ރައީސް އިބްރާހިމް މުހައްމަދު ސޯލިހު ވެރިކަމާ ހަވާލުވެވަޑައިގަތުމަށް ފަހު ތަންފީޒު ކުރައްވަމުން ގެންދަވަނީ ރިޔާސީ އިންތިހާބަށް ރައްޔިތުންނަށް ހުށަހެޅި މެނިފެސްޓޯ ކަމަށާއި އެ މެނިފެސްޓޯގައި ނިޒާމީ ވޯޓުގެ ވާހަކައެއް ނެތް ކަމަށް ބުނެ ސަރުކާރުން ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ރައްދު ދީފި އެވެ.
މަޖިލީހުގެ "އާސްކު ސްޕީކާ" ގެ ހަ ވަނަ ޕްރޮގްރާމުގައި އާންމުންގެ މީހަކު ކުރި ސުވާލަކަށް ޖަވާބު ދެއްވަމުން ނަޝީދު ވިދާޅުވީ 2018 ވަނަ އަހަރުގެ ރިޔާސީ އިންތިހާބުގައި އެމްޑީޕީން އެކުލަވައިލި މެނިފެސްޓޯގައި ވައުދުވި ކަންތައްތަކުގެ ތެރެއިން އެންމެ މުހިންމު އެއް ވައުދަކީ ވެރިކަން ކުރުމުގެ ނިޒާމު ބަދަލުކުރަން ރައްޔިތުން ދެކޭ ގޮތެއް ހޯދުން ކަމަށެވެ.
އަދި އެމްޑީޕީގެ މެނިފެސްޓޯގައި ހިމެނި އެ ވައުދަށް ކޯލިޝަންގައި ބައިވެރިވި އަދާލަތު ޕާޓީގެ އިތުރުން މޯލްޑިވްސް ރިފޯމް މޫވްމަންޓް (އެމްއާރުއެމް ) އިން ވެސް އޭރު ތާއީދުކުރި ކަމަށް އެމަނިކުފާނު ވިދާޅުވި އެވެ.
އެކަމާ ގުޅިގެން ސަރުކާރުގެ ތަރުޖަމާނު މިއުވާން މުހައްމަދު "އަދަދު" އަށް ވިދާޅުވީ އެމްޑީޕީން 2018 އަދި 2022 ގައި ބޭއްވި ކޮންގްރެސްގައި ވެސް ނިޒާމީ ވޯޓަކަށް ދާން އެއްބަސްވެފައިނުވާ ކަމަށެވެ.
"އެމެނިފެސްޓޯގައި ރައްޔިތުންނަށް ކޮށްދޭން އަޅުގަނޑުމެން ވައުދުވި ކަންތައް މިދަނީ ކުރަމުން. ކަށަވަރުކޮށްދޭން ވައުދުވި ހައްގުތައް މިދަނީ ކަށަވަރުކޮށްދެމުން. އެމެނިފެސްޓޯގައި ނިޒާމީ ވޯޓުގެ ވާހަކައެއް ނެތް،" މިއުވާން ވިދާޅުވި އެވެ.
"ނިޒާމީ ވޯޓާ މެދު އުފެދުނު ހިޔާލުތަފާތުވުންތައް އެއްފަރާތްކޮށްލީ އެކަމާ މެދު ވާހަކަ ދައްކަން އެއްބަސްވެގެން. އެއް ގޮތަކަށްވެސް ވަކި ކަމަކަށް ނުވަތަ ވަކި ގޮތަކަށް ނިޒާމްގެ ވޯޓު ނަގަން އެއްބަސްވެގެންނެއް ނޫން."
ނަޝީދު ވިދާޅުވި ގޮތުގައި އަންނަ އަހަރުގެ ރިޔާސީ އިންތިހާބުގައި ވާދަކުރާނެ ކެންޑިޑޭޓެއް ހޮވަން "ރިޔާސީ ޕްރައިމަރީ" ގެ ވާހަކަ އެމްޑީޕީން ދައްކައިގެންވެސް ނުވާނެ އެވެ.
"ހަގީގަތުގައި ރިޔާސީ ޕްރައިމަރީއެއްގެ ވާހަކަ ނުދެއްކޭނެ ފެންނަ ނުފެންނަ ވޯޓެއް ނުނަގައި. [މެނިފެސްޓޯގެ] މި ވައުދު ނުފުއްދައި، ރިޔާސީ ޕްރައިމަރީއަކަށް މިސްރާބު ޖެހުމަކީ ރަނގަޅު ކަމެއް ނޫން،" ނަޝީދު ވިދާޅުވި އެވެ.
އެމްޑީޕީގެ ޕްރައިމަރީ މިހާރު ބޭއްވުމަށް ހަމަޖެހިފައިވަނީ އަންނަ އަހަރު ކަމަށްވެ އެވެ. ރިޔާސީ ޕްރައިމަރީ ނުބޭއްވި ގިނަ ދުވަސް ތަކެއް ވެފައިވާއިރު އެ ޕާޓީގެ އެތެރޭގައި ހިޔާލުތަފާތުވުންތަކެއް ވަނީ އުފެދިފަ އެވެ.
