އަފްގާނިސްތާނުގެ އަންހެނުން ޔުނިވާސިޓީތަކުގައި ތައުލީމު އުނގެނުން މަނާ ކުރުމުން ވެރިރަށް ކާބުލްގައި އޮތް މުޒާހަރާއެއްގެ ތެރެއިން ފަސް އަންހެނުން ހައްޔަރުކޮށްފި އެވެ.
ރިޕޯޓުތައް ބުނާ ގޮތުން ތިން ނޫސްވެރިން ވެސް ހައްޔަރު ކުރި އެވެ. ކާބުލްގެ އިތުރުން ތަހާރް ޕްރޮވިންސްގައި ވެސް މީހުން މުޒާހަރާ ކުރި އެވެ.
ބުދަ ދުވަހު އެތައް ސަތޭކަ އަންހެން ދަރިވަރުން ޔުނިވާސިޓީތަކަށް ވަންނަަން މަސައްކަތް ކުރުމުން، ގާޑުން އެކަމަށް ހުރަސް އެޅި އެވެ. އަންހެން ދަރިވަރުން ޔުނިވާސިޓީތަކަށް ދިޔުން މަނާކުރީ އަންގާރަ ދުވަހު އެވެ.
ޔުނިވާސިޓީތައް އަންހެނުންނަށް ބަންދުކޮށްފައި ވާއިރު، ފުރާވަރު އުމުރުގެ ކުދިންނަށް ހާއްސަ ސެކަންޑަރީ ސްކޫލް ތައުލީމުން އަންހެން ކުދިން މަހުރޫމްކޮށްފައި އޮންނަތާ އަހަރެއް ވެއްޖެ އެވެ.
އެޑިއުކޭޝަން މިނިސްޓްރީން ބުނީ އިލްމުވެރިން ޔުނިވާސިޓީގެ ކަރިކިއުލަމް އާއި މާހައުލު ބެލުމަށް ފަހު، އަންހެނުންނަށް ޔުނިވާސިޓީތައް ބަންދުކުރީ "އެކަށޭނަ މާހައުލެއް" ގާއިމްކުރެވެން ދެން ކަމަށެވެ.
ބުރާސްފަތި ދުވަހު ސޯޝަލް މީޑިއާގައި އާއްމުވި ބައެއް ވީޑިއޯތަކުން ފެންނަނީ ކާބުލްގެ މަގުތަކުގައި އަންހެނުން އިހްތިޖާޖް ކުރި މަންޒަރެވެ.
މުޒާހަރާގެ ބައިވެރިން އެންމެ ފުރަތަމަ ބޭނުންވީ އަފްގާނިސްތާނުގެ އެންމެ ބޮޑު އަދި ގަދަރުވެރި ތައުލީމީ އިދާރާ ކަމުގައިވާ ކާބުލް ޔުނިވާސިޓީގެ ބޭރުގައި ޖަމާވުމަށެވެ.
އެހެން ނަމަވެސް، ގިނަ އަދަދެއްގެ ފުލުހުން ފޮނުވުމުން، އެ ސަރަހައްދަށް ގޮސްފައެއް ނުވެ އެވެ. އަފްގާނިސްތާނުގެ ބައެއް ފިރިހެނުން ވެސް އިހްތިޖާޖްގައި ބައިވެރިވެ އެވެ.
އެގޮތުން ޕަބްލިކް އަދި ޕްރައިވެޓް ތައުލީމީ އިދާރާތަކުގައި އުޅޭ 50 އަށް ވުރެ ގިނަަ ފިރިހެން ޕްރޮފެސަރުން އިސްތިއުފާދީފައިވެ އެވެ. އޭގެ އިތުރުން ފިރިހެން ދަަރިވަރުން އިމްތިހާން ހެދުމަށް ވެސް ދެކޮޅު ހެދި އެވެ.
