ޗައިނާގައި އުފެއްދި ފުރަތަމަ ކޮމާޝަލް ޖެޓު ހުކުރު ދުވަހު ޗައިނާ އީސްޓާން އެއާލައިންސްއާ ހަވާލުކޮށްފި އެވެ.
ސީ919 ޖެޓަކީ ޕަސަންޖަރުން އުފުލުމަށް ހާއްސަ ބޮޑު ވައިގެ އުޅަނދެކެވެ. އެ އުޅަނދުގެ ފުރަތަމަ ދަތުރު ކުރީ ޝަންހާއީ ޕުޑޯންގް އިންޓަނޭޝަނަލް އެއާޕޯޓުން ޝަންހާއީ ހޮންގްގިއާއޯ އިންޓަނޭޝަނަލް އެއާޕޯޓަށެވެ.
އެ އުޅަނދުގައި 164 ސީޓު ހުންނަ އިރު، އެއީ ބިޒްނަސް ކްލާހާއީ އިކޮނޮމީ ކްލާހުގެ ސީޓުތަކެވެ. ޗައިނާ އީސްޓާން އެއާލައިންސުން ޕަސެންޖަރުންނާ އެކު އެ އުޅަނދު ބޭނުން ކުރަން ފެށުމުގެ ކުރިން 100 ގަޑިއިރަށް ވުރެ ގިނަ ވަގުތު ޓެސްޓު ދަތުރުތައް ކުރާނެ އެވެ.
އެގޮތުން ޓެސްޓު ދަތުރުތަކުގައި ދާނީ ޝަަންހާއީ، ބެއިޖިން އަދި ގުއަންގްޒޫ ފަދަ ޗައިނާގެ އެތެރޭގެ މަންޒިލްތަކަށެވެ.
ޝިންހުއާ ނިއުސް އެޖެންސީން ބުނީ އެ އުޅަނދު ރަސްމީކޮށް ބޭނުން ކުރަން ފަށާނީ 2023 ވަނަ އަހަރުގެ އެޕްރީލް ނުވަތަ މޭ މަހުގައި ކަމަށެވެ.
ޗައިނާގައި ފުރަތަމަ ފަހަރަށް ކޮމާޝަލް ޖެޓެއް އުފެއްދި އިރު، އެ އުޅަނދު ވާދަކުރާނީ މިހާރު އޭވިއޭޝަން މާކެޓުގައި އުޅޭ އެއާބަސް އޭ320ނިއޯ އާއި ބޮއިންގް 737 މެކްސް ފަދަ ޖެޓުތަކާ އެވެ.
އެ ގައުމުން އަމިއްލަ ކޮމާޝަލް ޖެޓެއް އުފައްދަން ނިންމީ އެމެރިކާއާ އެކު އޮންނަ ވާދަވެރިކަމުގެ ތެރެއިން އެއާބަސް އާއި ބޮއިންގް އުޅަނދުތަކަށް ބަރޯސާވުން ބުއްދިރުވެރި ކަމަކަށް ނުވާތީ އެވެ.
ކޮމާޝަލް އޭވިއޭޝަން ކޯޕް އޮފް ޗައިނާ (ކޯމެކް) އިން 2030 ވަނަ އަހަރުގެ ކުރިން ކޮންމެ އަހަރަަކު ވެސް އޭގެ 25 އުޅަނދު މާކެޓަށް ނެރޭނެ ކަމަށް ބެލެވެ އެވެ.
