ދޯހާ، ގަތަރު (ޑިސެމްބަރު 10) - މީގެ ދޮޅު އަހަރު ކުރިން ވައުދުވި ގޮތަށް، ގަތަރުގައި މިހާރު ކުރިއަށްދާ ފީފާ ވޯލްޑް ކަޕްގައި ބްރެޒިލް ކުޅުނު ފަހު މެޗަށް ފަހު އެ ޓީމުގެ ކޯޗުކަމުން ޓީޓޭ ވަކިވެއްޖެ އެވެ.
ޓީޓޭ، 61، ބްރެޒިލްގެ ކޯޗަކަށް ހުރި ފަހު މެޗަކީ މި ފަހަރުގެ ވޯލްޑް ކަޕްގެ ކުއާޓާ ފައިނަލުގައި ރޭ ބްރެޒިލުން ޕެނަލްޓީ ޖަހައިގެން 4-2 އިން ކްރޮއޭޝިއާ އަތުން ބަލިވި މެޗުގަ އެވެ. އެ މެޗުގެ ފުރިހަމަ ވަގުތު، 90 މިނިޓް ހަމަވިއިރު، ދެ ޓީމު އޮތީ ލަނޑެއް ނުޖެހި އެއްވަރުވެފަ އެވެ.
އެކަމަކު، އިތުރު ވަގުުތުގެ ފުރަތަމަ ހާފުގެ ފަހު މިނިޓްގައި ނޭމާ ބްރެޒިލަށް ލީޑުނަގައިިދިނެވެ. އިތުރު ވަގުތުގެ ދެ ވަނަ ހާފުގެ ފަހުކޮޅުގައި ކްރޮއޭޝިއާގެ ބްރޫނޯ ޕެޓްކޮވިޗް ގޯލެއް ޖަހައި، އެ ޓީމަށް އެއްވަރުކޮށްދީ މެޗު ޕެނަލްޓީ އަށް ގެންދިޔަ އެވެ. ޕެނަލްޓީގައި ބްރެޒިލް ކަޓައި، ޓީޓޭ މަގާމު ދޫކޮށްލީ އެވެ.
ބްރެޒިލްގެ ކޯޗުކަމުން 2016 ވަނަ އަހަރުގެ ކޮޕަ އެމެރިކާ ހާއްސަ މުބާރާތަށް ފަހު، އޭރުގެ ކޯޗު ޑުންގާ ވަކިކޮށް، އެ މަގާމާ ހަވާލުވި ޓީޓޭ އެވެ. ޓީޓޭ ބްރެޒިލަށް އިރުޝާދުދިންއިރު، އެއް ފަހަރު ކޮންޓްރެކްޓް އާ ކުރި އެވެ. ޓީޓޭ އެންމެ ފުރަތަމަ ބްރެޒިލްގެ ކޯޗުކަން ދޫކޮށްލާނެ ވާހަކަ ދެއްކީ މިދިޔަ އަހަރު އެވެ. އޭގެ ފަހުން، މި އަހަރުގެ މާޗް މަހު ވެސް ވަނީ ވޯލްޑް ކަޕަށް ފަހު ބްރެޒިލް ކޯޗެއްގެ ގޮތުގައި ނުފެންނާނެ ކަމަށް ބުނެފަ އެވެ.
"ކުރިން ވެސް ބުނެފައިވާނެ، މިއީ އަހަރެންގެ ފަހު މުބާރާތޭ، އަހަރެންގެ ވަގުތު މި ހިސާބުން މި ނިމުނީ. މީގެ ދޮޅު އަހަރު ކުރިން އަހަރެން ބުނިން ވޯލްޑް ކަޕަށް ފަހު މި މަގާމުން ނުފެންނާނެއޭ. އަހަރެން ބުނި ބަހުގައި ހިފަހައްޓައި، މަގާމު ދޫކޮށްލަން މި ނިންމީ،" ރޭގެ މެޗަށް ފަހު ޓީޓޭ ބުންޏެވެ.
"އަހަރެންގެ މި ނިންމުމަކީ ބޮޑު ޑްރާމާ އަކަށް ހަދަން ނެތިން. އަހަންނަށް ފަހު ވެސް ބްރެޒިލް އަށް ކޯޗުކޮށްދޭނެ ޕްރޮފެޝަނަލް ތަފާތު ކޯޗުން ލިބޭނެ،"
ބްރެޒިލްގެ ގިނަ ކްލަބްތަކަކަށް ކޯޗުކޮށްދިން ޓީޓޭ ވަނީ، ބްރެޒިލާ ހަވާލުވެ، ދެ ވޯލްޑް ކަޕާއި ދެ ކޮޕަ އެމެރިކާގައި އެ ޓީމަށް އިރުޝާދުދީފަ އެވެ.
ބްރެޒިލުން 2019 ވަނަ އަހަރު، ޓީޓޭގެ ކޯޗުކަމުގައި ކޮޕަ އެމެރިކާގެ ޗެމްޕިއަންކަން ހޯދިއިރު، އެ ތަށީގައި އެ ޓީމަށް އަތްލުމުގެ ނަސީބު ލިބިފައިވަނީ 12 އަހަރުގެ މެދުކެނޑުމަކަށް ފަހު އެވެ. މިއީ ބްރެޒިލުން ހޯދި ނުވަ ވަނަ ކޮޕަ އެމެރިކާ ތަށްޓެވެ. އެހެން ނަމަވެސް، އެންމެ ފަހުން މިދިޔަ އަހަރުގެ ކޮޕަ އެމެރިކާ ފައިނަލުގައި ބްރެޒިލް ވަނީ އާޖެންޓީނާ އަތުން ބަލިވެފަ އެވެ.
