ގަލްފް އޮފް ތައިލޭންޑްގައި އުފެދުނު ތޫފާނެއްގެ ތެރެއިން އެ ގައުމުގެ ސިފައިންގެ މަނަވަރެއް ބަންޑުން ޖަހާލައި 100 އަށް ވުރެ ގިނަ މީހުން ކަނޑުވެއްޖެ އެވެ.
އާދީއްތަ ދުވަހުގެ ހިނގި ހާދިސާގައި ގިނަ ބަޔަކު ސަލާމަތްކޮށްފައިވާ އިރު، އަދިވެސް 28 މީހުން ތިބީ ކަނޑުވެފައި ކަމަށް ކަމާ ބެހޭ އިދާރާތަކުން ބުންޏެވެ.
އެޗްޓީއެމްއޭއެސް ސުހޮތައި ބޯޓު އަޑިއަށް ދިޔަ ނަމަވެސް، އެއްވެސް މީހަކު މަރުވިކަމުގެ ރިޕޯޓެއް ނުލިބެ އެވެ. އެކަމަކު ތިން މީހެއްގެ ހާލު ސީރިއަސް އެވެ.
އޮފިޝަލުން ބުނީ ބޯޓު ބަންޑުން ޖަހާލައި އަޑިއަށް ދިޔައީ އޭގެ ތެރެއަށް ރާޅު ޖަހައި ފެންބޮޑުވެ، އިންޖީނު ކޮޓަރީގައި ޝޯޓް ސާކިޓްވުމަށް ފަހު ކަމަށެވެ.
ކަރަންޓު ކެނޑުމުން ބޯޓުގައި ތިބި މީހުން މަސައްކަތް ކުރީ ބޯޓު ކޮންޓްރޯލް ކުރެވޭތޯ އެވެ. އެހެން ނަމަވެސް އާދީއްތަ ދުވަހުގެ ރޭގެ ވަގުތެއްގައި ބޯޓު އަރިއަޅާލައި ބަންޑުންވީ އެވެ.
އެ ހާދިސާ ހިނގި އިރު، އެ ބޯޓު އުޅުނީ ޕްރަޗައުޕް ހިރީ ހާން ޕްރޮވިންސްގެ ބަންގް ސަފަން ޑިސްޓްރިކްޓްއާ 32 ކިލޯމީޓަރު ދުރުން ކަނޑުތައް ޕެޓްރޯލް ކުރުމަށެވެ.
ބޯޓު ބަންޑުން ޖަހާލުމުގެ ކުރިން އެހީވުމަށް ތިން ސިފައިންގެ ބޯޓާއި ހެލިކޮޕްޓަރުތައް ފޮނުވި އެވެ. އެކަމަކު ބަންޑުން ޖަހާލުމުގެ ކުރިން އެ ހިސާބަށް ފޯރީ އެންމެ ބޯޓެކެވެ. އެ ބޯޓުން 78 މީހުން ސަލާމަތް ކުރި އެވެ.
