އިންޑޮނީޝިއާގެ ޖާވާ ރަށަށް ހޮނިހިރު ދުވަހު އައި ބާރުގަދަ ބިންހެލުމެއްގައި އެކަކަށް އަނިޔާވެއްޖެ އެވެ.
ބިންހެލުން އައީ 5.7 މެގްނިޓިއުޑްގެ ބާރު މިނުގައި 112 ކިލޯމީޓަރު އަޑިންނެވެ. ބިންހެލުމުގެ އެޕިސެންޓަރަކީ ބަންޖާރް ސިޓީއާ 18 ކިލޯމީޓަރު އިރުދެކުނެވެ.
ބިންހެލުމުގެ އަސަރު އެންމެ ބޮޑަށް ކުރި ކިއާންޖޫރްއަށް މިދިޔަ ނޮވެމްބަރު މަހު ވެސް ބާރުގަދަ ބިންހެލުމެއް އައިސް، 330 މީހުން މަރުވި އެވެ.
ހޮނިހިރު ދުވަހުގެ ބިންހެލުމުގެ އަސަރު ވެރިރަށް ޖަކާޓާއަށް ވެސް ކުރި އެވެ. އެކަކަށް އަނިޔާވި އިރު، އިމާރާތްތަކަށް ބައެއް ކުދި ގެއްލުން ލިބުނެވެ.
އެޕިސެންޓަރާ ކައިރިއަށް ހިސާބުތަކަށް އިތުރު ލޮޅުންތައް އަންނާނެ ކަމަށް ލަފާކުރި ނަމަވެސް، ސުނާމީއެއްގެ ނުރައްކާ ނެތް ކަމަށް އިދާރާތަކުން ބުންޏެވެ.
މިދިޔަ މަހު އިންޑޮނީޝިއާގެ ޖާވާ ރަށަށް އައި ބިންހެލުމުގައި މަރުވި ގިނަ މީހުންގެ ތެރޭގައި ހިމެނެނީ ކުޑަކުދިންނެވެ. އެ ފަހަރު 330 މީހުން މަރުވި އިރު، ހާހަކަށް ވުރެ ގިނަ މީހުންނަށް އަނިޔާވި އެވެ.
އިންޑޮނީޝިއާއަކީ ވަރަށް ގިނައިން ބިންހެލުން ކުރިމަތިވާ ގައުމެކެވެ. އެ ގައުމު އޮންނަނީ ބިންހެލުންތައް އާއްމުކޮށް އަންނަ ޕެސިފިކް ކަނޑުގެ "ރިންގް އޮފް ފަޔާ" ގަ އެވެ.
