އިސްތަންބޫލް، ތުރުކީ (ޑިސެމްބަރު 11) - އުތުރު ސީރިއާއިން ކުރުދީ ސިފައިން "ސާފު ކުރުން" ވަރަށް މުހިއްމު ކަމަށް ތުރުކީގެ ރައީސް ތައްޔިބް އުރުދުގާން، ރަޝިއާގެ ރައީސް ލެޑިމިއަ ޕުޓިންއަށް ދަންނަވައިފި އެވެ.
މިދިޔަ ނޮވެމްބަރު މަހު އިސްތަންބޫލްގައި ހަ މީހުން މަރުވި ހަމަލާ ދިނީ ކުރުދީން ކަމަށް ބުނެ، އުތުރު ސީރިއާއަށް ސިފައިން ފޮނުވައި، އެ ތަނުގައި އުޅޭ ކުރުދީންނާ ދެކޮޅަށް ހަނގުރާމަ ކުރާނެކަމުގެ އިންޒާރު ތުރުކީއިން ދިނެވެ.
މީގެ ކުރިން ވެސް އެގޮތަށް އަސްކަރީ އޮޕަރޭޝަން ހިންގި އެވެ. އެގޮތުން 2019 ވަނަ އަހަރު ތުރުކީ ސިފައިން އެ ހިސާބުން ފޭބީ، ރަޝިއާއާ އެކު ހެދި އެއްބަސްވުމެއްގެ ދަށުން ސީރިއާ އާއި ތުރުކީގެ ބޯޑަރު ކައިރީގައި 30 ކިލޯމީޓަރުގެ "ސޭފް ޒޯން" ހަދައިގެންނެވެ. އެއީ ސީރިއާގައި އުޅޭ ކުރުދީން ފޮނުވާ ހަމަލާތައް ބޯޑަރު ހުރަސްކޮށް ތުރުކީއަށް ފޯރުން ހުއްޓުވުމުގެ ގޮތުން ހެދި އެއްބަސްވުމެކެވެ.
އެހެން ނަމަވެސް އުރުދުގާން ވިދާޅުވީ އެ އެއްބަަސްވުން ތަންފީޒް ކުރުމުގައި ރަޝިއާއިން ފެއިލްވެފައިވާ ކަމަށެވެ. ރަޝިއާއަކީ ސީރިއާގެ ހަމަނުޖެހުމުގައި މުހިއްމު ދައުރެއް އަދާ ކުރާ ގައުމެކެވެ. ރަޝިއާއިން ތާއީދު ކުރަނީ ސީރިއާގެ ރައީސް ބައްޝާރުލް އަސަދްގެ ފަޅިއަށެވެ.
އާދީއްތަ ދުވަހު ޕުޓިންއަށް ފޯނުން ގުޅުއްވައި އުރުދުގާން ވިދާޅުވީ "ބޯޑަރު ކައިރިން ހެދި ސޭފް ޒޯނުން ކުރުދީ ހަނގުރާމަވެރިން ސާފުކޮށްލުން ކޮންމެހެން ވެސް މުހިއްމު" ކަމަށެވެ.
އުތުރު ސީރިއާއަށް ތުރުކީގެ ސިފައިން ފޮނުވުން ހުއްޓުވުމަށް އެމެރިކާ އާއި ރަޝިއާއިން ވެސް ބޭނުންވެ އެވެ. އެހެންވެ ޑިޕްލޮމެޓިކް ގޮތުން އެ ގައުމަށް ޕްރެޝަރު ކުރުމަށް ދަނީ މަސައްކަތް ކުރަމުންނެވެ.
