ދާކާ، ބަންގްލަދޭޝް (ޑިސެމްބަރު 10) - ބަންގްލަދޭޝްގެ މައި އިދިކޮޅު ޕާޓީއަށް ސަޕޯޓު ކުރާ 100،000 މީހުން ވެރިރަށް ދާކާގައި މުޒާހަރާކޮށް ބޮޑު ވަޒީރު ޝެއިހް ހަސީނާގެ އިސްތިއުފާއަށް ޑިމާންޑުކޮށްފި އެވެ.
"ޝެއިހް ހަސީނާއަކީ ވޯޓު ވަގެއް،" މުޒާހަރާ އޮތް ގޮލާޕްބާގް ސްޓޭޑިއަމް ތެރޭގައި މީހުން ގޮވަމުން ދިޔަ އެވެ. ސްޓޭޑިއަމް ފުރި މަގުމަތީގައި ވެސް މީހުން ތިއްބެވެ.
މުޒާހަރާގެ ތެރެއިން ބަންގްލަދޭޝް ނޭޝަނަލިސްޓް ޕާޓީ (ބީއެންޕީ) ގެ ހަތް ޕާލަމެންޓް މެމްބަރުން އިސްތިއުފާ ދެއްވި އެވެ. އެއާއެކު ޕާލަމެންޓުން އިދިކޮޅު އަޑު އެއްކޮށް ގެއްލުނީ އެވެ.
ބަންގްލަދޭޝްގެ ސިޔާސީ މަޝްރަހާ ގުޅޭ ގޮތުން އދ. އިން ދާދި ފަހުން ކަންބޮޑުވުން ފާޅުކުރި އެވެ.
ބަންގްލަދޭޝަކީ އޭޝިއާގައި އެންމެ ބާރަށް ކުރިއަރަމުންދާ އެއް އިގްތިސާދެވެ. އެހެން ނަމަވެސް ޔޫކްރެއިން ހަނގުރާމައިގެ ސަބަބުން ގޭގާއި ޑީސެލް އިމްޕޯޓް ކުރުން މެދުކަނޑާލަން މަޖުބޫރުވި އެވެ.
އާއްމުންގެ ނުރުހުން އިތުރުވާން ފެށީ ކަރަންޓު ކަނޑައި ތެލުގެ އަގު އުފުލެން ފެށުމުންނެވެ. ބަންގްލަދޭޝްގެ ފައިސާ، ޓާކާގެ އަގުގެ ވެލިއު 25 ޕަސެންޓު ވަނީ ވެއްޓިފަ އެވެ.
އިދިކޮޅުގެ ބޮޑު އެއްވުމެއް އޮތް ނަމަވެސް އެ ގައުމުގެ އެއްވެސް ޓީވީ ޗެނަލްއަކުން އެކަން ރިޕޯޓެއް ނުކުރެ އެވެ. އެހެންކަމުން ބޮޑަށް ބެލެވެނީ ސަރުކާރުގެ ޕްރެޝަރާ ހެދި ކަވަރޭޖް ނުދިން ކަމަށެވެ.
"އަޅުގަނޑުމެންގެ އެންމެ ބޮޑު ޑިމާންޑަކީ ޝެއިހް ހަސީނާގެ އިސްތިއުފާ އާއި ޕާލަމެންޓް އުވާލައި، ވަގުތީ ސަރުކާރެއް ގާއިމްކޮށް މިނިވަން އަދި އިންސާފުވެރި އިންތިހާބެއް ބޭއްވުން،" އިދިކޮޅުގެ ތަރުޖަަމާނު ޒަހީރުއްދީން ސްވާޕަން ވިދާޅުވި އެވެ.
ހޮނިހިރު ދުވަހު ބޮޑު މުޒާހަރާއެއް އޮތް އިރު، ހުކުރު ދުވަހު އިދިކޮޅުގެ ދެ އިސްވެރިން ހައްޔަަރު ކުރި އެވެ. އެއީ ހަމަނުޖެހުމަށް ހިތްވަރުދޭ ކަމުގެ ތުހުމަތުގަ އެވެ.
ރިޕޯޓުތައް ބުނާ ގޮތުން އިދިކޮޅުގެ ހަރަކާތްތައް ވަރުގަދަ ކުރަން ފެށުމުން، ނޮވެމްބަރު 30 ވަނަ ދުވަހުން ފެށިގެން 2000 އަށް ވުރެ ގިނަަ އެކްޓިވިސްޓުންނާއި އިދިކޮޅު ސަޕޯޓަރުން ބަންދުކޮށްފައިވެ އެވެ.
