މައިކްރޯސޮފްޓް ކުންފުނީގެ ފައުންޑަރު ބިލް ގޭޓްސް ސްރީލަންކާއަށް ދަތުރު ކުރުމަށް ދައުވަތު ދޭން އެ ގައުމުގެ ސަރުކާރުން ނިންމައިފި އެވެ.
ސްރީލަންކާގެ ރައީސް އޮފީހާ ހަވާލަދީ އެ ގައުމުގެ ނޫސްތަކުން ބުނީ ބިލް ގޭޓްސްއަށް ދައުވަަތު ދެނީ އަންނަ އަހަރުގެ ތެރޭގައި ދަތުރު ކުރުމަށް ކަމަށެވެ.
އަންނަ އަހަރު އޮންނަ އިއާދަކުރަނިވި ހަކަތައާ ގުޅޭ ބައިނަލްއަގްވާމީ ކޮންފެރެންސެއްގައި ބިލް ގޭޓްސްގެ އިތުރުން ދުނިޔޭގެ މަގްބޫލް ޝަހުސިއްޔަތުން ބައިވެރި ކުރުވުމަށް ލަންކާ ސަަރުކާރުން ބޭނުންވެ އެވެ.
އެ ކޮންފެރެންސްގެ ކަންކަން ކުރިއަށް ގެންދިޔުމަށް ރައީސް ރަނިލް ވިކްރަމަސިންހަ އައްޔަނު ކުރެއްވީ އެޑްވައިޒަރު އެރިކް ސޮލްހެއިމް އާއި ރުވަން ވިޖެވަރްދެނެ އެވެ.
އުމުރުން 67 އަހަރުގެ ބިލް ގޭޓްސްއަކީ ބިލިއަނަރެކެވެ. އޭނާގެ ގިނަ ވަގުތު މިހާރު ހޭދަކުރަނީ ހިލޭ ސާބަހަށް މަަސައްކަތް ކުރުމުގަ އެވެ.
އިގްތިސާދީ ބޮޑު އަނދަވަޅެއްގައި އޮތް ސްރީލަންކާއިން މަސައްކަތް ކުރަނީ އެ ގައުމުގެ އެކި ސިނާއަތްތައް ކުރިއަރުވައި ބޮޑެތި އިންވެސްޓަރުންގެ ޝައުގުވެރިކަން ހޯދުމަށެވެ.
