ދޯހާ، ގަތަރު (ނޮވެމްބަރު 6) - ފީފާ ވޯލްޑް ކަޕް ފުޓްބޯޅަ މުބާރާތުގެ ގަދަ 16 ބުރުގައި މިރޭ ދެކުނު ކޮރެއާ އަތުން 4-1 އިން ބޮޑު މޮޅެއް ހޯދައި، ބްރެޒިލުން ކުއާޓާ ފައިނަލުން ފުރުސަތު ހޯދައިފި އެވެ.
އަންނަ ހޮނިިހިރު ދުވަހު ކުޅޭ ކުއާޓާ ފައިނަލުގައި ބްރެޒިލް ކުޅޭނީ މިރޭ ގަދަ 16 ބުރުގައި ޕެނަލްޓީ ޖަހައިގެން ޖަޕާން ބަލިކުރި ކްރޮއޭޝިއާއާ އެވެ.
ގަތަރުގެ ސްޓޭޑިއަމް 974 ގައި މިރޭ ކުޅުނު މެޗުގެ 34 މިނިޓް ތެރޭ ބްރެޒިލުން ވަނީ ދެކުނު ކޮރެއާ ކޮޅަށް ހަތަރު ގޯލު ޖަހައިފަ އެވެ. މެޗުގެ ހަތް ވަނަ މިނިޓްގައި ބްރެޒިލަށް ގޯލު ހުޅުވައިދިނީ ވިނީޝިއުސް ޖޫނިއާ އެެވެ. މިއީ ރަފީނިއާ ނެގި ހުރަހަކުން އޭރިއާތެރެއިން ބޯޅަ ކޮންޓްރޯލް ކުރުމަށް ފަހު ވިނީޝިއުސް ޖެހި ގޯލެކެވެ.
ބްރެޒިލުން ލީޑުފުޅާކުރީ މެޗުގެ 13 ވަނަ މިނިޓްގައި ޕެނަލްޓީ އަކުން ނޭމާ ޖެހި ގޯލުންނެވެ. މިއީ ރިޗާލިސަން އަށް ކުރި ފައުލަކަށް ރެފްރީ ދިން ޕެނަލްޓީ އެކެވެ. މިއީ މި ފަހަރުގެ ވޯލްޑް ކަޕްގައި ބްރެޒިލް ކުޅުނު ފުރަތަމަ މެޗުގައި ލިިބުނު އަނިޔާއަކާ ހެދި ކުޅުމާ ދުުރަށް ދާން ޖެހުނު ނޭމާ އަލުން ފިޓްވެގެން އެނބުރި އައި ފަހުން ކުޅުނު ފުރަތަމަ މެޗެވެ.
ލަނޑު ޖެހުމަށް ފަހު ބްރެޒިލްގެ ރިޗާލިސަން އުފާފާޅުކުރަނީ.
މެޗުގެ 29 ވަނަ މިނިޓްގައި ތިއާގޯ ސިލްވާ ދިން ބޯޅައަކަށް އޭރިއާތެރެއަށް ހުސްކޮށް ވަދެ، ރިޗާލިސަން ވަނީ ތިރިތިރިން ގޯލަށް ބޯޅަ ވައްދާލައި، ބްރެޒިލަށް ތިން ވަނަ ގޯލެއް ޖަހައިދީފަ އެވެ. އޭގެ ފަސް މިނިޓް ފަހުން، ވިނީޝިއުސް އޭރިއާތެެރެއަށް ހުރަސްކޮށްލި ބޯޅައެއް ވޮލީ އަކުން ގޯލަށް ފޮނުވާލައި، ލޫކަސް ޕަކޭޓާ ބްރެޒިލްގެ ހަަތަރު ވަނަ ގޯލު ޖެހި އެވެ.
ދެ ވަނަ ހާފްގެ ކުރީކޮޅުގައި ދެކުނު ކޮރެއާގެ ސޮން ހެއުން މިން އަށް ގޯލެއް ޖަހަން ހުސްކޮށް އެރި ފުރުސަތެއްގައި އޭނާ ފޮނުވާލި ބޯޅަ ބްރެޒިލްގެ ކީޕަރު އެލިސަން ބެކާ ވަނީ މަތަކޮށްފަ އެވެ. މި ހާފުގެ ކުރިކޮޅުގައި ބްރެޒިލަށް ލަނޑެއް ޖަހައިދޭން އެ ޓީމުގެ ރަފީނިއާ ފޮނުވާލި ދެ ހަމަލާއެއް ދެކުނު ކޮރެއާގެ ކީޕަރު ކީ ސަންގް ޔޫ ވަނީ ހުއްޓުވައިފަ އެވެ.
ފުރަތަމަ ހާފަށް ވުރެން ރަނގަޅަށް ދެކުނު ކޮރެއާ އިން ވަނީ ދެ ވަނަ ހާފުގައި ކުޅެފަ އެވެ. އަދި ގޯލާ އަމާޒުކޮށް ރަނގަޅު ހަމަލާތަކެއް ވެސް ފޮނުވާލިިއިރު، މެޗުގެ 68 ވަަނަ މިނިޓްގައި ބްރެޒިލްގެ އޭރިއާގެތެރެއިން ދެކުނު ކޮރެއާގެ ހުވާން ހީޗާން ޖެހި ބޯޅައެއް ކީޕަރު އެލިސަން ވަނީ މަތަކޮށްފަ އެވެ.
އެކަމަކު، މެޗުގެ 76 ވަނަ މިނިޓްގައި ޕައި ސިން ހޯ އޭރިއާބޭރުން ޖެހި ބޯޅަ އަމާޒުވީ ގޯލުގެ ކަނަށެވެ. އެ ބޯޅަ ހުއްޓުވަން ކީޕަރު އެލިސަން އަށް ކަމެއް ނުކުރެވުނެވެ. އިތުރު ގޯލެއް ޖަހަން ދެކުނު ކޮރެއާ އިން ކުރި މަސައްކަތް ކާމިޔާބެއްނުވި އެވެ.
މެޗަށް ފަހު ބްރެޒިލްގެ ކުޅުންތެރިން ވަނީ މިހާރު ހޮސްޕިޓަލުގައި ފަރުވާދެމުން އަންނަ ބްރެޒިލްގެ ފުޓްބޯޅަ ލެޖެންޑް ޕެލޭ އަށް ހާއްސަ މެސެޖެއް ލިޔެފައިވާ ބެނާއެއް ދައްކާލައިފަ އެވެ. އަދި މެޗުގެ ކުރިން ބްރެޒިލް ސަޕޯޓަރުން ވެސް ވަނީ މެސީ އަށް ހާއްސަ މެސެޖުތަކެއް ލިޔެފައިވާ ބެނާތަކެއް ވިހުރުވާލައިފަ އެވެ.
