ތައިލޭންޑްގެ ސިފައިން މަނަވަރެއް ބަންޑުން ޖަަހާލައި ގެއްލުނު 30 މީހުން ހޯދުމުގެ މަސައްކަތް އަދިވެސް ކުރިއަށް އެބަދެ އެވެ.
ބޯޓުން ގެއްލުނު ބައެއް މީހުން ކަނޑުމަތީގައި އެތައް ގަޑިއިރު ހޭދަކުރި ފަހުން ސަލާމަތްކޮށްފައިވެ އެވެ. އޭގެ ތެރެއިން ބައެއް މީހުން ފެނުނު އިރު ހޭވެރިކަމެއް ނެތެވެ.
އެޗްޓީއެމްއޭއެސް ސުހޮތައި ބަންޑުން ޖަހާލީ އާދީއްތަ ދުވަހުގެ ރޭ 105 މީހުންނާ އެކު އެވެ. ތޫފާނެއްގެ ތެރެއިން ބޯޓުގެ ތެރެއިން ބިޔަ ރާޅު އަރައި، ފެންބޮޑުވި ކަމަށް ބެލެވެ އެވެ.
މިހާތަނަށް 75 މީހުން ސަލާމަތްކޮށްފައިވާ އިރު، ގެއްލުނު މީހުން ހޯދުމަށް ބޯޓުތަކާއި ހެލިކޮޕްޓަރުތައް ދަނީ ގަލްފް އޮފް ތައިލޭންޑް ސަރަހައްދު ބަލަމުންނެވެ.
ހޯމަ ދުވަހުގެ ރޭ ތައިލޭންޑްގެ ނޭވީ ކޮމާންޑަރަކު ވިދާޅުވީ ލައިފް ޖެކެޓާއި ފްލޯޓްވުމަށް ބޭނުން ކުރާ ޑިވައިސްތަކާ އެކު ކަނޑުވި މީހުން ދިރިތިއްބައި ސަލާމަތް ކުރުމަށް 48 ގަޑިއިރު ލިބޭ ކަމަށެވެ.
"އެހެންވީމާ އަންގާރަ ދުވަސް ވަރަށް މުހިއްމު. އެ މީހުން ސަލާމަތް ކުރުމަށް ކުރެވެން ހުރި ހުރިހާ ކަމެއް ކުރާނަން،" ވައިސް އެޑްމިރަލް ޕިޗައި ލޯޝުސަކުލް ވިދާޅުވި އެވެ.
