ޖުޑީޝަލް ސާވިސް ކޮމިޝަން (ޖޭއެސްސީ)ގައި ރައްޔިތުންގެ މަޖިލީހުގެ ދައުރު މުހިންމު ނޫން ކަމަށް މޯލްޑިވްސް ރިފޯމް މޫވްމަންޓް އިން ބުނެފިއެވެ.
އެޓާނީ ޖެނެރަލް (އޭޖީ) އޮފީހުން ފަށާފައިވާ ޖޭއެސްސީ އެކުލެވިގެންވާ ގޮތް ބަދަލުކުރުމުގެ މަސައްކަތާ ގުޅިގެން އެމްއާރުއެމް އިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޖޭއެސްސީގެ ކުރީގެ މެންބަރުކަން ކުރައްވާފައިވާ އެމްއާރުއެމްގެ ރައީސް ފާރިސް މައުމޫން ވިދާޅުވީ، ޖޭއެސްސީ މިހާރު އޮތް ގޮތަށް އިސްލާހު ގެނެސްގެން މެނުވީ މުޅި މުޖްތަމައަށް ވެސް ރައްކާތެރިކަން ލިބިގެން ނުދާނެ ކަމަށެވެ.
އެމްއާރުއެމްގެ އެ ނޫސްވެރިންގެ ބައްދަލުވުމުގައި ވަނީ އެޕާޓީން ޖޭއެސްސީއަށް ގެންނަން ބޭނުންވާ ބަދަލުތައް ހިއްސާކުރި އެވެ. އެގޮތުން އެއްކަމެއްގެ ގޮތުގާ އެމްއާރުއެމްއިން ފާހަގަކުރީ ޖޭއެސްސީގެ އޮނިގަނޑުގައި މިހާރު ހިމެނޭ ރައްޔިތުންގެ މަޖިލީހުގެ ރައީސް އަދި މަޖިލީހުގެ މެންބަރަކު އިންނެވުން މުހިންމު ނޫން ކަމަށެވެ.
"ތިޔަބޭފުުޅުންގެ ވާތްފަރާތުުން ތިޔަ ފެންނަ ބައިން ތިރީގަ ހިމަނާފައި މިވާ މެންބަރުންނަކީ މި ކޮމިޝަންގައި ހިމަނަން ނުޖެހޭ މެންބަރުން ކަމަށް މޯލްޑިވްސް ރިފޯމް މޫވްމަންޓުން ގަބޫލުކުރަނީ. އެއީ ރައްޔިތުންގެ މަޖިލީހުގެ ރައީސް އަދި މެންބަރެއް، ރައީސުލްޖުމްހޫރިއްޔާ އައްޔަންކުރައްވާ މެންބަރެއް، ސިވިލް ސާވިސް ކޮމިޝަނުގެ ރައީސް،" އެމްއާރުއެމްގެ ގާނޫނީ ވަކީލް އައިމިނަތު ރިފްޤާ ވިދާޅުވި އެވެ.
