ކާބުލް، އަފްގާނިސްތާން (ޑިސެމްބަރު 12) - އަފްގާނިސްތާނުގެ ވެރިރަށް ކާބުލްގައި ހުންނަ ހޮޓަލަކަށް ހަމަލާދީ ތިން މީހުން މަރާލައިފި އެވެ.
ކާބުލް ލޮންގަން ހޮޓަލަކީ ޗައިނާ ވިޔަފާރިވެރިންގެ މެދުގައި މަގްބޫލް ހޮޓަލެކެވެ. އެ ތަނުގައި ބަޑި އާއި ގޮވުމުގެ އަޑުފަށްގަނޑު އިވުނު ކަމަށް ކައިރި ހިސާބުތަކުން މީހުން ރިޕޯޓުކުރި އެވެ.
މިދިޔަ އަހަރު ވެރިކަމަށް އައި ތާލިބާނުންނަށް ދިމާވެފައިވާ އެންމެ ބޮޑު އެއް ގޮންޖެހުމަކީ އިސްލާމިކް ސްޓޭޓް (އައިއެސް) ގެ ހަމަލާތަކެވެ.
އިޓަލީގެ ހިލޭ އެހީދޭ ޖަމިއްޔާ އެމެޖެންސީ އެންޖީއޯއިން ބުނީ ތިން މީހުން މަރުވެ 21 މީހުންނަށް އަނިޔާވި ކަމަށެވެ. އެ ޖަމިއްޔާގެ ހޮސްޕިޓަލެއް ހޮޓަލާ އެއް ކިލޯމީޓަރު ކައިރީގައި ހުރެ އެވެ.
ކާބުލް ފުލުހުންގެ ތަރުޖަމާން ބުނީ މަރުވީ ހަމަލާގެ ތުހުމަތު ކުރެވޭ ތިން މީހުން ކަމަށާއި ތުހުމަތު ކުރެވޭ ހަތަރު ވަނަ މީހަކު ހައްޔަރުކޮށްފައިވާ ކަމަށެވެ.
"ހޮޓަލުގައި ތިބި ހުރިހާ ގެސްޓުން ސަލާމަތް ކުރެވިއްޖެ. ބޭރު ގައުމެއްގެ އެއްވެސް މީހަކު މަރެއް ނުވޭ. އެކަމަކު ދެ މީހަކަށް އަނިޔާވި. އެއީ ސަލާމަތްވުމަށް އިމާރާތުން ފުންމާލުމުން،" ޒަބީހުﷲ މުޖާހިދް ބުންޏެވެ.
ޗައިނާ އާއި އަފްގާނިސްތާނުން 76 ކިލޯމީޓަރުގެ ދިގު ބޯޑަރެއް ހިއްސާކުރެ އެވެ. ޗައިނާއިން ތާލިބާން ސަރުކާރު ރަސްމީކޮށް ބަލައިނުގަތް ނަމަވެސް، ޗައިނާގެ ކޮންސިއުލޭޓް ބަންދުކޮށްފައެއް ނުވެ އެވެ.
