ދޯހާ، ގަތަރު (ނޮވެމްބަރު 5) - ފީފާ ވޯލްޑް ކަޕްގެ ދެ ވަނަ ބުރުގެ ކުރިން ޓީމަށް އަރާމު ކުރަން ވަގުތު ނުލިބޭތީ ދެކުނު ކޮރެއާގެ ކޯޗު، ޕޯޗުގަލްގެ ޕައުލޯ ބެންޓޯ ހިތްހަމަނުޖެހުން ފާޅުކޮށްފި އެވެ.
ވޯލްޑް ކަޕްގެ ދެ ވަނަ ބުރުގައި މިރޭ ބްރެޒިލްއާ ދެކޮޅަށް ދެކުނު ކޮރެއާ ނުކުންނާނެ އެވެ. ވޯލްޑް ކަޕްގައި މީގެ ކުރިން ދެކުނު ކޮރެއާ އިން ދެ ވަނަ ބުރުގައި ވާދަކުރީ އެންމެ ދެ ފަހަރެވެ. އެއީ 2002 ވަނަ އަހަރު އަމިއްލަ ގައުމުގައި ބޭއްވި މުބާރާތާއި 2010 ވަނަ އަހަރު ދެކުނު އެފްރިކާގައި ބޭއްވި މުބާރާތުގަ އެވެ.
ބެންޓޯ ބުނީ 72 ގަޑިއިރުތެރޭގައި ވޯލްޑްކަޕްގެ ވަރުގަދަ މެޗަކަށް ނުކުންނައިރު އެ ޓީމަށް އުނދަގޫތަކެއް އެބަހުރި ކަމަށެވެ، ދެކުނު ކޮރެއާ ކަހަލަ ޓީމަކަށް މިއީ އެއް މެޗުން އަނެއް މެޗަށް ދާން ބަލާއިރު، މަދު ވަގުތުކޮޅެއް ކަމަށް ބެންޓޯ ވަނީ ބުނެފަ އެވެ. އަދި ހަލާތު ނިޔާކުރި ގޮތުން ބްރެޒިލް އަށް މި ކަމުން އެޑްވާންޓޭޖެއް އޮތްކަމަށް ގަބޫލުކުރާ ކަމަށް ވެސް ބެންޓޯގެ ވާހަކައިގައި ފާހަގަކުރި އެވެ.
"ފަހު މެޗުގައި ބްރެޒިލުން ޓީމް ބަދަލުކޮށްފައި އޮތީ، އަހަރުމެންނަށް އޮތް ހާލަތު ތަފާތު. އެ މެޗުގައި ޓީމު ބަދަލުކުރެވޭކަށް ނެތް. ވަރަށް ހާޑު މެޗެއް ނިންމާފައި މި ލިބުނީ އެންމެ 72 ގަޑިއިރު. މިއީ އިންސާފުވެރި ގޮތެއް ނޫން" މީގެ ކުރިން ޕޯޗުގަލް އަށް ވެސް ވޯލްޑް ކަޕްގައި އިރުޝާދު ދިން ބެންޓޯ ބުންޏެވެ.
ބެންޓޯ ބުނީ ދެކުނު ކޮރެއާ ޓީމުގައި އަނިޔާގެ މައްސަލަތައް ހުރި ނަމަވެސް ޓީމުގައި ތިބި 26 ކުޅުންތެރިނަންނަށް ވެސް އިތުބާރު އެބައޮތް ކަމަށެވެ.
ބްރެޒިލް އަކީ ވޯލްޑް ކަޕްގެ މިކަހަލަ ބޮޑެތި މެޗުތަކުން މޮޅުވުމުގެ ސަގާފަތެއް އޮތް ޓީމެއް ކަމަށާއި، އެހެންކަމުން، މިއީ ދެކުނު ކޮރެއާ އަށް އޮތް ޗެލެންޖެއް ކަމަށް ބެންޓޯ ގަބޫލުކުރެ އެވެ. އެހެން ނަމަވެސް ދެކުނު ކޮރެއާ އޮތް ހިތްހަމަޖެހުމަކީ ދުނިޔޭގެ ޗެމްޕިއަންކަން ހޯދާފައިވާ ޓީމެއް އަތުން ބަލިވުމުގެ ޕްރެޝަރުން ނެތުން ކަމަށާއި، އޭގެ ފައިދާ ނެގޭނެކަމަށް ގަބޫލުކުރާ ކަމަށް ވެސް ބެންޓޯ ވަނީ ބުނެފަ އެވެ.
ވޯލްޑް ކަޕްގެ ދެ ވަނަ ބުރުން އެންމެ ފަހުން ބްރެޒިލް ކަޓާފައިވަނީ 1990 ވަނަ އަހަރުގަ އެވެ. އެ ފަހަރު އާޖެންޓީނާ އަތުން ބްރެޒިލް ބަލިވީ 1-0 އިންނެވެ.
ދެކުނު ކޮރެއާ އަކީ ވޯލްޑް ކަޕްގެ ފުޓްބޯޅަ މުބާރާތުގެ ކުއާޓާ ފައިނަލުން ޖާގަ ހޯދި އޭޝިއާގެ ދެ ވަނަ ގައުމެވެ. އެ ގޮތުން، 2002 ގެ މުބާރާތުގެ ހަތަރު ވަނަ އެ ޓީމުން ހޯދިއިރު، 1966 ވަނަ އުތުރު ކޮރެއާ އިންވެސް ވޯލްޑް ކަޕްގެ ގަދަ 8 ޓީމުގެ ތެރެއިން ޖާގަ ހޯދި އެވެ.
