ވޮޝިންޓަން، އެމެރިކާ (ޑިސެމްބަރު 13) - މެސެންޖާ އާރްއެންއޭ ޓެކްނޮލޮޖީ ބޭނުންކޮށްގެން ހަމުގެ ކެންސަރުގެ ބަލި މީހުންނަށް ހާއްސަ "ޕާސަނަލައިޒްޑް" ވެކްސިން އުފައްދައި، އޭގެ ތަހުލީލުން ރަނގަޅު ނަތީޖާތަކެއް ލިބިފައިވާ ކަމަށް މޮޑާނާ އާއި މާކް ކުންފުނިން ބުނެފި އެވެ.
އެމްއާރްއެންއޭ ޓެކްނޮލޮޖީއަކީ ކޮވިޑް ވެކްސިން އުފެއްދުމުގައި މުހިއްމު ޓެކްނޮލޮޖީ އެކެވެ. އެ ޓެކްނޮލޮޖީގެ އެހީގައި އެހެން ވައިރަސްތަކާއި ކެންސަަރު ފަދަ ބަލިތަކާ ދެކޮޅަށް ކުރިއެރުން ހޯދިދާނެ ކަމަށް ސައިންސްވެރިން ދެކޭތާ އަހަރުތަކެއް ވެއްޖެ އެވެ.
ހަމުގެ ކެންސަރަށް އުފެއްދި ވެކްސިންގެ އެންމެ ފުރަތަމަ ތަހުލީލުގައި 150 މީހުން ބައިވެރިވި އެވެ. އެއީ ސާޖަރީ ހަދައި މެލަނޯމާ ޓިޔުމަރް ނަގާފައިވާ މީހުންނެވެ. ހަމުގެ ކެންސަރަށް ފަރުވާއެއްގެ ގޮތުގައި ބޭނުން ކުރާ "ކެއިޓްރުޑާ"އާ އެކު އެ މީހުންނަށް ވެކްސިންގެ ނުވަ ޑޯޒް ދިނެވެ.
ތަހުލީލުން ދެއްކި ގޮތުގައި މަރުވުމާއި އަލުން ކެންސަރު ފެތުރުމުގެ ފުރުސަތު 44 ޕަސެންޓް ކުޑަވެ އެވެ. ތަހުލީލުގެ ފުރިހަމަ ނަތީޖާ ވަރަށް އަވަހަށް ޝާއިއުކުރާނެ އެވެ. ވެކްސިންގެ ތަހުލީލުގެ ތިން ވަަނަ މަރުހަލާ 2023 ގައި ފަށަން ރާވާފައިވާ އިރު، އެ މަރުހަލާގައި ގިނަ އަދަދެއްގެ މީހުން ބައިވެރިވާނެ އެވެ.
މެސެންޖާ އާރްއެންއޭއަކީ ސެލްތަކުގެ ތެރޭގައިވާ މޮލެކިޔުލް އެކެވެ. އެ މޮލެކިޔުލްގައި ހިމެނެނީ ޕްރޮޓީން އުފައްދަން ބޭނުންވާ މައުލޫމާތެވެ. ހަށިގަނޑުގައި ވަކި ވައިރަހެއް ނުވަތަ ބައްޔަކާ ދެކޮޅަށް ހަނގުރާމަ ކުރާނެ ޕްރޮޓީން އުފެއްދުމަށް، އެ މޮލެކިޔުލް ޑިޒައިން ކުރުމުގެ ގާބިލްކަން ސައިންސްވެރިން ވަނީ ހޯދައިފަ އެވެ.
މެލަަނޯމާއަކީ ހަމުގެ ކެންސަރުގެ އެންމެ ނުރައްކާތެރި ބާވަތެވެ. އެ ބަލީގެ މުޅިން 325،000 ކޭސް 2020 ވަނަ އަހަރު އެކަނިވެސް ރިޕޯޓުކުރި އެވެ. ރިޕޯޓުތައް ބުނާ ގޮތުން 2022 ވަނަ އަހަރު އެ ބަލީގައި 8000 މީހުން މަރުވާނެ ކަމަށް ލަފާކުރެވެ އެވެ.
