ޕެރިސް (ޑިސެމްބަރު 29) - ގަތަރުގައި ކުރިއަށްދިޔަ ފީފާ ވޯލްޑް ކަޕްގެ ބްރޭކަށް ފަހު، ފްރެންޗް ލީގުގެ ކުޅުން ފެށި މެޗުގައި ރޭ ސްޓްރާސްބޯއާ ދެކޮޅަށް ޕީއެސްޖީގެ ނޭމާ އަށް ރަތް ކާޑު ދެއްކިއިރު، ކީލިއަން އެމްބާޕޭ އިތުރު ވަގުތުގައި ގޯލު ޖަހައި 2-1 އިން ޕީއެސްޖީ މޮޅުކޮށްދީފި އެވެ.
ޕީއެސްޖީ ދަނޑުގައި ރޭ ކުޅުނު މެޗުގެ 14 ވަނަ މިނިޓްގައި އެ ޓީމުން ލީޑުނެގީ މާކީނިއޯސް ޖެހި ލަނޑުންނެވެ. މިއީ ނޭމާ ހިލޭ ޖެހުމަކުން އޭރިއާތެރެއަށް ހުރަސްކޮށްލި ބޯޅައަކަށް އަރައި، މާކީނިއޯސް ބޮލުން ޖެހި ގޯލެކެވެ.
ސްޓްރާސްބޯ އިން ފުރަތަަމަ ހާފުގައި ނަތީޖާ ހަމަހަމަ ކުރަން ކުރި އެޓޭކްތައް ޕީއެސްޖީން ހުއްޓުވި އެވެ. ޕީއެސްޖީގެ ކީޕަރު ޖިއަންލުއީޖީ ޑޮންނަރުންމާ ވަނީ މޮޅު ކުޅުމެއް ދައްކައިފަ އެވެ. އެކަމަކު، މެޗުގެ ދެ ވަނަ ހާފުގެ ކުޅުން ފެށިގެން ހަ މިނިޓް ތެރޭ ސްޓްރާސްބޯ އިން އެއްވަރުކުރި އެވެ. އެ ގޮތުން، 51 ވަނަ މިނިޓްގައި ސްޓްރާސްބޯގެ އޭޑްރިއަން ތޮމަސަން ގޯލު ކުރިމައްޗަށް ހުރަސްކުރަން ފޮނުވާލި ބޯޅަ ދިފާއުކުރަން ވެގެން ޕީއެސްޖީގެ މާކީނިއޯސް ފައިން ޖައްސާލި ބޯޅަ ވަނީ ބައިކޮޅަށެވެ.
އޭގެ ފަހުން ޕީއެސްޖީ އަށް އުނދަގޫ ހާލަތެއް ކުރިމަތިވީ ނޭމާ އަށް ދެ ވަނަ ރީނދޫ ކާޑާ އެކު ރަތް ކާޑު ދެއްކުމުންނެވެ. ފުރަތަމަ ރީނދޫ ކާޑު ދެއްކީ ސްޓްރާސްބޯ ކުޅުންތެރިއަކު މޫނުގައި އަތުން ޖެހިކަމަށް ބަލަ އެވެ. ދެ ވަނަ ރީނދޫ ކާޑާ އެކު ރަތް ކާޑެއް ދެއްކީ، ޕެނަލްޓީއެއް ހޯދަން އޭރިއާތެރެއިން ޑައިވްކުރުމުންނެވެ. މިއީ 2017 ވަނަ އަހަރު ދުނިޔޭގެ ރެކޯޑް ފީ އަކަށް ޕީއެސްޖީއާ ގުޅުނު ފަހުން، ނޭމާ އަށް ދެއްކި ފަސް ވަނަ ރަތް ކާޑެވެ.
އިތުރު ވަގުތުގައި ސްޓްރާސްބޯގެ ޖާޒިނޯ ނިޔާމްސީ އޭރިއާތެރެއިން އެމްބާޕޭ އަށް ކުރި ފައުލަކަށް ދިން ޕެނަލްޓީ އޭނާ ވަނީ ގޯލުގެ ތެރެއަށް ފޮނުވާލައިފަ އެވެ.
ކުޅުންތެރިއަކު މަދުކޮށް މެޗު ނިންމާލަން ޖެހުނު ނަމަވެސް ހޯދި ތިން ޕޮއިންޓާ އެކު ޕީއެސްޖީ އޮތީ 16 މެޗުން 44 ޕޮއިންޓާ އެކު އެއް ވަނައިގަ އެވެ. ދެ ވަނައިގައި އޮތީ 15 މެޗުން 36 ޕޮއިންޓާ އެކު ލެންސް އެވެ.
ވޯލްޑް ކަޕްގެ ކާމިޔާބީގެ އުފާފާޅުކުރުންތަކާއި ޗުއްޓީ އަށް ފަހު އާޖެންޓީނާގެ ކެޕްޓަން، ލިއޮނަލް މެސީ، ޕީއެސްޖީއާ ގުޅޭނީ އަންނަ ހަފްތާގަ އެވެ.
