ދޯހާ، ގަތަރު (ޑިސެމްބަރު 4) - ފީފާ ވޯލްޑް ކަޕް ފުޓްބޯޅަ މުބާރާތުގައި ވާދަކުރާ ބްރެޒިލް ޓީމުގެ މުހިންމު ދެ ކުޅުންތެރިން ކަމަށްވާ އަލެކްސް ޓެލޭސް އާއި ގަބްރިއެލް ޖީސޫސް އަށް އަނިޔާގެ ސަބަބުން މުބާރާތް ނިމިފައިވާ ކަމަށް ބްރެޒިލް ފުޓްބޯޅަ ފެޑެރޭޝަންގެ އޮފިޝަލަކު ބުނެފި އެވެ.
ގްރޫޕް ސްޓޭޖުގެ ފަހު މެޗުގައި ބްރެޒިލްގެ ފޯވާޑް ޖީސޫސް އާއި ވާތު ވެކް، ޓެލޭސް އަށް ވަނީ އަނިޔާވެގެން ފަރުވާދީފަ އެވެ. އެ ދެ ކުޅުންތެރިންގެ ކަކުލަށް ލިބުނު އަނިޔާގެ ތަފްސީލް ދެނެގަންނަން ހެދި ޓެސްޓްތަކަށް ފަހު އެނގުނީ މި މުބާރާތުގައި ދެން ކުޅެވޭ ވަރަށް އެ ދެ ކުޅުންތެރިން ވެސް ފިޓްވުމުގެ ފުރުސަތު ކުޑަ ކަމަށެވެ.
ބްރެޒިލްގެ ޓީމު ޑޮކްޓަރު، ރޮޑްރީގޯ ލަސްމާ އިސްކޮށް ހުރެ، ޖީސޫސް އާއި ޓެލޭސްގެ އިތުރު ޓެސްޓްތަކެއް ހެދިއިރު، ދެ ކުޅުންތެރިންގެ ކަކުލަށް ވެސް ލިބިފައިވަނީ މި މުބާރާތުގައި އެނބުރި އާދެވޭ ވަރަށް ވުރެން ސީރިއަސް އަނިޔާއެކެވެ. އެހެންވެ، މި މަހު 18 ވަނަ ދުވަހު ނިމޭ މި ފަހަރުގެ ވޯލްޑް ކަޕްގެ ކުރިން އެ ދެ ކުޅުންތެރިންނަށް އެނބުރި ދަނޑަށް ނާދެވޭނެ އެވެ.
މީޑިއާ ރިޕޯޓްތައް ބުނާގޮތުން އާސެނަލަށް ކުޅޭ ޖީސޫސް އާއި މެންޗެސްޓާ ޔުނައިޓެޑްގެ ލޯން އެއްބަސްވުމެއްގެ ދަށުން މި ވަގުތު ސެވިއްޔާ އަށް ކުޅެމުން އަންނަ ޓެލޭސް، އަނިޔާ އަށް ފަހު، ވެސް ޓީމުގެ ކޭމްޕާ އެކު ގަތަރުގައި މަޑުކުރުމާ މެދު އަދި ރަސްމީކޮށް ގޮތެއް ނުނިންމަ އެވެ. ފީފާ އިން ކްލަބްތަކާ އެކު ވެފައިވާ އެއްބަސްވުމުގައިވާ ގޮތުން އަނިޔާގެ ސަބަބުން މުބާރާތުގައި ނުކުޅެވޭ ކުޅުންތެރިއަކު، ކްލަބްގެ މެޑިކަލް ޓީމުން ރުހޭނަމަ ގައުމީ ޓީމާ އެކު މަޑުކުރުމުގައި ހުރަހެއް ނެތެވެ.
ބްރެޒިލަކީ މި ފަހަރުގެ ވޯލްޑް ކަޕްގައި އަނިޔާގެ މައްސަލަ އެންމެ ބޮޑަށް ކުރިމަތިވެފައިވާ ޓީމެވެ. ގްރޫޕް ސްޓޭޖުގެ ފުރަތަމަ މެޗުގައި ނޭމާގެ ކުޑަހުޅަށް ލިބުނު އަނިޔާއާ ހެދި ގްރޫޕްގެ ފަހު ދެ މެޗުގައި އޭނާ ނުކުޅެ އެވެ. އޭގެ އިތުރުން ވާތު ބެކް އަލެކްސް ސަންޑްރޯގެ އުނަގަނޑަށް އަނިޔާވެފައިވާއިރު، ކަނާތު ބެކް ޑަނީލޯގެ ވެސް ކުޑަހުޅަށް ވަނީ އަނިޔާވެފަ އެވެ.
މި ފަހަރުގެ ވޯލްޑް ކަޕްގެ ދެ ވަނަ ބުރުގައި ބްރެޒިލް ކުޅޭ މެޗުގައި ހޯމަ ދުވަހު ކުޅޭނީ ދެކުނު ކޮރެއާއާ ދެކޮޅަށެވެ.
