ސްރީލަންކާގެ ކުރީގެ ރައީސް ގޮތަބަޔާ ރާޖަޕަކްސަ އަލުން އެމެރިކާގެ ރައްޔިތުކަން ހޯދަން އެދި ރަސްމީކޮށް ހުށަހަޅުއްވާފައިވާ ކަމަށް ސްރީލަންކާގެ ދަ ސަންޑޭ ޓައިމްސް ނޫހުން ރިޕޯޓުކޮށްފި އެވެ.
ޑިސެމްބަރު މަހުގެ ތެރޭގައި ލަންކާއިން ފުރާވަޑައިގެންނެވި ގޮތަބަޔާ މި ވަގުތު ހުންނެވީ އާއިލާއާ އެކު ޑުބާއީގައި ޗުއްޓީއެއްގަ އެވެ.
އެންމެ ފުރަތަމަ ލަންކާ ނޫސްތަކުން ބުނީ އެމަނިކުފާނު ވަޑައިގެންނެވީ ޑުބާއީ މަގުން އެމެރިކާއަށް ކަމަށެވެ. އެހެން ނަމަވެސް، އެމެރިކާއަށް އެތެރެވުމަށް ވިސާ ލިބިވަޑައިނުގެންނެވި ކަމަށް ރިޕޯޓުތައް ބުނެ އެވެ.
ސަންޑޭ ޓައިމްސް ނޫހުން ބުނީ ގޮތަބަޔާ ރާޖަޕަކްސަގެ ގާނޫނީ ވަކީލުން މެދުވެރިކޮށް އެމެރިކާގެ ސްޓޭޓް ޑިޕާޓްމަންޓަށް ހުށަހެޅުއްވީ އަލުން އެމެރިކާގެ ރައްޔިތުކަން ނުވަތަ ސިޓިޒެންޝިޕް ހޯދުމަށެވެ.
ގޮތަބަޔާ އެމެރިކާގެ ރައްޔިތުކަން ދޫކޮށްލެއްވީ 2019 ވަނަ އަހަރު ސްރީލަަންކާގެ ރިޔާސީ އިންތިހާބުގައި ވާދަކުރެއްވުމަށެވެ. އަލުން ރައްޔިތުކަން ހޯދަން އެދި ހުށަހެޅުމުން، އެމެރިކާއިން އަދި ވަކި ގޮތެއް ނުނިންމަ އެވެ.
އިގުތިސާދީ ބޮޑު ކާރިސާއަކަށް ގައުމު ވެއްޓި، އާއްމުން މުޒާހަރާ ކުރަން ފެށުމުން، ގޮތަބަޔާ އެންމެ ފުރަތަމަ މަސައްކަތް ކުރެއްވީ އެމެރިކާގެ ރައްކާތެރިކަން ހޯދަން ކަމަށް ރިޕޯޓުތައް ބުނެ އެވެ.
ރައްޔިތުކަން އަލުން ހޯދަން ނުވަތަ އިއާދަކުރަން ހުށަހެޅުއްވީ، އެމެރިކާގެ ރައްކާތެރިކަން ހޯދަން ކުރި މަސައްކަތް ކާމިޔާބުނުވުމުންނެވެ.
