ދޯހާ، ގަތަރު (ޑިސެމްބަރު 2) - ފީފާ ވޯލްޑް ކަޕްގައި ޖެހިޖެހިގެން ދެ މުބާރާތުގެ ގްރޫޕް ސްޓޭޖުން ޖަރުމަނު ކެޓުމާ އެކު އެ ޓީމަށް އެންމެ ގިނަ ދުވަސް ވަންދެން ކުުޅުނު އެއް ކުޅުންތެރިޔާ، ތޯމަސް މުލާ ގައުމީ ޓީމުން ދެން ނުފެނިދާނެ ކަމުގެ އިޝާރާތެއް ދީފި އެވެ.
ރަޝިއާގައި 2018 ވަނަ އަހަރު ބޭއްވި ވޯލްޑް ކަޕްގެ ގްރޫޕް ސްޓޭޖުން ޖަރުމަނު ކެޓީ އެންމެ ފަހުގެ ޗެމްޕިއަނުންގެ ހައިސިއްޔަތުން ވާދަކުރިއިރު އެވެ. އޭގެ ފަހުން ޖަރުމަނު ޓީމަށް ގިނަ ބަަދަލުތަކެއް ގެނެސްގެން، މި ފަހަރުގެ ވޯލްޑް ކަޕަށް ނުކުތް ނަމަވެސް ގްރޫޕް ސްޓޭޖު ފަހަަނައަޅައި ދެވޭ ގޮތެއްނުވި އެވެ. ޖެހިޖެހިގެން ދެ ވޯލްޑް ކަޕްގެ ގްރޫޕް ސްޓޭޖުން ކަޓައި، ޖަރުމަނަށް ލަދުވެތި ރެކޯޑަކާ ކުރިމަތިލާން ޖެހުނީ އެވެ.
ޖަރުމަނު ރޭ ކޮސްޓަ ރިކާ އަތުން 4-2 އިން މޮޅުވި މެޗަށް ފަހު މުލާ، 33، ބުނީ ޖަރުމަނު ޓީމުން "ދެން ނުފެނުމުގެ" ފުރުސަތު އެބައޮތް ކަމަށެވެ.
"މިއީ ގައުމީ ޓީމަށް އަހަރެންގެ ފަހު މެޗުނަމަ، މި މެޗުގެ ހަނދާންތައް ވެސް ކުރާނީ ވަރަށް އުފަލާ އެކު، އަހަރެމެން އެކުގައި ވަރަށް އާދަޔާހިލާފު ހަނދާންތަކެއް ވެސް ހުންނާނެ. ކޮންމެ ފަހަރަކު ވެސް އަހަންނަށް ކުރެވުނު ހުރިހާ ކަމެއް ޓީމަށްޓަކައި ކޮށްފައިވާނެ. ޓީމަށް ޓަކައި އަހަރެން އަބަދުވެސް ހުންނާނެ،" ރޭގެ މެޗަށް ފަހު ޖަރުމަނު މީޑިއާ އަކަށް ދިން އިންޓަވިއުއެއްގައި މުލާ ބުންޏެވެ.
ޖަރުމަނުގެ ގިނަ ނޫސްތަކުން ރިޕޯޓްކޮށްފައިވާ ގޮތުގައި މުލާ ދެން ޖަރުމަނު ޓީމުން ނުފެންނާނެ އެވެ.
މިއީ ޖަރުމަނު ގައުމީ ޓީމަށް ރަސްމީ 122 މެޗުން 44 ގޯލު ޖެހި، މުލާ ޖަރުމަނާ އެކު ކުޅުނު ހަތަރު ވަނަ ވޯލްޑް ކަޕް އެވެ.
ބަޔާން މިއުނިކަށް ކުޅޭ މުލާ އެންމެ ފުރަތަމަ ޖަރުމަނާ އެކު ކުޅުނީ ކުޅުނީ 2010 ވަނަ އަހަރު ދެކުނު އެފްރިކާގައި ބޭއްވި ވޯލްޑް ކަޕްގަ އެވެ. އޭގެ ފަހުން، ބްރެޒިލްގައި 2014 ވަނަ އަހަރު ބޭއްވި ވޯލްޑް ކަޕްގެ ތަށި ހޯދި ޓީމުގައި މުލާ މުހިންމު ދައުރެއް އަދާކުރި އެވެ. އޭގެ ފަހުން ރަޝިއާގައި 2018 ވަނަ އަހަރު ބޭއްވި ވޯލްޑް ކަޕާއި މި ފަހަރު ގަތަރުގައި ބޭއްވި ވޯލްޑް ކަޕުން ޖަރުމަނަށް މުބާރާތް ނިމުނީ ގްރޫޕް ސްޓޭޖުންނެވެ.
