އާދީއްތަ ދުވަހު އިންޑޮނީޝިއާގެ ސެމެރޫ އަލިފާން ފަރުބަދަ ގޮވައި ދެ ހާހަށް ވުރެ ގިނަ މީހުން ރައްކާތެރި ހިސާބުތަކަށް ބަދަލުވެއްޖެ އެވެ.
ޖާވާ ރަށުގެ އެންމެ އުސް ފަރުބަދައިން ބޯ ދުން އަރައި، ދިޔާ އަލިފާން ފައިވަން ފެށީ ވެރިރަށް ޖަކާޓާއާ 800 ކިލޯމީޓަރު އިރުދެކުނުންނެވެ.
އިދާރާތަކުން ވަނީ އަލިފާން ފަރުބަދަ ގޮވުމާ ގުޅޭ އެންމެ މަތީ އެލާޓު ނެރިފަ އެވެ. ސެމެރޫ ފަރުބަދަ ވަށައިގެންވާ އަވަށްތަކަށް ދުމާއު ހިރަފުހުގެ އަސަރު ކުރަމުންދާ އިރު، ބޯކޮށް ވާރޭ ވެސް ވެހެމުންދެ އެވެ.
އަވަށްތަކުގެ މީހުން ބުނީ ހިރަފުސް ބޯވެގެން ގޮސް އުޑުމަތި އެއްކޮށް އަނދިރިވެ އިރުގެ އެއްވެސް އަލިކަމެއް ނުލިބެ އެވެ. ދުވާލު ހީވަނީ ރޭގަނޑުގެ ވަގުތެއްހެން ކަމަށް އެ މީހުން ބުންޏެވެ.
ނޭޝަނަލް ޑިޒާޒްޓާާ މިޓިގޭޝަން އެޖެންސީ (ބީއެންޕީބީ) ގެ ތަރުޖަމާނު އަބްދުލް މުހާރީ ވިދާޅުވީ ހޫނު، ދިޔާ އަލިފާން ފަރުބަދައިން ފައިބަމުންދާ ކަމަށެވެ. އެއީ 3،676 މީޓަރު އުސް ފަރުބަދައެކެވެ.
މިހާތަނަށް މީހަކު މަރުވި ކަމެއް އަދި އަނިޔާކަމުގެ ރިޕޯޓެއް ނުލިބެ އެވެ. އަލިފާން ފަރުބަދަ ވަށައިގެން އަށް ކިލޯމީޓަރުގެ ހިސާބެއް ވަނީ ބަންދުކޮށްފަ އެވެ.
އަލިފާން ފަރުބަދަ ގޮވުމުން ސުނާމީއެއް އަރާފާނެ ކަމަށް ޖަޕާނުގެ މޫސުމާ ބެހޭ އެޖެންސީއިން އިންޒާރު ދިނެވެ. އެހެން ނަމަވެސް، ސުނާމީއެއްގެ އަސަރެއް ނުކުރެ އެވެ.
ސެމެރޫ ފަރުބަދަ އެންމެ ފަހުން ގޮވީ މީގެ އެއް އަހަރު ކުރިންނެވެ. އެ ފަހަރު 51 މީހުން މަރުވެ، ފަސް ހާހަށް ވުރެ ގިނަ ގެ ސުންނާފަތިވި އެވެ.
