މި މަހުގެ 16 ވަނަ ދުވަހު ގުޅީފަޅުގައި ހިނގި އަލިފާނުގެ ހާދިސާއަށްފަހު އެ ސަރަހައްދު ސާފުކުރަނިކޮށް ދެ ފަހަރެއްގެ މަތިން ފެނުނު މިނި ކަށިތަކަކީ އެކެއްގެ ކަށިތަކެއް ކަމަށް ބެލެވޭ ކަމަށް ފުލުހުން ބުނެފި އެވެ.
މި މައްސަލައިގައި މިއަދު "އަދަދު" އިން ސުވާލުކުރުމުން ފުލުހުންގެ މީޑިއާ އޮފިޝަލް ވިދާޅުވީ، ދެ ފަހަރު ފެނުނު ކަށިތައް ވެސް ފެނިފައިވަނީ އެއް ސަރަހައްދަކުން ކަމުން އެއީ އެކެއްގެ ކަށިތަކެއް ކަމަށް ބެލެވޭ ކަމަށެވެ. ނަމަވެސް ކަށަވަރު ޖަވާބެއް ލިބޭނީ ތަހުލީލުތަކަށް ފަހު ކަމަށް ވިދާޅުވި އެވެ.
އެ ސަހަރަހައްދުން މިނި ކަށިތަކެއް ފެނިފައިވަނީ އަލިފާން ރޯވި ބްލޮކުގައި ދިރިއުޅުނު އެކަކު ގެއްލިގެން ހޯދުމުގެ މަސައްކަތް ވެސް ކުރަމުން ދަނިކޮށެވެ. މީގެ ކުރިން ފުލުހުން ބުނީ ފެނުނު ކަށިތަކަކީ ގެއްލިގެން ހޯދަމުންދާ މީހާގެ ހަށިގަނޑުގެ ބައިތަކެއްތޯ ކަށަވަރު ކުރުމަށް ކުރަން ޖެހޭ ތަހުލީލުތައް ކުރަމުންދާ ކަމަށް ފުލުހުން ބުންޏެވެ.
ގުޅީފަޅުގައި އަލިފާން ރޯވީ ތިލަ-މާލެ ބުރިޖުގެ މަސައްކަތް ކުރާ އިންޑިއާގެ އެފްކޮންސް ކުންފުނީގެ މުވައްޒަފުން ދިރިއުޅެމުންދިޔަ ބްލޮކެއްގަ އެވެ. އެ ހާދިސާގައި އެކިވަރުގެ އަނިޔާވެގެން 78 މީހަކު ހޮސްޕިޓަލްތަކަށް ގެންގޮސް ފަރުވާދީފައިވެ އެވެ. އޭގެތެރެއިން، 32 މީހަކު ފަރުވާ ދިނުމަށް އެނދުމަތި ކުރެވުނުއިރު، ކުދި އަނިޔާވި 24 މީހަކަށް ފަރުވާ ދިނުމަށް ފަހު ވަނީ ދޫކޮށްލާފަ އެވެ.
މި ހާދިސާއާ ގުޅިގެން އެފްކޮންސްއިން ފުރަތަމަ ނެރުނު ބަޔާނުގައި ބުނީ އެތަނުގައި ދިރިއުޅެމުންދިޔަ އެންމެން ސަލާމަތް ކުރެވުނު ކަމަށެވެ. ނަމަވެސް އަލުން އެތަނުގައި ދިރިއުޅެމުން އައި މީހުންގެ އަދަދު ބެލުމުން އެކަކު މަދުކަން ފާހަގަ ކުރެވިގެން ފުލުހުންނަށާއި ސިފައިންނަށް ރިޕޯޓު ކުރިކަން ހާމަކުރި އެވެ.
