ސައޮ ޕައޮލޯ، ބްރެޒިލް (ޑިސެމްބަރު 1) - ދުނިޔޭގައި އުފެދުނު އެންމެ މޮޅު ކުޅުންތެރިންގެ ތެރޭގައި ހިމެނޭ އެޑްސަން އަރަންޓޭސް ޑޮ ނެސިމެންޓޯ (ޕެލޭ)ގެ ބަލި ހާލު ބޮޑުވެ، ކުއްލި ގޮތަކަށް ހޮސްޕިޓަލްގައި އެޑްމިޓްކޮށްފި އެވެ.
ޕެލޭ، 82، ގެ ބަލި ހާލަތު ގޯސްވެފައިވަނީ މިދިޔަ އަހަރު އޭނާގެ ގޮހޮރުގައި އުފެދުނު ޓިއުމަރެއް ނެގި ފަހުންނެވެ. އޭގެ ފަހުން، އާންމުކޮށް، އޭނާ ޑޮކްޓަރަށް ދައްކަމުން އަންނައިރު، ކެންސަރު ބަލީގެ އިތުރުން ހިތުގެ ބައްޔަށް ޕެލޭ އަންނަނީ ފަރުވާ ހޯދަމުންނެވެ.
ބްރެޒިލްގެ ސައޮ ޕައޮލޯގެ އަލްބާޓް އެއިންސްޓައިން ހޮސްޕިޓަލުގައި ޕެލޭ އެޑްމިޓްކުރީ އޭނާގެ ހަށިގަނޑު ކުއްލިއަކަށް ދުޅަވާން ފެށުމުން ކަމަށް ބްރެޒިލްގެ މީޑިއާތަކުން ރިޕޯޓްކޮށްފައިވެ އެވެ. އޭނާ ހޮސްޕިޓަލަށް ގެނައުމާ އެކު ވަގުތުން އެމަޖެންސީގައި އަވަސް ފަރުވާ ދީފައިވެ އެވެ.
މީޑިއާ ރިޕޯޓްތައް ބުނާ ގޮތުން ޕެލޭގެ ހަށިގަނޑުގެ ދުޅަވާން ފެށުމާ އެކު އޭނާގެ ހިތުގެ ވިންދު އަވަސްވެ ސްޓްރޯކެއް ޖެހުމުގެ ބިރު ބޮޑުވުމުން އޭނާ އެމަޖެންސީގައި ހޮސްޕިޓަލަށް ގެންދިޔައީ އެވެ.
ޕެލޭގެ ހާލަތު ދެނެ ގަތުމަށް އިތުރު ޓެސްޓްތަކެއް ހަދަމުން އަންނައިރު އޭނާގެ ސަޕޯޓަރުންނާއި ދުނިޔޭގެ ފުޓްބޯޅައިގެ ނަން މަޝްހޫރު އެތައް ބަޔަކު އަންނަނީ ހެޔޮ ދުއާގެ މެސެޖުތައް ފޮނުވަމުންނެވެ.
ޕެލޭގެ ހާލަތާ ގުޅޭ ގޮތުން ޕެލޭގެ އަންހެން ދަރިފުޅު ކެލީ ނެސެމެންޓޯ ވަނީ ސޯޝަލް މީޑިއާގައި ޕޯސްޓެއް ކޮށްފަ އެވެ.
ކެލީ ބުނީ އޭނާގެ ބައްޕަގެ ހާލަތު މިހާރު ހަމައަކަށް އެޅިފައިވާ ކަމަށާއި، އެންމެން ވެސް ހެޔޮދުއާ ކޮށްދިނުމަށެވެ. އަދި ކުރިއަށް ހުރި ދުވަސްތަކުގައި ޓެސްޓްތަކުގެ ނަތީޖާތައް ލިބުމުން ޕެލޭގެ ހާލަތުގެ އެންމެ ފަހުގެ މައުލޫމާތުތައް ފުޓްބޯޅަ ދުނިޔެ އަށް ހިއްސާކުރާނެ ކަމަށް ކެލީ ވަނީ ބުނެފަ އެވެ.
ބްރެޒިލްގެ ގައުމީ ޓީމަށް އެންމެ ގިނަ ގޯލު ޖަހާފައިވާ ޕެލޭ އަކީ ދުނިޔޭގެ ފުޓްބޯޅައިގެ އެންމެ ވަރުގަދަ އެއް ލެޖެންޑެވެ. ޕެލޭ އަކީ ފީފާ ވޯލްޑްކަޕް ތިން ފަހަރު ހޯދި ހަމައެކަނި ކުޅުންތެރިޔާ އެވެ. ޕެލޭ ވަނީ ބްރެޒިލްގެ ގައުމީ ޓީމަށް ކުޅުނު 92 މެޗުގައި 77 ގޯލު ޖަހައިފަ އެވެ.
