ޗައިނާއިން ދަތުރު ކުރާ މީހުން ކޮވިޑަށް ސްކްރީން ކުރަން ޖެހޭ ސަބަބެއް ނެތް ކަމަށް ޔޫރަޕިއަން ޔޫނިއަން (އީޔޫ) ގެ ބަލިތަކާ ބެހޭ އެޖެންސީން ބުނެފި އެވެ.
އިޓަލީއިން ނިންމާފައި ވަނީ ޗައިނާއިން ދަތުރު ކުރާ މީހުން ކޮވިޑަށް ނެގެޓިވް ނަތީޖާ ހުށަހަޅަން ޖެހޭނެ ކަމަށެވެ. ބުރާސްފަތި ދުވަހު އިޓަލީއިން އީޔޫގެ އެހެން ގައުމުތަކަށް ގޮވާލީ އެ ފިޔަވަޅު ތަންފީޒު ކުރުމަށެވެ.
އިޓަލީގެ އިތުރުން އެމެރިކާ، ޖަޕާން، ޓައިވާން އަދި އިންޑިއާއިން ވެސް ބުނީ ޗައިނާއިން ދަތުރު ކުރާ މީހުންގެ ނެގެޓިވް ނަތީޖާ ހުށަނާޅާ ނަމަ ކަރަންޓީން ކުރާނެ ކަމަށެވެ.
އެކަމަކު ޔޫރޮޕިއަން ސެންޓާ ފޯ ޑިޒީޒް ޕްރިވެންޝަން އެންޑް ކޮންޓްރޯލުން ބުނީ ޗައިނާގައި ކޭސްތައް އިތުރުވަމުން ދިޔަ ނަމަވެސް އޭގެ އަސަރު އީޔޫއަށް ކުރާނެ ކަމަށް ނުބެލެވޭ ކަމަށެވެ.
ތިން އަހަރުގެ ލޮކްޑައުނަށް ފަހު ޗައިނާއިން ނިންމީ ޖެނުއަރީ އަށް ވަނަ ދުވަހުން ފެށިގެން ބޯޑަރު ހުޅުވާލުމަށެވެ. އެކަމަކު މިހާރު ދީފައިވާ ލުއިތަކާ އެކު އެ ގައުމުގައި ކޭސްތައް ވަނީ އިތުރުވެފަ އެވެ.
އީޔޫގެ ބަލިތަކާ ބެހޭ އެޖެންސީން ބުނީ ޗަައިނާގައި އުޅޭ ވޭރިއެންޓްތަކަކީ މިހާރު ވެސް ޔޫރޮޕްގައި ވަރަށް ބޮޑަށް ފެތުރިފައިވާ ވޭރިއެންޓްތަކެއް ކަމަށާއި ޔޫރޮޕާ ހިލާފަށް ޗައިނާގައި ވެކްސިން ފުރިހަމަކޮށްފައިވާ ނިސްބަތް ކުޑަ ކަމަށެވެ.
އެހެން ނަމަވެސް އީޔޫއިން އޮންނާނީ ތައްޔާރީ ހާލަތުގައި ކަމަށާއި އެމެޖެންސީ ފިޔަވަޅެއް އަޅަން ޖެހިއްޖެ ނަމަ ވަގުތުން މަސައްކަތް ފަށާނެ ކަމަށް ވެސް ބުންޏެވެ.
އީޔޫގެ ގައުމުތަކަށް އެ ގައުމެއްގައި ތަންފީޒު ކުރަން ބޭނުންވާ ފިޔަވަޅެއް ތަންފީޒް ކުރެވޭނެ އެވެ. އީޔޫގެ ޒިންމާއަކީ ހާލަތު ވަޒަންކޮށް އެންމެ އެކަށޭނަ ލަފާ އާއި އިރުޝާދު ދިނުމެވެ.
