އިސްލާމްއާބާދް، ޕާކިސްތާާން (ޑިސެމްބަރު 5) - އަފްގާނިސްތާނުގެ ވެރިރަށް ކާބުލްގައި ހުންނަ ޕާކިސްތާނުގެ އެމްބަސީއަށް މިދިޔަ ހަފުތާގައި ދިން ހަމަލާއާ ގުޅިގެން އިސްލާމިކް ސްޓޭޓް (އައިއެސް) ޓެރަރިސްޓް ގްރޫޕުގެ މެމްބަރަކު ހައްޔަރުކޮށްފި އެވެ.
އަފްގާނިސްތާނުގައި ވެރިކަން ކުރާ ތާލިބާނުންގެ ތަރުޖަމާނަކު ބުނީ ހައްޔަރު ކުރީ "ބޭރު ގައުމަކަށް ނިސްބަތްވާ އައިއެސް މެމްބަރެއް" ކަމަށެވެ.
ހުކުރު ދުވަހު ދިން ހަމަލާގައި އެމްބަސީ ކައިރީގައި ބަޑި ޖަހައި ސެކިއުރިޓީ ގާޑަކަށް އަނިޔާވި އެވެ. ޕާކިސްތާނުން ބުނީ ހަމަލާ ދިނީ އެމްބަސީގެ އެންމެ އިސްވެރިޔާ އަވަހާރަކޮށްލުމަށް ކަމަށެވެ.
އެއްވެސް ގައުމަކުން އަފްގާނިސްތާނުގެ ތާލިބާން ސަރުކާރު ބަލައިނުގަނެ އެވެ. އެހެން ނަމަވެސް، ޕާކިސްތާނުން ނިންމީ އެމްބަސީ ބަންދު ނުކޮށް، ޑިޕްލޮމެޓިކް ގުޅުން ދެމެހެއްޓުމަށެވެ.
"ތަހުގީގުން އެނގޭ ގޮތުގައި ހަމަލާ ރޭވީ އައިއެސް އާއި ބައެއް އެހެން ފަަރާތްތައް ގުޅިގެން. މިކަމުގެ ފަހަތުގައި ބޭރު ބަޔެއްގެ ބައިވެރިވުން އެބަ އޮތް. އަމާޒަކީ އަފްގާނިސްތާނާއި ޕާކިސްތާނާ ދެމެދު ނުތަނަވަސްކަން އުފެއްދުން،" ތާލިބާނުންގެ ތަރުޖަމާނަަކު ބުންޏެވެ.
އެހެން ނަމަވެސް ހަމަލ ދިނުމުގައި ބައިވެރިވިކަމުގެ ތުހުމަތުގައި ހައްޔަރު ކުރި މީހާ ނިސްބަތްވާ ގައުމު ހާމައެއް ނުކުރެ އެވެ.
ޕާކިސްތާނުގެ ފޮރިން މިނިސްޓްރީން ބުނީ އަފްގާނިސްތާނަށް ކަނޑައަޅާފައި ހުންނަ ސަފީރު ރެހްމާން ނިޒަމާނީ މިހާރު ހުންނެވީ އިސްލާމްއާބާދްގައި ކަމަށާއި އެމްބަސީ ބަންދު ކުރުމުގެ ވިސްނުމެއް ނެތް ކަމަށެވެ.
މިދިޔަ ސެޕްޓެމްބަރު މަހު ރަޝިއާގެ އެމްބަސީއަށް އަމާޒުކޮށް ވެސް ހަމަލާ ދިނެވެ. އެ ހަމަލާގެ ޒިންމާ ވެސް އުފުލީ އައިއެސް ގްރޫޕުންނެވެ. އެ ފަހަރު ރަޝިއާ އެމްބަސީގެ ދެ މުވައްޒަފުންނަށް މަރުވި އެވެ.
