ސިލޯން އިލެކްޓްރިސިޓީ ބޯޑް (ސީއީބީ) އަށް ލިބެމުންދާ ގެއްލުންތައް ކަވަރު ކުރުމަށް 2023 ވަނަ އަހަރު ދެ މަަރުހަލާއަކަށް ބަހާލައިގެން ކަރަަންޓުގެ އަގު ބޮޑުކުރަން ނިންމައިފި އެވެ.
ލަންކާގެ ކެބިނެޓުން ނިންނީ ޖެނުއަރީ އަދި ޖޫން މަހު ކަރަންޓުގެ ޓެރިފް މަތި ކުރުމަށެވެ. ޕާލިމެންޓުން ނެރުނު ބަޔާނުގައި ބުނީ ކަރަންޓުގެ ޓެރިފް 70 ޕަސެންޓުން މަތި ކުރަން ސީއީބީއިން ލަފާދިން ކަމަށެވެ.
ސީއީބީއިން ބޮޑު ގެއްލުމަކާ އެކު ކަރަންޓުގެ ހިދުމަތް ފޯރުކޮށްދެމުންދާ އިރު، އެ ކުންފުނި އޮތީ ބޭންކްތަކާއި ކަރަންޓު ސަޕްލައިކޮށްދޭ ފަރާތްތަކަށް 650 ބިލިއަން ރުޕީޒްއިން ދަރައިފަ އެވެ.
އެ ކުންފުނީގެ އޮފިޝަލަކު ބުނީ 35 ބިލިއަން ރުޕީޒް ދައްކަން ޖެހެނީ އިއާދަކުރަނިވި ހަކަތަ ސަޕްލައި ކުރި ފަރާތްތަކަށް ކަމަށާއި 75 ބިލިއަން ޑޮލަރު ދައްކަން ޖެހެނީ ތާމަލް ހަކަތަ ސަލްޕައި ކުރި ފަރާތްތަކަށް ކަމަށެވެ.
ކަރަންޓުގެ ޓެރިފް މަތި ކުރަން ކެބިނެޓުން ފާސްކުރި ނަމަވެސް ޕަބްލިކް ޔުޓިލިޓީޒް ކޮމިޝަން އޮފް ސްރީލަންކާ (ޕީޔޫސީއެސްއެލް) އިން ބުނީ ނިންމުން އަދި ފައިނަލް ނުވާ ކަމަށެވެ.
ޕީޔޫސީއެސްއެލްއަކީ ލަންކާގެ ކަރަންޓާއި ފެނާއި ތެޔޮ ފަދަ އާއްމު ހިދުމަތްތައް ފޯރުކޮށްދިނުމާ ގުޅޭ ސިޔާސަތާއި ގަވާއިދު އެކުލަވާލާ ސަރުކާރުގެ އިދާރާ އެވެ.
