މޯބައިލް ފޯނުގެ ހިދުމަތް ހޯދުމަށް ބޭނުންކުރާ ސިމް ކާޑު ދޫކުރުމުގެ އުސޫލަށް ހަރުކަށި ބަދަލެއް ގެނެސްފި އެވެ.
މި އުސޫލަށް ގެނެވުނު ބަދަލުތައް ކޮމިއުނިކޭޝަން އޮތޯރިޓީ އޮފް މޯލްޑިވްސް (ސީއޭއެމް) އިން ވަނީ މިއަދު އިއުލާންކޮށްފަ އެވެ. ސީއޭއެމް އިން ބުނީ މިއީ މުއާސަލާތީ ވަސީލަތްތައް ބޭނުންކޮށްގެން ކުރާ ނޭދެވޭ އަމަލުތައް ގިނަވަމުންދާތީ އެކަން މަދުކުރުމަށް އެޅުނު ފިޔަވަޅެއް ކަމަށެވެ.
އެގޮތުން ދެން ސިމްކާޑު ކަސްޓަމަރުންނަށް ދޫކުރުމުގެ ކުރިން ހުންނާނީ ބޭނުންނުކުރެވޭ ހާލަތު (ނޮން އެކްޓީވޭޓަޑް ސްޓޭޓަސް) ގަ އެވެ. ސިމްކާޑު އެކްޓިވޭޓް ވާނީ، ސިމްކާޑު ދޫކުރާ ކަސްޓަމަރުގެ ފުރިހަމަ މައުލޫމާތު ހިދުމަތްދޭ ފަރާތަށް ލިބުމުން ކަމަށްވެސް ސީއޭއެމްގެ އިއުލާނުގައި ބުނެފައިވެ އެވެ.
ގެނެވުނު އިސްލާހާއެކު އާ އުސޫލަށް މާދަމާއިން ފެށިގެން އަމަލުކުރަން ފަށާނެ އެވެ.
ފަހަކަށް އައިސް މޯބައިލް ފޯނު ބޭނުންކޮށްގެން މީހުންނަށް އޮޅުވާލައިގެން ފައިސާ ހޯދުން ފަދަ ކަންކަން އިތުރުވެފައިވާއިރު މިކަމުގެ އެންމެ ބޮޑު އެއް ސަބަބަކީ ފަސޭހައިން ސިމް ކާޑު ދޫކުރުން ކަމަށް ގިނަ އިދާރާތަކުން ވެސް ބުނެ އެވެ.
އެގޮތުން މި މަހު ނޫސްވެރިންނަށް މައުލޫމާތު ދެއްވަމުން ކޮމިޝަނާ އޮފް ޕޮލިސް މުހައްމަދު ހަމީދު ވަނީ މިފަދަ މައްސަލަތަކުގައި ފުލުހުން ބެލި ބެލުމުގައި އެއް ފަރާތަކަށް 500 ސިމް ކާޑު ދޫކޮށްފައި ހުރިކަންވެސް ފާހަގަވެފައިވާ ކަމަށް ވިދާޅުވި އެވެ.
