ތައިލޭންޑް ރަސްގެފާނުގެ ދޮށީ ދަރިކަނބަލުންނަށް ހިތުގެ މައްސަލައެއް ދިމާވެ ކުއްލި ގޮތަކަށް ވެއްޓި ވަޑައިގަތުމުން ފަރުވާ ދޭން ފަށައިފި އެވެ.
ތައިލޭންޑްގެ ޝާހީ ގަނޑުވަރުން ބުނީ އަމީރާ ބަޖްރަކިތިޔަބާ ވެއްޓި ވަޑައިގަތީ ބުދަ ދުވަހުގެ ރޭ އިރުއުތުރު ބެންކޮކްގައި އެކަމަނާގެ ކުއްތާތައް ތަމްރީން ކުރުމުގައި އުޅުއްވަނިކޮށް ކަމަށެވެ.
އުމުރުފުޅުން 44 އަހަރުގެ އަމީރާއަކީ ރަސްގެފާނު ވަޖިރަލޮންގްކޯންގެ އެންމެ ދޮށީ ދަރިކަނބަލުންނެވެ. ކައިރި ހޮސްޕިޓަލެއްގައި ފަރުވާ ދެއްވުމަށް ފަހު، ހެލިކޮޕްޓަރުގައި އެކަމަނާ ބަދަލުކުރީ ބެންކޮކްގެ ހެލްތު ފެސިލިޓީ އަކަށެވެ.
ޝާހީ ގަނޑުވަރުން ބުނީ އެކަމަނާގެ ހާލުކޮޅު "ކޮންމެވެސް ވަރަކަށް ސްޓޭބަލް" ކަމަށެވެ. ގަނޑުވަރުން ނެރުނު ބަޔާނުގައި އިތުރު ތަފްސީލެއް ނެތެވެ. އެހެން ނަމަވެސް ބައެއް ރިޕޯޓުތައް ބުނާ ގޮތުން އެކަމަނާގެ ހާލުކޮޅު ސީރިއަސް އެވެ.
އަމީރާ ބަޖްރަކިތިޔަބާ، ރަސްގެފާނުގެ އެންމެ އަރިސް ބޭފުޅުންގެ ތެރޭގައި ހިމެނިވަޑައިގަންނަވަ އެވެ. އެކަމަނާއަކީ ރަސްގެފާނުގެ ޕާސަނަލް ގާޑުގައި އިސް އޮފިސަރެކެވެ.
ތައިލޭންޑްގެ ޝާހީ އާއިލާގެ ތެރޭގައި ތައުލީމީ ގޮތުން އެންމެ ގިނަ ކާމިޔާބީތައް ހޯއްދަވާފައިވާ ބޭފުޅުންގެ ތެރޭގައި އެކަމަނާ ހިމެނިވަޑައިގަންނަވަ އެވެ. އެގޮތުން އެމެރިކާގެ ދެ ޔުނިވާސިޓީއަކުން ގްރެޖުއޭޓް ޑިގްރީ ހާސިލްކުރެއްވި އެވެ.
ތައިލޭންޑުގެ ވަލީ އަހުދުގެ ގޮތުގައި ރަސްގެފާނު އެއްވެސް ފަަރާތެއްގެ ނަން އިއުލާނު ކުރައްވާފައެއް ނުވެ އެވެ. އެހެން ނަމަވެސް ގިނަ ބަޔަކު ދެކޭ ގޮތުގައި ރަސްގެފާނަށް ފަހު ތަހުތު ލިބިވަޑައިގަންނަވާނީ އަމީރާ ބަޖްރަކިތިޔަބާ އަށެވެ.
