އަފްގާނިސްތާނުގައި އަންހެނުންނަށް ޔުނިވާސިޓީތައް ބަންދުކޮށްފައިވާ ކަމަށް އެ ގައުމުގެ ހަޔާ އެޑިއުކޭޝަން މިނިސްޓަރުގެ ސިޓީއެއްގައި ބުނެފި އެވެ.
އެ ސިޓީގައި ބުނީ އަންހެނުންނަށް ޔުނިވާސިޓީތައް ބަންދުކުރީ ވަކި ގޮތެއް އަންގަން ދެން ކަމަށެވެ. ބެލެވޭ ގޮތުގައި އެ ސިޓީ ނެރުނު ވަގުތުން ފެށިގެން އަންހެނުން ޔުނިވާސިޓީތަކަށް ދިޔުން މަނާ ވާނެ އެވެ.
ޔުނިވާސިޓީތައް އަންހެނުންނަށް ބަންދުކޮށްފައިވާ އިރު، ފުރާވަރު އުމުރުގެ ކުދިންނަށް ހާއްސަ ސެކަންޑަރީ ސްކޫލް ތައުލީމުން އަންހެން ކުދިން މަހުރޫމްކޮށްފައި އޮންނަތާ އަހަރެއް ވެއްޖެ އެވެ.
ޔުނިވާސިޓީތަކުގައި ތައުލީމް ހާސިލް ކުރަން ބޭނުންވާ އެތައް ހާސް އަންހެނުންނާއި އަންހެން ކުދިން، ޔުނިވާސިޓީ އެންޓްރަންސް އިމްތިހާން ހެދީ މީގެ އެންމެ ތިން މަސް ކުރިންނެވެ.
އެހެން ނަމަވެސް، އަންހެން ދަރިވަރުންނަށް ކިޔެވޭނެ ދާއިރާތައް ލިމިޓްކުރި އެވެ. އެގޮތުން ވެޓެރިނަރީ ސައިންސް، އިންޖިނިއަރުން، އިކޮނޮމިކްސް، ދަނޑުވެރިކަން އަދި ނޫސްވެރިކަމުގެ ދާއިރާއިން ކިޔެވުން މަނާކުރި އެވެ.
މިދިޔަ އަހަރު ތާލިބާނުން ވެރިކަމަށް އައުމަށް ފަހު ޔުނިވާސިޓީތައް ބަދަލުކުރީ ދެ ޖިންސުގެ ދަރިވަރުން ވަކިން ކިޔަވަން ޖެހޭ ގޮތަށެވެ. އެގޮތުން އަންހެނުންނާއި ދިރިހެނުންނަށް ވަކި ގޭޓުތަކާ ކްލާސްތައް ހަމަޖެއްސި އެވެ.
އަންހެން ދަރިވަރުންނަށް ކިޔަވައިދެވޭނީ ހަަމައެކަނި އަންހެން ޕްރޮފެސަރުން ނުވަތަ އުމުރުން ދުވަސްވީ ފިރިހެން ޕްރޮފެސަރުން ކަމަށް ވެސް ކަނޑައެޅި އެވެ.
އެމެރިކާ އާއި ހުޅަނގުގެ ގައުމުތަކުން ބުނެފައި ވަނީ ތާލިބާން ސަރުކާރު ބަލައިގަތުމާ މެދު ވިސްނަން ފެށޭނީ އަންހެން ދަރިވަރުންނަށް ތައުލީމުގެ ހައްގު ދިނުމުން ކަމަށެވެ.
