ސްރީލަންކާއަށް ދަތުރު ކުރާ ފަތުރުވެރިންގެ އަދަދު އިތުރު ކުރުމަށްޓަކައި ރިސޯޓުތަކުން ކަރަންޓު ކެނޑޭ މައްސަލަ ހައްލުކޮށްފި އެވެ.
އިގްތިސާދީ ކާރިސާއެއް ކުރިމަތިވެފައިވާ ސްރީލަންކާއިން ޑޮލަރު ހުސްވެ ޒަރޫރީ ތަކެތި އިމްޕޯޓް ކުރުން ހުއްޓުނެވެ. އެހެންވެ، ކަރަންޓު އުފައްދާނެ ތެޔޮ ލިބުން ވަނީ ދަތިވެފަ އެވެ.
ހާލަތު އެބްމެ ގޯސްވި އިރު ދުވާލަކު 13 ގަޑިއިރަށް ކަރަންޓު ކަނޑަމުން ދިޔަ އެވެ. މިހާރު ވެސް ކޮންމެ ރެޔަކު 2-3 ގަޑިއިރު ލަންކާގެ އެކި ހިސާބުތަކުން ކަރަންޓު ކަނޑަން ޖެހެ އެވެ.
އެހެން ނަމަވެސް، ހަލަބޮލިކަން ވަރަށް ބޮޑަށް މައިތިރިވެ ސަރުކާރުގެ އުއްމީދަކީ ފަތުރުވެރިންގެ އަދަދު އިތުރުކޮށް ޑޮލަރު ހޯދޭނެ ގޮތްތައް ފަހިކުރުމެވެ.
"މިއީ ރަނގަޅު ފިނި މޫސުމެއް. ހާލަތު ރަނގަޅުވެއްޖެ. ފަތުރުވެރިންނަށް ލަންކާ ރައްކާތެރިވާނެ،" ޓޫރިޒަމް މިނިސްޓަރު ހަރިން ފެނަންޑޯ ވިދާޅުވި އެވެ.
އެނާޖީ މިނިސްޓަަރު ވިދާޅުވީ ކަނޑައަޅާ ވަކި ފަތުރުވެރި ސަރަހައްދުތަކުން ކުރިއަށް އޮތް ތަނުގައި ކަރަންޓު ނުކަނޑާނެ ކަމަށެވެ. ކަނޑައެޅި ސަރަހައްދުތަކުގެ ތެރޭގައި ހިމެނެނީ ދެކުނު ގޮނޑުދޮށްތަކާއި، އެލާ ވަށައިގެންވާ ފަރުބަދަމަތީ ހިސާބުތަކެވެ.
އިގްތިސާދީ ކާރިސާ އާއި އެތެރޭގެ ހަލަބޮލިކަމަށް ފަހު ފަތުރުވެރިކަން ވަނީ ރަނގަޅު ވާން ފަށައިފަ އެވެ. މި އަހަރުގެ ފުރަތަމަަ 10 މަހު 570،000 ފަތުރުވެރިން ލަންކާއަށް ދިޔަ އެވެ. އެއީ 2021 ވަނަ އަހަރާ އަޅާ ބަލާއިރު 200،000 އިތުރު އަދަދެކެވެ.
