ލޯންސް (ޖެނުއަރީ 2) - ފްރާންސް ލީގުގައި ރޭ ލޯންސް އަތުން 3-1 އިން އެންމެ ފަހުގެ ޗެމްޕިއަން ޕީއެސްޖީ ބަލިވެއްޖެ އެވެ.
މިއީ މިދިޔަ އަހަރުގެ މާޗު މަހުގެ ފަހުން ޕީއެސްޖީ މެޗަކުން ބަލިވި ފުރަތަމަ ފަހަރެވެ. ސަސްޕެންޝަނުގެ ސަަބަބުން ރޭގެ މެޗުގައި ޕީއެސްޖީގެ ނޭމާ ނުކުޅޭއިރު، ފީފާ ވޯލްޑް ކަޕަށް ފަހު ލިއޮނަލް މެސީ އަދި ޕީއެސްޖީއާ ނުގުޅެ އެވެ.
ރޭގެ މެޗުން މޮޅުވެ، ތާވަލްގެ ދެ ވަނައިގައި އޮތް ލޯންސް ވަނީ އެއް ވަނައިގައި އޮތް ޕީއެސްޖީއާ ދެމެދު އޮތް ފަރަގު ހަތަރު ޕޮއިންޓަށް ކުޑަކޮށްފަ އެވެ. ލޯންސް ވެސް މި ސީޒަންގެ ފްރާންސް ލީގުގައި މިހާތަނަށް ބަލިވެފައިވަނީ އެންމެ މެޗަކުންނެވެ.
ޕީއެސްޖީ އެންމެ މެޗަކުން ބަލިވީ މީގެ ނުވަ މަސް ކުރިންނެވެ. މިދިޔަ އަހަރުގެ މާޗު މަހުގެ ނުވަ ވަނަ ދުވަހު ފްރާންސް ލީގުގައި މޮނާކޯ އަތުން ޕީއެސްޖީ ބަލިވީ 3-0 އިންނެވެ. އެކަމަކު، އެ މެޗުން ބަލިވިޔަސް، އޭރު ޕީއެސްޖީ އޮތީ 12 ޕޮއިންޓްގެ ލީޑަކާ އެކު އެވެ.
ލޯންސްގެ ދަނޑުގައި ރޭ ކުޅުނު މެޗުގެ ފަސް ވަނަ މިނިޓުގައި އެ ޓީމުން ލީޑު ނެގީ ޕްރެޒެމިސްލާވް ފްރަންކޮވްސްކީ ޖެހި ލަނޑުންނެވެ. އެކަމަކު، އޭގެ ތިން މިނިޓު ފަހުން ޕީއެސްޖީގެ ފޯވަޑް ހޫގޯ އެކިޓީކޭ ވަނީ ލަނޑެއް ޖަހައި މެޗުގެ ނަތީޖާ އެއްވަރުކޮށްފަ އެވެ.
މެޗުގެ 27 ވަނަ މިނިޓުގައި ލޯންސް އިން އަލުން ލީޑު ހޯދީ ލޮއިސް އޮޕެންޑާ ޖެހި ލަނޑުންނެވެ. އަދި ދެ ވަނަ ހާފުގެ ކުރީކޮޅު ލޯންސްގެ އެލެކްސް ކްލައުޑް މައުރީސް ވަނީ ލޯންސްގެ ތިން ވަނަ ލަނޑު ޖަހައިފަ އެވެ.
"މިއީ ލޯންސް އަށް ހައްގު މޮޅެއް،" މެޗަށް ފަހު ޕީއެސްޖީގެ ކޯޗު ކްރިސްޓޯފް ގަލްޓިއޭ ބުންޏެވެ.
ރޭގެ މެޗުގެ ކުރިން ކުޅުނު މެޗުގައި ރަތްކާޑު ދެއްކުމުން ޕީއެސްޖީގެ ތަރި ނޭމާ ހުރީ މި މެޗަށް ސަސްޕެންޑްވެފަ އެވެ. މެސީ، ވޯލްޑް ކަޕަށް ފަހު ވަރަށް އަވަހަށް ޓީމާ ގުޅޭނެ އެވެ.
ގަލްޓިއޭ ބުނީ މެސީ އާއި ނޭމާ ނެތުމަކީ ޓީމަށް ލިބޭ އުނިކަމަކަށްވިޔަސް، އެ ދެ ކުޅުންތެރިން ނެތުމަކީ ރޭގެ މެޗުގެ ނަތީޖާ އިން ރެކެން ދެއްކޭނެ ބަހަނާއެއް ނޫން ކަމަށެވެ.
ލޯންސްގެ ކޯޗު ފްރޭންކް ހައިސް ބުނީ މި މެޗުން މޮޅުވުމަކީ ލޯންސަށް ލިބުނު ވަރަށް ބޮޑު ހިތްހަމަޖެހުމެއް ކަމަށެވެ.
"ލޯންސް އިން މި ސާބިތުކޮށްދިނީ މި ލީގުގައި އޮތް ކޮންމެ ޓީމެއް ވެސް ލޯންސަށް ބަލިކުރެވޭނެކަން،" ހައިސް ބުންޏެވެ.
ޕީއެސްޖީ ބަލިވުމަކީ ލީގުގައި ދެން އޮތް ހުރިހާ ޓީމެއް އުފާކުރާނެ ކަމެއް ނޫންތޯ އެހުމުން ހައިސް ބުނީ ލީގު ފޯރިގަދަވާނެ ސަބަބަކީ ވެސް އެ ގޮތަށް ވުން ކަމަށެވެ.
