަށް ނުކުޅެވޭ ކަމަށް ޕޯޗުގަލްގެ ފުޓްބޯޅަ ތަޖުރިބާކާރުން އަންނަނީ ބުނަމުންނެވެ. ޔާއޯ ފެލިކްސް ވިދަމުން އައިއިރު، އޭނާ އަކީ ޕޯޗުގަލްގެ މުސްތަގުބަލުގެ ގޮތުގައި ގިނަ ބަޔަކު ދެކުނެވެ. އެކަމަކު، އަސްލު ލެވަލާ އެއްވަރަށް ފަހަކަށް އައިސް ކްލަބް މެޗުތަކުގައި ކުޅުން ނުދެއްކެ އެވެ.
ސްޕެއިންގެ ފުޓްބޯޅަ ދިރާސާކުރާ ފަރާތްތަކުން ދެކޭ ގޮތުގައި ޔާއޯ ފެލިކްސް އަކީ އެތުލެޓިކޯގެ ކޯޗު ޑިއޭގޯ ސިމިއޯނީ ކުޅުވާ ސްޓައިލާ ގުޅޭ ކުޅުންތެރިއެއް ނޫނެވެ.
މި ފަހަރުގެ ވޯލްޑް ކަޕްގައި ޔާއޯ ފެލިކްސްގެ ފަރާތުން ފެނުނު މޮޅު ކުޅުުމުގެ ސަބަބުން އޭނާގެ ސޮއި ހޯދަން ގިނަ ކްލަބްތަކުން ވަނީ ޝައުގުވެރިކަން ފާޅުކޮށްފަ އެވެ. އެ ގޮތުން އިނގިރޭސި ގަދަ ދެ ބާރު ކަމަށްވާ މެންޗެސްޓާ ޔުނައިޓެޑާއި އާސެނަލުން އަންނަނީ ޔާއޯ ފެލިކްސް އަށް ފާރަލަމުންނެވެ.
ސްޕެއިނުގެ މީޑިއާ ރިޕޯޓްތައް ބުނާގޮތުން ޔާއޯ ފެލިކްސް ވިއްކާލަން އެތުލެޓިކޯ އިން ބޭނުމެއްނުވެ އެވެ. މި ވަގުތަށް ބަލާއިރު، އެތުލެޓިކޯގެ ވިސްނުމަކީ ރަނގަޅު ލޯން ޑީލެއް ލިބިއްޖެނަމަ ޔާއޯ ފެލިކްސް ދޫކޮށްލުމެވެ. އެ ގޮތުން އެތުލެޓިކޯ އިން ސީޒަނުގެ ބާކީ ބަޔަށް ފެލިކްސް ދޫކުރަން ކިޔާ އަގު އުޅެނީ ވެސް 10-15 މިލިއަން ޑޮލަރާ ދެމެދުގަ އެވެ.
އިނގިރޭސި ކްލަބް، ޗެލްސީން ޔާއޯ ފެލިކްސް ގަންނަން 100 މިލިއަން ޑޮލަރު ހުށަހަޅަން ތައްޔާރަށް އޮތް ކަމަށް ކުރިން ރިޕޯޓްކުރި އެވެ. އެހެން ނަމަވެސް ޗެލްސީން މިހާރު އެ އަގުގައި ގެންނަން ބަލަނީ، ބެންފީކާގެ އާޖެންޓީނާ މިޑްފީލްޑަރު އެންޒޯ ފެނާންޑޭސް އެވެ.
އާސެނަލުން ޔޫކްރެއިންގެ ޝަހުތަރު ޑޮނެސްކަށް ކުޅޭ މިކައިލޯ މުޑްރިކް ގަންނަން ކުރާ މަސައްކަތަށް އޮތް ހުރަހަކީ ޝަހުތަރުން އޭނާ ވިއްކާލަން ކިޔާ އަގުބޮޑުވުމެވެ. އެހެންވެ، އާސެނަލުން ސީޒަނުގެ ބާކީ ބަޔަށް ކުޑަ އަގެއްގައި ފެލިކްސް ގެނައުމަށް ފަހު، އަންނަ ސީޒަނަށް މުޑްރިކް ގެނައުމަކީ ވެސް އެ ޓީމުގެ އޮތް ވިސްނުމެއް ކަމަށް އިނގިރޭސި މީޑިއާ ރިޕޯޓްތައް ބުނެ އެވެ.
ޔާއޯ ފެލިކްސް ވަނީ މި ސީޒަނުގައި އެތުލެޓިކޯގެ 20 މެޗުގައި ކުޅެފަ އެވެ. އެ މެޗުތަކުގައި ފަސް ގޯލު ޖެހިއިރު، ތިން ލަނޑު ޖަހަން ފުރުސަތު ތަނަވަސްކޮށްދިނެވެ.
