ދޯހާ، ގަތަރު (ޑިސެމްބަރު 9) - ފީފާ ވޯލްޑް ކަޕް ފުޓްބޯޅަ މުބާރާތުގައި މިރޭ ޕެނަލްޓީ ޖަހައިގެން 4-2 ބްރެޒިލް ކަޓުވާލައި، ކްރޮއޭޝިއާ މި ފަހަރުގެ މުބާރާތުގެ ސެމީ ފައިނަލުގެ ފުރަތަމަ ޖާގަ ހޯދައިފި އެވެ.
މެޗުގެ ފުރިހަމަ ވަގުތު، 90 މިނިޓް ހަމަވިއިރު، ދެ ޓީމު އޮތީ 0-0 އިން އެއްވަރުވެފަ އެވެ. އިތުރު ވަގުތުގެ ފުރަތަމަ ހާފުގެ އިތުރަށް ދެއްކި މިނިޓްގައި ބްރެޒިލްގެ ނޭމާ ވަނީ އެ ޓީމަށް ލީޑުނަގައިދީފަ އެވެ.
އެކަމަކު، އިތުރު ވަގުތުގެ ދެ ވަނަ ހާފް ނިމެން ތިން މިނިޓަށް ވެފައި އޮއްވައި، ބްރޫނޯ ޕެޓްކޮވިޗް ޖެހި ގޯލުން ނަތީޖާ އެއްވަރުވީ އެވެ. މެޗުގެ އިތުރު ވަގުތުގެ ދެ ހާފުގެ ކުޅުން ނިމުނުއިރު، ދެ ޓީމު އޮތީ 1-1 އިން އެއްވަރުވެފަ އެވެ. އެހެންވެ، ޖެހުނީ ޕެނަލްޓީ ޖަހާށެވެ.
ގަތަރުގެ އެޑިއުކޭޝަން ސިޓީ ސްޓޭޑިއަމްގައި މިރޭ ކުޅުނު މެޗުގެ ފުރަތަމަ ހާފުގައި ދެ ޓީމަށް ވެސް މާ ނުރައްކާތެރި ހަމަލާތަކެއް ފޮނުވާނުލެވުނެވެ. އެކަމަކު، ދެ ވަނަ ހާފްގެ ކުޅުން ފެށިގެން ބްރެޒިލުން ފުރުސަތުތައް ތަނަވަަސްކުރަން ފަށައި، ރަނގަޅު ހަމަލާތަކެއް ފޮނުވާލި އެވެ. އެ ގޮތުން، ބްރެޒިލްގެ ވިނީޝިއުސް ޖޫނިއާ، ނޭމާ އަދި ޕަކޭޓާ ޖެހި ބޯޅަތައް ހުއްޓުވުމުގައި ކްރޮއޭޝިއާގެ ކީޕަރު ޑޮމިނިކް ލިވާކޮވިޗްގެ ހުށިޔާރުކަން ފެނިގެންދިޔަ އެވެ.
ކްރޮއޭޝިއާގެ ބްރޮޒޮވިޗް (ވ) ކައިރިން ބްރެޒިލްގެ ނޭމާ ބޯޅަ ހިފައިގެންދަނީ.
ބްރެޒިލުން ގޯލެއް ޖަހަން ކުރި މަސައްކަތް ކާމިޔާބުވީ މެޗުގެ އިތުރު ވަގުތުގެ ފުރަތަމަ ހާފުގައި އިތުރަށް ދެއްކި މިނިޓްގަ އެވެ. ނޭމާ އަށް އޭރިއާތެރެއިން ލިބުނު ކުޑަ ޖާގައިގެ ބޭނުންހިފައި އޭނާ ގޯލު ޖެހީ ކީޕަރު ލިވާކޮވިޗް ކައިރިން ނައްޓާފައި ގޯލުގެ މަތީ ކަނަށް ބޯޅަ ފޮނުވާލައިގެންނެވެ. މި ގޯލާ އެކު ނޭމާ ވަނީ ބްރެޒިލްގެ ލެޖެންޑަރީ ފޯވާޑް ޕެލޭގެ ރެކޯޑާ ހަމަކޮށްފަ އެވެ. ބްރެޒިލަށް އެންމެ ގިނަ ގޯލު ޖަހައިދިން ލިސްޓުގެ ކުރީގައި ޕެލޭ އާއި ނޭމާ އެއްވަރުވީ 77 ގޯލު ޖަހައިގެންނެވެ.
އިތުރު ވަގުތުގެ ދެ ވަނަ ހާފުގެ ފަހު ކޮޅުގައި ކްރޮއޭޝިއާ އަށް އެއްވަރުކޮށްދިނީ ޕެޓްކޮވިޗް އެވެ. ޕެޓްކޮވިޗް ފޮނުވާލި ބޯޅަ ގޯލަށް ވަނީ ބްރެޒިލްގެ ޑިފެންޑަރު، މާކީނިއޯސް ފައިގައި ޖެހިފަ އެވެ.