އެމްއާރުއެމްއިން ހުށަހެޅި އިތުރު އިސްލާހުތަކުގެ ތެރޭގައި ހިމެނެނީ:
- ސުޕްރީމްކޯޓުގެ ފަނޑިޔާރުންގެ ތެރެއިން އެކޯޓުން އިންތިހާބުކުރާ އުއްތަމަ ފަނޑިޔާރު ފިޔަވާ އެހެން ފަނޑިޔާރެއް ހިމެނުން
- ހައިކޯޓުން އިންތިހާބުކުރާ ފަނޑިޔާރެއް ހިމެނުން
- ދަށު ކޯޓުތަކުން އިންތިހާބުކުރާ ފަނޑިޔާރެއް ހިމެނުން
- ޝަރުއީ ދާއިރާއިން ރިޓަޔާކުރައްވާފައިވާ ތިން ބޭފުޅަކު ހިމެނުން
- ރައްޔިތުންގެ މަޖިލީހުގެ ރައީސް އާއި މެންބަރު އުނިކުރުން
- ރައީސުލްޖުމްހޫރިއްޔާ އައްޔަންކުރައްވާ މެންބަރު އުނިކުރުން
- ސިވިލްސާވިސް ކޮމިޝަނުގެ ރައީސް ކޮމިޝަނުން އުނިކުރުން
- އާންމުންގެ ތެރެއިން މެންބަރަކު އައްޔަންކުރާއިރު 15 އަހަރު ދުވަހުގެ ތަޖުރިބާ ހުރި އަންހެން އަދި ފިރިހެން މެންބަރަކު ހިމެނުން
- މެންބަރުން އައްޔަންކުރުމަށް ކުރާ އިންޓަވިއު މިނިވަން މުއައްސަސާއަކުން ކުރުން
- 15 އަހަރު ދުވަހުގެ ތަޖުރިބާ ހުރި (ބާކައުންސިލުން އިންތިހާބުކުރާ) ގާނޫނީ ވަކީލަކު ހިމެނުން
- މެންބަރުންގެ ދައުރެއް ކަމުގައި ހަތް އަހަރުގެ ދެ ދައުރު ކަނޑައެޅުން
- މެންބަރަކު ކޮމިޝަނުން ވަކިކުރާނަމަ ވަކިކުރަން ވާނީ ޖިނާއީ ކުށެއް ސާބިތުވެގެންކަމަށް ކަނޑައެޅުން
- ޖިނާއީ ކުށެއްގެ ތަހުގީގު މެންބަރެއްގެ މައްޗަށް ކުރެވޭ ހިނދުން ފެށިގެން އޭނާ މަގާމުން އެކަހެރިކުރުން
- ފަނޑިޔާރަކު މަގާމުން ވަކިކުރާނަމަ ކޮމިޝަނުގެ ހުރިހާ މެންބަރުން ބައިވެރިވާ ވޯޓެއް ނަގަން ޖެހޭނެކަން
- ފަނޑިޔާރުންނާ ގުޅޭ ޝަކުވާތައް ބަލާ ފިޔަވު އެޅުން އިތުރަށް ހަރުދަނާކުރުން
- ފަނޑިޔާރުން ވަކިކުރާއިރު ވަކިކުރާ ސަބަބު ރައްޔިތުންނަށް އެންގުން
- ސަސްޕެންޑުކުރާ ހާލަތުގައި މުއްދަތެއް އިޖުރާއަތެއް ކަނޑައެޅިފައި އޮންނަންވާނެ
- ޖޭއެސްސީން ގަވައިދުން ފަނޑިޔާރުންގެ މަސައްކަތްތައް ބަލަން ވާނެ
އެ އިސްލާހުތައް އޭޖީ އޮފީހުން ދިން މުއްދަތުގެ ތެރޭގައި ހުށަހަޅާފައިިވާނެ ކަމަށް އެމްއާރުއެމްއިން ވަނީީ ބުނެފަ އެވެ.
އޭޖީ އޮފީހުން މީގެ ކުރިން ބުނެފައިވަނީ، ޖޭއެސްސީ އަކީ ދެފުށް ފެންނަ، ސިޔާސީ ނުފޫޒުން އެއްކިބާވެފައިވާ މުއައްސަސާއެއްކަން ކަށަވަރު ކުރުމަށްޓަކައި، ކަމާ ގުޅޭ ބައިނަލްއަގްވާމީ ހަމަތަކާއި އުސޫލުތަކަށް ރިއާޔަތްކޮށް، އެ ކޮމިޝަން އެކުލެވިގެންވާ ގޮތް ބަދަލު ކުރުމަށް ގާނޫނު އަސާސީގެ 158 ވަނަ މާއްދާއަށް އިސްލާހު ގެނައުމަށް މި ހިނގަމުންދާ މަޖިލިސް ދައުރަށް ބިލެއް ހުށަހެޅުމަށް ނިންމާފައިވާ ކަމަށެވެ.
އަދި، އެ ބިލު އެކުލަވާލުމުގެ ގޮތުން ރާއްޖޭގެ ކޯޓުތަކާއި ޖޭއެސްސީ އާއި އެ ނޫން ކަމާގުޅޭ އެންމެހާ އިދާރާތަކާ މަޝްވަރާ ކުރާނެ ކަމަށް ވެސް އޭޖީ އޮފީހުން ބުނެފައިވެ އެވެ.
