ހއ. ދާންދޫ ބިން ހިއްކުމާއި، ގޮނޑުދޮށް ހިމާޔަތް ކުރުމުގެ މަޝްރޫއު ނިންމާ، ކައުންސިލާ ހަވާލުކޮށްފި އެވެ.
ދާންދޫ ހިއްކި ބިން އެރަށު ކައުންސިލާ ރަސްމީކޮށް ހަވާލުކޮށްފައި ވަނީ މިކަމަށް ހާއްސަކޮށް މިރޭ ބޭއްވި ރަސްމިއްޔާތެއްގަ އެވެ. ބިން ކައުންސިލާ ހަވާލުކޮށްފައި ވަނީ ޕްލޭނިން މިނިސްޓަރު މުހައްމަދު އަސްލަމާއި، މަޝްރޫއުގެ މަސައްކަތް ކުރިއަށް ގެންދިޔަ އެމްޓީސީސީގެ ސީއީއޯ އާދަމް އާޒިމެވެ.
2020 ވަނަ އަހަރު ސޮއި ކުރި މި މަޝްރޫއުގެ ދަށުން 25 ހެކްޓަރުގެ ބިން ހިއްކާފައިވާއިރު، ހިއްކި ބިމުގެ ގޮނޑުދޮށް ހިމާޔަތް ކުރުމުގެ ގޮތުން 833 މީޓަރުގެ ބޮޑުހިލައިގެ ރިވެޓްމަންޓާއި، 375 މީޓަރުގެ ބޮޑުހިލައިގެ ބްރޭކްވޯޓާ އަދި 180 މީޓަރުގެ ބޮޑުހިލައިގެ ގްރޮއިންގެ އިތުރުން 345 މީޓަރުގެ ޖިއޯބޭގް ރިވެޓްމަންޓް ގާއިމްކޮށްފައިވެ އެވެ.
މިއީ 185 މިލިއަން ރުފިޔާއަށް ނިންމާފައިވާ މަޝްރޫއެކެވެ.
ދަންދޫ ހިއްކި ބިމުގައި ބޭއްވި ރަސްމިއްޔާތުގައި ވާހަކަދައްކަވަމުން ދާންދޫ ކައުންސިލުގެ ރައީސް މުހައްމަދު އާސިފް ވިދާޅުވީ ސިޔާސީ ފިކުރަކަށް ބެލުމެއް ނެތި ދާންދޫ ރައްޔިތުން ކައުންސިލް ހޮވާފައި އޮތީ ސަރުކާރާ ގުޅިގެން ރަށުގެ ތަރައްގީއަށް މަސައްކަތް ކުރުމަށް ކަމަށާއި، އެކަމުގައި ދެމިތިބޭނެ ކަމަށެވެ.
މިދިޔަ ރިޔާސީ އިންތިހާބުގައި ދާންދޫ ރައްޔިތުން އެންމެ ބޮޑަށް ބޭނުންވި ކަމަކީ ބޯހިޔާވަހިކަން ކަން ފާހަގަކުރައްވާ އާސިފް ވިދާޅުވީ ސަރުކާރުން ސިން އުއްމީދާއެކި އެރަށު އެތައް ރައްޔިތުންނެއް ގޯއްޗަށް އެދި ފޯމު ހުށަހެޅި ކަމަށެވެ. އަދި ބާރު ސްޕީޑުގައި އެރަށުގެ ބިން ހިއްކުމުގެ މަޝްރޫއު ކުރިއަށް ގެންދިޔަ ފަދައިން އަންނަ އަހަރު އެރަށު ރައްޔިތުންނަށް ބޯހިޔާވަހިކަން ހޯދައިދެވޭނެފަދަ މަޝްރޫއެއް ހިންގަވައިދެއްވުމަށް އާސިފް ވަނީ ރައީސް އަރިހުން އެދިވަޑައިގެންފަ އެވެ.