ޕެނަލްޓީ ޖަހަން ޖެހުމުން ކްރޮއޭޝިއާގެ ނިކޯލާ ވްލަސިޗް ވަނީ ފުރަތަމަ ޕެނަލްޓީ ކާމިޔާބުކޮށްފަ އެވެ. އެކަމަކު، ބްރެޒިލްގެ ފުރަތަމަ ޕެނަލްޓީ ފޮނުވާލި ރޮޑްރީގޯ ޖެހި ބޯޅަ ކީޕަރު ލިވަކޮވިޗް ވަނީ މަތަކޮށްފަ އެވެ. ފުރުސަތުގެ ބޭނުންހިފައި، ކްރޮއޭޝިއާގެ ދެ ވަނަ ޕެނަލްޓީ ކާމިޔާބުކޮށް ލޮވްރޯ މާޔާ ވަނީ އެ ޓީމަށް ލީޑުނަގައިދީފަ އެވެ. ކަސެމީރޯ ވަނީ ބްރެޒިލްގެ ދެ ވަނަ ޕެނަލްޓީ ކާމިޔާބުކޮށްފަ އެވެ. ކްރޮއޭޝިއާގެ ތިން ވަނަ ޕެނަލްޓީ ލޫކަ މޮޑްރިޗް ވަނީ ހަމަޖެހިލާފައި ގޯލުގެ ކަނަށް ވައްދާލައިފަ އެވެ. ބްރެޒިލްގެ ތިން ވަނަ ޕެނަލްޓީ ޕެޑްރޯ ކާމިޔާބުކުރިއިރު، ކްރޮއޭޝިއާގެ ހަތަރު ވަނަ ޕެނަލްޓީ ފޮނުވާލި މިސްލާވް އޯރްސިޗް ޖެހި ބޯޅަ އަމާޒުވީ ތިރީ ކަަނަށެވެ. ބްރެޒިލް ބަލިވީ ހަތަރު ވަނަ ޕެނަލްޓީ ޖަހަން ދިޔަ މާކީނިއޯސް އަތުން ނާކާމިޔާބުވުމުންނެވެ. އޭނާ ޖެހި ބޯޅަ ބޭރުވީ ދަނޑީގައި ޖެހިފަ އެވެ.
ބްރެޒިލްގެ މާކީނިއޯސް ފަހު ޕެނަލްޓީ ފޮނުވާލުމަށް ފަހު.
މި ފަހަރުގެ ވޯލްޑް ކަޕްގެ ފޭވަރިޓެއްގެ ގޮތުގައި ބެލެވުނު، ބްރެޒިލް މި ކެޓީ، އެންމެ ފަހުން 2018 ވަނަ އަހަރުގެ ވޯލްޑް ކަޕްގެ ރަނަރަޕް ކްރޮއޭޝިއާ އަތުންނެވެ. މިއީ ކްރޮއޭޝިއާ އިން ވޯލްޑް ކަޕެއްގައި ކުޅުނު ތިން މެޗުގެ ތެރެއިން ބްރެޒިލް ބަލިކުރި ފުރަަތަމަ މެޗެވެ. މީގެ ކުރިން މި ދެ ޓީމު ވޯލްޑް ކަޕްގައި ބައްދަލުކުރި ދެ ފަހަރު ވެސް ވާދަކުރީ ގްރޫޕް ސްޓޭޖުގަ އެވެ.
ކްރޮއޭޝިއާ އިން މި ފަހަރުގެ ވޯލްޑް ކަޕްގައި ނޮކައުޓް ދެ މެޗުން ވެސް މޮޅުވީ ޕެނަލްޓީ ޖަހައިގެންނެވެ. ގަދަ 16 ބުރުގައި ޖަޕާން ބަލިކޮށް، މި މެޗުގައި ބްރެޒިލް އަތުން ވެސް ޕެނަލްޓީގައި މޮޅުވީ އެވެ. މި ދެ ޕެނަލްޓީގައި ވެސް ކްރޮއޭޝިއާގެ ކީޕަރު ލިވާކޮވިޗް ވަނީ ތަފާތު ދައްކައިފަ އެވެ.
އަނެއްކޮޅުން ބްރެޒިލް، 2002 ވަނަ އަހަރުގެ ވޯލްޑް ކަޕް ފައިނަލުގައި ޖަރުމަނު އަތުން މޮޅުވި ފަހުން، ވޯލްޑް ކަޕްގެ ނޮކައުޓް މެޗެއްގައި ޔޫރަޕް ޓީމެއް އަތުން މޮޅެއް ނުހޯދައި، ކުރާ އިންތިޒާރު ދިގުލައިދިޔައީ އެވެ.
