ކުޑަރަށެއް ބޮޑު ރަށެއް ނުބަލާ ތަރައްގީ ގެނައުމަކީ ތަސައްވަރެއް ކަމަށް ގަބޫލު ނުކުރައްވާ ކަމަށް ވިދާޅުވީ މޯލްޑިވިއަން ޑިމޮކްރެޓިކް ޕާޓީގެ ޕްރައިމަރީގައި ވާދަކުރައްވާ ރައްޔިތުންގެ މަޖިލީހުގެ ރައީސް މުހައްމަދު ނަޝީދު، ސަރުކާރުގެ އެންމެ މުހިންމު އެއް ސިޔާސަތަށް ފާޑުވިދާޅުވެއްޖެ އެވެ.
ނަޝީދުގެ "ފިކުރެއްގެ ދިރުން" ކެމްޕެއިން ރަސްމީކޮށް ފެށުމަށް ރޭ ސަލްޓަން ޕާކުގައި ބޭއްވި ޖަލްސާގައި ވާހަކަ ދައްކަވަމުން އެމަނިކުފާނު ވިދާޅުވީ، އުމްރާނީ ތަރައްގީގެ މަޝްރުއޫތަކުގައި "އެޔެއް މިއެއް ބަލާލުމެއް ނެތި" އެތަންމިތަނަށް ތަރައްގީ ގެނައުމަކީ ތަސައްވުރެއް ކަމަށް އެމަނިކުފާނު ގަބޫލު ނުކުރައްވާ ކަމަށެވެ.
"ރާއްޖޭގެ ބޮޑެތި އާބާދީތައް، އައްޑޫ، ތިނަދޫ، ކުޅުދުއްފުށި އަދި މާލެއާ، މީގެން ރަށެކޭ ފުލިދުއަތޮޅު ރަކީދޫއެކޭ ކުރާ ހަރަދަށް ކުޑަރަށެއް ބޮޑުރަށެއް ނުބެލީމާ މިވަނީ އެއްވަރު. ރަކީދޫގައި ސަތޭކަ ބިލިއަން ރުފިޔާގެ ބަނދަރެއް ހަދާފާ އައްޑު އަތޮޅު ހޮސްޕިޓަލުގައި ޑޮކްޓަރެއް ނެތުނީމާ މި ކުޑަރަށެއް ބޮޑުރަށެއް ފަޅު ރަށެއް އޭޔެއް މިއެއް ނުބަލާ އުޅުން ބަލައެއް ނުގަނެވޭ،" ނަޝީދު ވިދާޅުވި އެވެ.
ނަޝީދު މިފަދައިން އަނެއްކާވެސް ވިދާޅުވެފައިވާއިރު، ތަރައްގީގައި ކުދި ރަށްރަށާއި ބޮޑެތި ރަށްރަށް ހަމަހަމަ ކުރުމަކީ މި ސަރުކާރުން ގެންގުޅޭ އެންމެ ބޮޑު އެއް ސިޔާސަތެވެ.
"އެއްބައިވަންތަކުރެވޭނީ، ހިދުމަތް ދިނުމުގައި، ރައްޔިތުންގެ މެދުގައި ތަފާތުނުކޮށް، ހަމަހަމަކަން ގާއިމުކޮށްގެން. އަސާސީ ހިދުމަތްތައް ފޯރުކޮށްދިނުމަށް އަޅުގަނޑުމެން ފެށި ކޮންމެ މަޝްރޫއެއްގެ އަމާޒަކީ، ވަކި ރަށެއް ތަފާތުނުކޮށް، ރާއްޖޭގެ ހުރިހާ ރައްޔިތުންނަށް އެ ހިދުމަތްތައް ފޯރުކޮށްދިނުން،" ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު، މިދިޔަ ހޯމަ ދުވަހު ވިދާޅުވެފައިވެ އެވެ.
އެ މައުލޫގައި ވާހަކަ ދައްކަވަމުން ނަޝީދު ކުރިން ވިދާޅުވެފައި ވަނީ ރަށްރަށުގައި ނަރުދަމާ އެޅުމާއި ބަނދަރުތައް އެޅުމުގައި ސަރުކާރުން އެތައް ފައިސާއެއް ހޭދަކުރާއިރު، ބޮޑެތި އާބާދީތައް އޮންނަ ރަށްރަށުގައި ދެވޭ އެކި ހިދުމަތްތައް ދޯދިޔާކޮށް އޮތުމަކީ ހަގީގަތުގައި ހަމަހަމަކަން ނޫން ކަމަށެވެ.
ހަމައެކަނި ބޮޑެތި ރަށްރަށުގައި ތަރައްގީގެ މަޝްރުއޫތައް ހިންގާފައިވާތީ ކުދި ރައްރަށް އޮތީ "ހާލުގައި ޖެހިފައި" ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް މީގެ ކުރިން ވިދާޅުވެފައިވެ އެވެ. އަދި 2018 ވަނަ އަހަރުގެ ރިޔާސީ ކެމްޕޭނަށް މުޅި ރާއްޖޭގެ ހުރިހާ ރަށަކަށް ކުރެއްވި ދަތުރުފުޅުގައި ކުދި ރަށްތަކަށް ބޮޑެތި ވައުދުތަކެއްވެ އެކަންކަން ފުއްދައިދީފައި ވެސް އެބަހުއްޓެވެ.
