މެންޗެސްޓާ (ޑިސެމްބަރު 22) - އިނގިރޭސި ލީގު ކަޕް (ކަރަބާއޯ ކަޕް)ގައި ރޭ ކުޅުނު މެޗުން ބާންލީ އަތުން 2-0 އިން މޮޅުވެ، މެންޗެސްޓާ ޔުނައިޓެޑް މުބާރާތުގެ ކުއާޓާ ފައިނަލުން ފުރުސަތު ހޯދިއިރު، ޗާލްޓަން އަތުން ޕެނަލްޓީ ޖަހައިގެން 4-3 އިން ބަލިވެ، ބްރައިޓަން މުބާރާތުން ކަޓައިފި އެވެ.
ގަތަރު ވޯލްޑް ކަޕަށް އިނގިރޭސި ފުޓްބޯޅަ ސީޒަން މެދުކަނޑާލުމަށް ފަހު، އަލުން ފެށީ ލީގު ކަޕް މެޗުތަކުންނެވެ. ޔުނައިޓެޑުން ވޯލްޑް ކަޕަށް ފަހު ކުޅުނު ރަސްމީ ފުރަތަމަ މެޗުގައި އެ ޓީމުގެ ކޯޗު އެރިކް ޓެން ހާގް ވަނީ ފުރަތަމަ އެގާރައިން ވޯލްޑް ކަޕްގައި ކުޅުނު ފަސް ކުޅުންތެރިއަކަށް ފުރުސަތު ދީފަ އެވެ.
ޔުނައިޓެޑްގެ އޯލްޑް ޓްރެފޯޑް ސްޓޭޑިއަމްގައި ރޭ ކުޅުނު މެޗުގައި އެ ޓީމުން ލީޑުނެގީ 27 ވަނަ މިނިޓްގައި ކްރިސްޓިއަން އެރިކްސަން ޖެހި ގޯލުންނެވެ. އޭރިއާތެރެއަށް ޔުނައިޓެޑްގެ ޕޯޗުގީސް މިޑްފީލްޑަރު، ބްރޫނޯ ފެނާންޑޭސް މަތިން ނެގި ބޯޅައެއް ހޯދައި، ވެއްޓިގެންފައި، އާރޮން ވަން ބިސާކާ ގޯލު ކުރިމައްޗަށް ނަގައިދިން ހުރަސް، އެރިކްސަން ވަނީ ފަސޭހައިން ގޯލަށް ވައްދާލައިފަ އެވެ.
މެންޗެސްޓާ ސިޓީގެ ކުރީގެ ކެޕްޓަން، ވިންސެންޓް ކޮމްޕެނީގެ ކޯޗުކަމުގައި ކުޅޭ ބާންލީ އަށް އެއްވަރުކޮށްދޭން މެނުއަލް ބެންސަން އޭރިއާ ރޮނގުކައިރިން ޖެހި ބޯޅަ ޔުނައިޓެޑްގެ ގޯލު ބެލެހެއްޓި، މާޓިން ޑުބްރާވްކާ ވަނީ މަތަކޮށްފަ އެވެ. އޭގެ ފަހުން، ހިލޭ ޖެހުމެއްގައި ޑުބްރާވްކާ އަތުން ގެއްލުނު ބޯޅައެއް ޔުނައިޓެޑްގެ ގޯލަށް ވަނުމުގެ ކުރިން ސަލާމަތްކުރީ ކަސެމީރޯ އެވެ.
ޔުނައިޓެޑަށް ލީޑުފުޅާކޮށްދޭން ފުރަތަމަ ހާފުގައި އޭރިއާތެރެއިން އެ ޓީމުގެ ފޯވާޑް، އެންތަނީ މާޝިއާލް ޖެހި ޝޮޓް، ބާންލީގެ ކީޕަރު ޕީކޮކް ފެރަލް ވަނީ މަތަކޮށްފަ އެވެ. ޔުނައިޓެޑްގެ ދެ ވަނަ ގޯލު ޖެހީ މެޗުގެ 57 ވަނަ މިނިޓްގައި މާކަސް ރެޝްފޯޑް އެވެ. އަމިއްލަ ހާފުގެ ތެރެއިން ބޯޅަ ހިފައިގެން ގޮސް، އޭރިއާތެރެއަށް ވަދެ، ރެޝްފޯޑް ވަނީ ގޯލުގެ ދުރު ކަނަށް ބޯޅަ ފޮނުވާލައިފަ އެވެ.
މެޗުގެ ފަހު ވަގުތުގައި ގޯލު ޖަހަން ބާންލީ އަށް ލިބުނު ދެ ފުރުސަތުގެ ބޭނުން ނުހިފުނެވެ. ބާންލީގެ ޑާކޯ ޗުލިނޯފް އާއި އެޝްލީ ބާންސް ޖެހި ބޯޅަތައް ދިޔައީ ގޯލާ ސީދާނުވެ ބޭރުންނެވެ.
ރޭ ޗާލްޓަން ދަނޑުގައި ބްރައިޓަންއާ ކުޅުނު މެޗު ނިމުނުއިރު، 0-0 އިން އެއްވަރުވެފައި އޮތުމުން ޕެނަލްޓީ ޖަހައިގެން މޮޅުވީ ޗާލްޓަން އެވެ. އަދި ބްލެކްބާން ރޯވާސް ދަނޑުގައި 4-1 އިން މޮޅުވެ، ނޮޓިންހަމް ފޮރެސްޓް ވަނީ 1994 ވަނަ އަހަރަށް ފަހު ފުރަތަމަ ފަހަރަށް ލީގު ކަޕްގެ ކުއާޓާ ފައިނަލުން ފުރުސަތު ހޯދައިފަ އެވެ.
