ރާއްޖޭގެ ކުޅިވަރުގެ ބައްޕަގެ ގޮތުގައި ފާހަގަވެފައިވާ މަރުހޫމް ޒާހިރު ނަސީރުގެ ހަނދާނުގައި ކުރިއަށްގެންދިޔާ ޒާހިރު ނަސީރު މެމޯރިއަލް ބާސްކެޓްބޯޅަ ޗެމްޕިއަންޝިޕްގައި ކިންގްސް ކުޅުނު ފުރަތަމަ މެޗު ކާމިޔާބުކުރިއިރު، ރެޑްވިންގްސް އަތުން ޓީރެކްސް ބަލިވެއްޖެ އެވެ.
މަރުހޫމް ޒާހިރު ނަސީރު މެމޯރިއަލް ބާސްކެޓްބޯޅަ ޗެމްޕިއަންޝިޕަކީ ދާދި ފަހުން ނިމުނު އެމްބީއޭ ޗެމްޕިއަންޝިޕުގައި ރަނގަޅު ނަތީޖާ ނެރުނު ކުލަބާ އެކު މުޅިން އަލަށް ބާސްކެޓްބޯޅަ އެސޯސިއޭޝަން އޮފް މޯލްޑިވްސް އިން ކުރިއަށްގެންދާ މުބާރާތެކެވެ.
މިގޮތުން ފިރިހެން ބައިގައި ވާދަކުރަނީ އެމްބީއޭ ޗެމްޕިއަންޝިޕުގެ ތަށި ހޯދި ކިންގްސް ބީސީ އާއި ޓީރެކްސް ބީސީ އަދި ރެޑްވިންގްސް ބީސީ އެވެ. އަންހެން ބައިގައި ވާދަކުރަނީ ކުއީންސް ބީސީ އާއި ސައިކްލޯން ބީސީ އެވެ. މި ކުލަބުތަކާއިއެކު ކޮންމެ ޑިވިޝަނެއްގައި ސްރީ ލަންކާގެ ކުލަބެއް ކަމަށްވާ ބްލޫސް ބާސެކްޓްބޯޅަ ކުލަބުގެ އަންހެން އަދި ފިރިހެން ޓީމް ވެސް އަންނަނީ ވާދަކުރަމުންނެވެ.
މުބާރާތުގެ ކުޅުން ފެށީ އަންހެން ޑިވިޝަންގައި ސައިކްލޯން ބީސީ އާއި ލަންކާ ބްލޫސް ބީސީ ވާދަކުރި މެޗުންނެވެ. މި މެޗު ބްލޫސް އިން ކާމިޔާބުކުރީ 60-48 ޕޮއިންޓުންނެވެ. މި މެޗުގެ ކޮންމެ ކުއާޓާ އެއްގައި ވެސް ފެނުނީ ވަރަށް ވާދަވެރި ކުޅުމެކެވެ. ކުޑަ ތަފާތަކުން ތިން ކުއާޓާ އެއްގައި ބްލޫސް ލީޑުކުރިއިރު، ސައިކްލޯން އިން އެންމެ ރަނގަޅަށް ކުޅުނީ ތިންވަނަ ކުއާޓާގަ އެވެ.
ސައިކްލޯން ޓީމުން މި މެޗުގައި އެންމެ ރަނގަޅަށް ކުޅުނީ 11 ޕޮއިންޓު ހޯދައިދިން ކެޕްޓަން މަރިޔަމް ސޮފްވަ ހަސަން އެވެ. ބްލޫސް ޓީމަށް ބަލާއިރު އެޓީމްގެ ލިއާރާ ހެތިއަރާޗީ ވަނީ 20 ރީބައުންޑް ނަގައި އެޓީމަށް 14 ޕޮއިންޓް ސްކޯކޮށްދީފަ އެވެ.
ފިރިހެން ޑިވިޝަންގައި އިއްޔެ ކުޅުނު ދެ މެޗު ކާމިޔާބުކުރީ ކިންގްސް ބީސީ އާއި ރެޑްވިންގްސް ބީސީ އެވެ. ކިންގްސް މޮޅުވީ ލަންކާގެ ބްލޫސްއާ ވާދަކޮށް 92-66 އިންނެވެ. ރެޑްވިންގްސް މޮޅުވީ ޓީރެކްސް އަތުން 61-50 އިންނެވެ.
ކިންގްސް އާއި ބްލޫސް ކުޅުނު މެޗުގައި އެންމެ މޮޅު ކުޅުމެއް ދެއްކީ ކިންގްސްގެ އަހުމަދު ހުޝާމް (ތުއްބެ) އެވެ. ތުއްބެ ވަނީ 25 ޕޮއިންޓް އެޓީމަށް ސްކޯކޮށްދީފަ އެވެ. އަބަދުﷲ އަމްޒަރުވަނީ 18 ޕޮއިންޓް އެޓީމަށް ސްކޯކޮށްދީފަ އެވެ. ބްލޫސް އިން އެންމެ ރަނގަޅަށް ކުޅުނީ 15 ޕޮއިންޓް ހޯދައިދިން ކެޕްޓަން ސަންޖީވާ ކުލަމިނާ އެވެ.
ރެޑްވިންގްސް އާއި ޓީރެކްސް ކުޅުނު މެޗުގައި ފުރަތަމަ ކުއާޓާގައި ރެޑްވިންގްސް ލީޑެއް ނެގި އެވެ. ދެވަނަ ކުއާޓާގައި ޓީރެކްސް އިން ސްކޯގެ ފަރަގު ކުޑަކުރި ނަމަވެސް ފަހު ދެ ކުއާޓާގައި ރެޑްވިންގްސް ފެނުނީ ތަފާތު ބޮޑުކޮށެވެ.
މުހިންމު ބައެއް ކުޅުންތެރިން ނުލައި މި މުބާރާތަށް ނުކުތް ޓީރެކްސް އަށް އެންމެ ރަނގަޅު ކުޅުމެއް ދައްކައިދިނީ 16 ޕޮއިންޓް ހޯދައިދިން މުހައްމަދު ހުވެއިލިދު އަލީ އެވެ. ރެޑްވިންގްސްގެ ގިނަ ކުޅުންތެރިން މޮޅު ކުޅުމެއް ދެއްކި މި މެޗުގައި ޒައިދާން އާތިފް ޝުކުރޫ އާއި މުހައްމަދު ޒީދާން ޒައީމް އަދި ކެޕްޓަން މުހައްމަދު އަޝްމަލް އަހުމަދުވެސް ފެނުނީ އިތުބާރާއެކު ކުޅިތަނެވެ.
މި މުބާރާތުގައި މިއަދު ކުޅޭނީ ދެ މެޗެވެ. ހަވީރު ކުޅޭ މެޗުގައި އަންހެން ޑިވިޝަންގެ ސައިކްލޯން އާއި ކުއީންސް ވާދަކުރާއިރު، ފިރިހެން ބައިގައި މިރޭ ޓީރެކްސް ނުކުންނާނީ ކިންގްސްއާ ދެކޮޅަށެވެ.
