ސްޓްރެސްބޯގް، ފްރާންސް (ޑިސެމްބަރު 12) - ޔޫރަޕްގެ ޑިމޮކްރަސީ އޮތީ ނުރައްކަލަށް ހުށަހެޅިފައި ކަމަށް ޔޫރަޕިއަން ޔޫނިއަން (އީޔޫ) ޕާލަމެންޓުގެ ރައީސް ރޮބޭޓާ މެޓްސޯލާ ވިދާޅުވެއްޖެ އެވެ.
އޭނާ އެހެން ވިދާޅުވީ އެ ޕާލަމެންޓުގެ ނައިބު ރައީސް އީވާ ކައިލީ ކޮރަޕްޝަންގެ ތުހުމަތުގައި ބެލްޖިއަމްގައި ހައްޔަރު ކުރުމާ ގުޅިގެންނެވެ. އެއީ ގަތަރުން އީޔޫ ޕާލަމެންޓް މެމްބަރަކަށް ނުފޫޒު ފޯރުވަން އުޅުނު ކަމަށް ބުނާ މައްސަލައެކެވެ.
"މިކަން އޮޅުވާނުލާތި. ޔޫރޮޕްގެ ޕާލަމެންޓަށް އެ ދަނީ ހަމަލާދެމުން. ޔޫރޮޕްގެ ޑިމޮކްރަސީއަށް އެ ދަނީ ހަމަލާދެމުން. އަޅުގަނޑުމެންގެ މިނިވަން، ހުޅުވާލެވިފައިވާ މުޖުތަމައުތަކަށް އެ ދަނީ ހަމަލާދެމުން،" ޕާލަމެންޓް މެމްބަރުންނާ މުހާތަބު ކުރައްވައި މެޓްސޯލާ ވިދާޅުވި އެވެ.
ގްރީސްއަށް ނިސްބަތްވާ އީވާ ކައިލީގެ އިތުރުން ތުހުމަތު ކުރެވޭ ތިން މީހަކާ ދެކޮޅަށް ބެލްޖިއަމްގައި ވަނީ ދައުވާ އުފުލައިފަ އެވެ. އުފުލި ދައުވާތަކަކީ "ޖިނާއީ ހަރަކާތް ރާވައި ހިންގުމާއި، ކޮރަޕްޝަނާއި، މަނީ ލޯންޑަރިން" އެވެ.
ބެލްޖިއަމްގައި ހުންނ އީޔޫ ޕާލަމެންޓްގެ އިމާރާތައި ގެތަކެއް ބަލައި ފާސްކޮށް ގިނަ އަދަދެއްގެ ނަގުދު ފައިސާ ފުލުހުން ހޯދި އެވެ. ރިޝްވަތު ދީގެން އީޔޫ ޕާލަމެންޓް ނުފޫޒު ފޯރުވަން އުޅުނު ކަމަށް ކުރާ ތުހުމަތުތައް ގަތަރުން ދޮގުކުރެ އެވެ.
އެ މައްސަލައާ ގުޅިގެން އީޔޫ ޕާލަމެންޓްގެ ނައިބު ރައީސްގެ ޒިންމާތަކުން އީވާ ކައިލީ ވަނީ އެކަހެރިކޮށްފަ އެވެ. އޭނާ އެ މަގާމުން ދުރުކުރުމާ މެދު ވަރަށް އަވަހަށް ގޮތެއް ނިންމާނެ އެވެ. ޕާލަމެންޓް ތެރޭގައި ވަނީ ވަކި ތަހުގީގެއް ފަށައިފަ އެވެ.
