ފުޅާ ދާއިރާއެއްގައި ރާއްޖޭގައި މަސްވެރިކަމާ ގުޅޭ ސާމާނު ވިއްކާ ސޮނީ ފިޝިން އިން، ކަނޑުފޯރީގެ ނަމުގައި މުޅިން އަލަށް ވާޗުއަލްކޮށް މަސް ބޭނުމުގެ މުބާރާތެއް ބޭއްވުމަށް ނިންމައިފި އެވެ.
މަސްވެރިންގެ ދުވަހާ ގުޅުވައިގެން އެ ކުންފުނިން ތައާރަފު ކުރި މި މަސް މުބާރާތް ކުރިއަށް ގެންދާނީ ފިޒިކަލް ދެ ބުރާއި ވާޗުއަލް 12 ބުރު ހިމެނޭ ގޮތަށް ކަމަށް ސޮނީ އިން ބުނެ އެވެ. ޓީމުތަކަށާއި ވަކިވަކި ފަރުދުންނަށް ވެސް ބައިވެރިވެވޭ ގޮތަށް ކުރިއަށް ގެންދާ މި މުބާރާތުގައި ބައިވެރި ވުމުގެ ފުރުސަތު އަންނަ މަހުގެ 10 ވަނަ ދުވަހާއި ހަމައަށް ވަނީ ހުޅުވާލާފަ އެވެ.
އަގުހުރި އިނާމުތަކެއް ވެސް ހުށަހަޅާފައިވާ މި މުބާރާތުގައި ބައިވެރި ވުމަށް ކަނޑުފޯރި ވެބްސައިޓަށް ޒިޔާރަތް ކޮށްލުމަށް ފަހު ސަބްސްކުރައިބު ކޮށްލުމުން ޓީޝާޓަކާއި މިންބަލާ ފީތާއެއް މުޅިން ހިލޭ ލިބޭނެ އެވެ. ޓީމެއްގެ ގޮތުގައި ބައިވެރިވާ ނަމަ ފީއެއްގެ ގޮތުގައި 1500ރ. ދައްކަން ޖެހޭނެ އެވެ. ނަމަވެސް ވަކި ފަރުދެއްގެ ގޮތުގައި ބައިވެރިވާ ނަމަ އެއްވެސް ފީއެއް ދައްކާކަށް ނުޖެހޭނެ އެވެ.
މިއަންނަ އަހަރު ކުރިއަށް ގެންދިޔުމަށް ހަމަޖެހިފައިވާ މި މުބާރާތުގައި ޓީމް ކެޓަގަރީން އެއްވަނައަށް ދާ ފަރާތަކަށް 10،000ރ. ހުށަހަޅާފައިވާ އިރު ދެވަނައަށް 5000ރ. އަދި ތިންވަނައަށް 2500ރ. ހުށަހަޅާފައިވެ އެވެ. މީގެ އިތުރުން މި މުބާރާތުގެ އެންމެ މޮޅު މަސްވެރިއަކަށް ސަރަގޯސާ ރީލެއް ހިލޭ ލިބޭނެ އެވެ.
މި މުބާރާތުގެ އޯގަނައިޒިން ޕާޓުނަރަކީ ޔުނިކްސް ސްޕޯޓިން އެވެ.
