ޔޫރޮޕިއަން ޕާލަމެންޓްގެ ކުރީގެ ނައިބު ރައީސް އީވާ ކައިލީއަށް ކުރާ ކޮރަޕްޝަންގެ ތުހުމަތުތައް ދޮގުކުރައްވައިފި އެވެ.
ބެލްޖިއަމްގެ ދެ ގެޔަކާއި ފޮއްޓަކުން 1.5 މިލިއަން ޔޫރޯ ފެނުމުން ހައްޔަރު ކުރި ހަތަރު މީހުންގެ ތެރޭގައި ގްރީސްއަށް ނިސްބަތްވާ އީވާ ކައިލީ ހިމެނެ އެވެ. އެއީ ގަތަރުން އީޔޫ ޕާލަމެންޓް މެމްބަރަކަށް ނުފޫޒު ފޯރުވަން އުޅުނު ކަމަށް ބުނާ މައްސަލައެކެވެ.
އީޔޫ ޕާލަމެންޓުގައި ނެގި ވޯޓަކުން، އޭނާ ނައިބު ރައީސްކަމުން ދުރުކުރުމަށް ވަނީ ނިންމައިފަ އެވެ. އެ ޕާލަމެންޓުގައި 14 ނައިބު ރައީސުން ތިބެ އެވެ.
ޕާލަމެންޓުގެ ރައީސް ރޮބޭޓާ މެޓްސޯލާ ވިދާޅުވީ މިއީ "ޔޫރޮޕްގެ ޑިމޮކްރަސީއަށް އުނދަގޫ ދުވަސްތަކެއް" ކަމަށެވެ. ގަތަރުން ތުހުމަތުތައް ދޮގުކުރެ އެވެ.
"އީވާ ކައިލީގެ ކުށެއް ނެތް ކަމާއި ގަތަރުން ރިޝްވަތު ހިފުމާ އޭނާއާ ގުޅުމެއް ނުވާ ކަމަށް ތަކުރާރުކޮށް ފާހަގަކުރި،" ގާނޫނީ ވަކީލް ވިދާޅުވި އެވެ.
އީވާ ކައިލީގެ އިތުރުން ތުހުމަތު ކުރެވޭ ތިން މީހަކާ ދެކޮޅަށް ބެލްޖިއަމްގައި ވަނީ ދައުވާ އުފުލައިފަ އެވެ. އުފުލި ދައުވާތަކަކީ "ޖިނާއީ ހަރަކާތް ރާވައި ހިންގުމާއި، ކޮރަޕްޝަނާއި، މަނީ ލޯންޑަރިން" އެވެ.
އެކަމުގެ މައުލޫމާތު އޭއެފްޕީއާ ހިއްސާކުރި މަސްދަރަކުން ބުނީ އެއީ 2004 އިން 2019 އަށް އިޓަލީގެ ސޯޝަލިސްޓް އެމްޕީއަކަށް ރިޝްވަތު ދޭން ގަތަރުން ކުރި މަސައްކަތާ ގުޅުން ހުރި މައްސަލައެއް ކަމަށެވެ.
