ޕެރިސް (ޑިސެމްބަރު 28) - ޕީއެސްޖީގެ ސަޕޯޓަރުންގެ ކުރިމަތީގައި ފީފާ ވޯލްޑް ކަޕްގެ ތަށި ދައްކާލަން އާޖެންޓީނާގެ ލިއޮނަލް މެސީ ބޭނުންވިކަމުގައި ވިޔަސް ޕީއެސްޖީ އިން އެކަމާ ދެކޮޅު ހަދާފައިވާ ކަމަށް މީޑިއާ ރިޕޯޓްތައް ބުނެފި އެވެ.
ގަތަރުގައި ދާދި ފަހުން ނިމިގެންދިޔަ، ފީފާ ވޯލްޑް ކަޕްގެ ތަށި އާޖެންޓީނާ އިން ކާމިޔާބުކުރީ ފައިނަލުގައި ފްރާންސް ބަލިކޮށްގެންނެވެ. ޕެނަލްޓީ ޖަހައިގެން ފްރާންސް އަތުން އާޖެންޓީނާ މޮޅުވިއިރު، މި މެޗަކީ ވޯލްޑް ކަޕްގެ ތާރީހުގައި ކުޅުނު އެންމެ ފޯރިގަދަ ފައިނަލްގެ ގޮތުގައި ގިނަ ބަޔަކު އަންނަނީ ސިފަކުރަމުންނެވެ.
އާޖެންޓީނާގެ ކެޕްޓަން، މެސީ ކުޅެމުން އަންނަ ކުލަބަކީ ފްރާންސްގެ ޗެމްޕިއަން، ޕީއެސްޖީ އެވެ. އާންމުކޮށް މެސީ އަށް ގައުމީ ޓީމުގައި ލިބޭ ކާމިޔާބީތަކާއި ކުލަބު ލެވެލްގައި ލިބޭ ކާމިޔާބީތައް ވެސް ފާހަގަކުރުމުގެ ގޮތުން އޭނާ އަށް ލިބޭ ޓްރޮފީތައް ސަޕޯޓަރުންނަށް ދައްކާލުމުގެ ހަރަކާތެއް އޮވެ އެވެ. މި ހަރަކާތް އޮންނަނީ އެވޯޑު ލިބުމަށް ފަހު އަމިއްލަ ދަނޑުގައި ކުޅޭ ފުރަތަމަ މެޗު ފެށުމުގެ ކުރިންނެވެ.
މެސީގެ މި އާދަ ދެމެހެއްޓުމަށް އޭނާގެ ކެރިއަރުގައި ލިބުނު އެންމެ މުހިންމު ޓްރޮފީ އަމިއްލަ ކުލަބުގެ ސަޕޯޓަރުންނަށް ދައްކާލަން އޭނާ ބޭނުންވެ އެވެ. އެ ކަމަށް ކުލަބުގެ ހުއްދައަށް އެދުމުން ޕީއެސްޖީ އިން ވަނީ މަސްލަހަތަށް ބަލައި އެ ފުރުސަތު ނުދޭން ނިންމާފައި ކަމަށް ފްރާންސްގެ މީޑިއާތަކުން އަންނަނީ ރިޕޯޓްކުރަމުންނެވެ.
އާޖެންޓީނާ އިން ތަށި ކާމިޔާބު ކުރުމަށް ފަހު ބޭއްވި އުފާފާޅުކުރުންތަކުގައި ވަނީ ފްރާންސްގެ ކުޅުންތެރިންނަށް މަލާމާތް ރައްދުވާގޮތަށް ކަންތައްތަކެއް ކޮށްފަ އެވެ. އަދި ސަޕޯޓަރުންނަށް ވެސް މަލާމާތްކޮށްފައިވެ އެވެ. މި ހާލަތުގައި ފްރާންސްގެ ކުލަބަކުން މެސީ އަށް ތަށި ދައްކާލުމުގެ ފުރުސަތު ދިނުމަކީ ސަޕޯޓަރުންނާއި ކުލަބާ އޮތް ގުޅުމަށް ބުރޫ އަރާނެކަމެއްގެ ގޮތުގައި ކުލަބުގެ އިސްވެރިން ގަބޫލުކުރެ އެވެ.
ވޯލްޑް ކަޕަށް ފަހު މެސީ މި ވަގުތު ހުރީ އާއިލާއާ އެކު ޗުއްޓީގަ އެވެ. އެހެންކަމުން، މިރޭ ލީގުގައި ޕީއެސްޖީ އިން ސްޓްރޯސްބާއާ ދެކޮޅަށް ކުޅޭ މެޗުގައި މެސީ ނުކުޅޭނެ އެވެ.
ވޯލްޑް ކަޕަށް ފަހު ކޮންމެ ކުޅުންތެރިއަކަށް ވެސް ބޭނުންނަމަ 14 ދުވަހުގެ ޗުއްޓީއެއް ނެގޭ ގޮތަށް އޮތްއިރު، މެސީ ޗުއްޓީ އަށް ފަހު، އެނބުރި ކުލަބުގެ ފަރިތަކުރުންތަކުގައި ބައިވެރިވާނީ އަންނަ ހަފްތާގައި ކަމަށް ބެލެވެ އެވެ.
މެސީ ޓީމާ އެކު މި ވަގުތު ނެތް ނަމަވެސް ވޯލްޑް ކަޕްގެ ފައިނަލުން ބަލިވި ފްރާންސްގެ ތަރި ކީލިއަން އެމްބާޕޭ ވަނީ ޗުއްޓީ އެއް ނެތި އަލުން ފަރިތަކުރުންތަކަށް ނުކުމެފަ އެވެ. އެހެންކަމުން، މިރޭގެ މެޗުގައި އެމްބާޕޭ ކުޅޭނެ އެވެ. އެމްބާޕޭގެ އިތުރުން ނޭމާ ވެސް ވަނީ ވޯލްޑް ކަޕަށް ފަހު ކުލަބާ ގުޅިފަ އެވެ. ނޭމާގެ ބްރެޒިލް ވޯލްޑް ކަޕުން ކެޓީ ކުއާޓާ ފައިނަލުންނެވެ.
