ޕެރިސް (ޑިސެމްބަރު 22) - މި ސީޒަނުގެ ނިޔަލަށް ޕީއެސްޖީގެ ކޮންޓްރެކްޓްގައި ހުރި ލިއޮނަލް މެސީ، އެ ޓީމުގައި އިތުރު އެއް އަހަރު މަޑުކުރަން އެއްބަސްވުމަކަށް އަތުވެފައިވާ ކަމަށް މީޑިއާ ރިޕޯޓްތައް ބުނެފި އެވެ.
ކޮންޓްރެކްޓް އާ ނުކުރާނަމަ އަންނަ މަހު ހުޅުވޭ ފިނި މޫސުމުގެ ޓްރާންސްފާ މާކެޓްގައި، މެސީ އަށް ބޭނުން ކްލަބަކާ އެކު ޕްރީ އެގްރީމަންޓެއްގައި ސޮއިކުރެވޭނެ އެވެ. އެއީ ޖުލައި އެއް ވަނަ ދުވަހު ރަސްމީކޮށް އެ ޓީމަކާ ކުޅޭ ގޮތަށެވެ.
ދާދި ފަހުން، ގިނަ ރެކޯޑްތަކާ އެކު، ފީފާ ވޯލްޑް ކަޕްގެ ޗެމްޕިިއަންކަން ހޯދި އާޖެންޓީނާގެ ކެޕްޓަން، މެސީ، 35، މި ފަހަރުގެ ވޯލްޑް ކަޕަށް ދިއުމުގެ ކުރިން ވެސް ޕީއެސްޖީން އޮތީ އޭނާއާ އެކު ކޮންޓްރެކްޓް އާ ކުރުމުގެ މަޝްވަރާތައް ފަށައިފަ އެވެ.
ބާސެލޯނާގެ މާލީ ހާލަތު ގޯސްވެގެން، މިދިޔަ އަހަރު އެ ޓީމަށް ޖެހުނީ މެސީ ދޫކޮށްލާށެެެވެ. މެސީ ލައްވައި އާ ކޮންޓްރެކްޓެއްގައި ސޮއިކުރަން ބާސެލޯނާ އިން ބެލިއިރު، އެންމެ ބޮޑު މައްސަލަ އަކަށް އޭރު ދިމާވީ ބާސެލޯނާގެ ހުރިހާ ކުުޅުންތެރިިންގެ ޖުމްލަ މުސާރަ އިންތިހާ އަށް ބޮޑުވެފައިވުމެވެ.
ބާސެލޯނާގެ މާލީ ހާލަތު ރަނގަޅުވެ، މި ސީޒަނަށް ފަހު ހިލޭ ޓްރާންސްފާއެއްގައި މެސީ ގަންނަން އެ ކްލަބުން ޝައުގުވެރިކަން ފާޅުކޮށްފައިވަނިކޮށް މެސީ، މިހާރު ނިންމާފައިވަނީ ޕީއެސްޖީގައި އިތުރު އެއް އަހަރު މަޑުކުރުމަށް ކަމަށް ޕީއެސްޖީއާ ހަވާލާދީ ގިނަ މީޑިއާތަކުން އަންނަނީ ރިޕޯޓްކުރަމުންނެވެ.
މެސީގެ ސޮއި ހޯދަން ޑޭވިޑް ބެކަމްގެ ހިއްސާ އޮންނަ، އެމެރިކާ ލީގު، މޭޖަ ލީގު ސޮކާގެ ކްލަބް، އިންޓަ މިއާމީން ވެސް މަސައްކަތް ކުރި އެވެ. އެކަމަކު، ޕީއެސްޖީގެ ރައީސް ނާސިރު އަލް-ހެއްލާފީގެ އެދުމުގެ މަތިން، މެސީ އެ ކްލަބްގައި އިތުރު އެއް ސީޒަނަށް މަޑުކުރަން ނިންމާފައިވާ ކަމަށް ފްރާންސްގެ ނޫސްތަކުން ވަނީ ރިޕޯޓްކޮށްފަ އެވެ.
އެހެން ނަމަވެސް، އިތުރު އެއް އަހަރަށް މެސީ، ޕީއެސްޖީގައި މަޑުކުރަނީ މިހާރު ހުރި މުސާރަ އަށް ވުރެ ބޮޑުކޮށް ކަމެއް އަދި ކަށަވަރެއްނުވެ އެވެ.
ޕީއެސްޖީއާ އެކު، މިދިޔަ އަހަރު މެސީ ސޮއިކުރީ ދެ އަހަރުގެ ކޮންޓްރެކްޓެއްގައި، އެ ޓީމަށް ކުޅޭ ކޮންމެ އަހަރަކަށް ވެސް، މުސާރައިގެ ގޮތުގައި 25 މިލިއަން ޕައުންޑް (34 މިިލިއަން ޑޮލަރު) ދޭނެ އެވެ. މިއީ ޓެކްސްގެ ބައި ފުރިހަަމަ ކުރުމަށް ފަހު މެސީ އަށް ލިބޭނެ މުސާރަ އެވެ.
މިދިޔަ ސީޒަނުގައި މެސީ އަށް ޕީއެސްޖީ ޖޯޒީގައި މޮޅު ކުޅުން ދައްކަން އުނދަގޫވި ނަމަވެސް މި ސީޒަނުގައި އޭނާ އަންނަނީ ތަފާތު ފޯމެއްގައި ކުޅެމުންނެވެ. ޕީއެސްޖީއާ އެކު މި ސީޒަނުގައި މެސީ ވަނީ 19 މެޗުން 12 ގޯލު ޖަހައި، 14 ގޯލު ޖަހަން ފުރުސަތު ތަނަވަސްކޮށްދީފަ އެވެ. ވޯލްޑް ކަޕްގެ މޮޅު ކުޅުންތެރިއަކަށް މެސީ ހޮވުނީ އާޖެންޓީނާ ކުޅުނު މެޗުތަކުގައި ހަތް ގޯލު ޖަހައި، ތިން ގޯލު ޖަހަން ފުރުސަތު ތަނަވަސްކޮށްދީ، ފަސް މެޗުގެ މޮޅު ކުޅުންތެރިޔާގެ މަގާމު ހޯދައިގެންނެވެ.
