ރަޝިއާ އާއި ޗައިނާ ގުޅިގެން އޭޝިއާ ޕެސިފިކް ސަރަހައްދުގައި ވައިގެ އަސްކަރީ ތަމްރީންތަކެއް ބާއްވައިފި އެވެ.
ރަޝިއާގެ ޑިފެންސް މިނިސްޓްރީން ނެރުނު ބަޔާނެއްގައި ބުނީ ދެ ގައުމުގެ ވައިގެ ސިފަައިން ގުޅިގެން "އަނެއްކާވެސް އޭޝިއާ ޕެސިފިކް ވައިގެ ސަރަހައްދު ޕެޓްރޯލްކޮށްފައިވާ" ކަމަށެވެ.
ބަޔާނުގައި ބުނީ ތަމްރީންގައި ބޭނުންކުރީ ރަަޝިއާގެ ސްޓްރެޓެޖިކް މިސައިލް އުފުލާ ޓީޔޫ-95 އާއި ޗައިނާގެ ޝިއާން އެޗް-6 އުޅަނދުތައް ކަމަށެވެ.
އެ ވައިގެ އުޅަނދުތައް އަށް ގަޑިއިރު ވަންދެން ޕެޓްރޯލް ކުރީ ޖަޕާން ކަނޑާއި އިރުމަތީ ޗައިނާ ކަނޑުގެ ވައިގެ ސަރަހައްދެވެ.
ޔޫކްރެއިން ހަނގުރާމަ ފެށި ފަހުން ރަޝިއާ އާއި ޗައިނާގެ ގުޅުން ވަރުގަދަ ކުރުމަށް ރަޝިއާގެ ރައީސް ލެޑިމިއަ ޕުޓިން ގެންދަވަނީ މަސައްކަތް ކުރައްވަމުންނެވެ.
މީގެ ކުރިން ވެސް ދެ ގައުމު ގުޅިގެން ވައިގެ ތަމްރީންތައް ބޭއްވި އެވެ. ނަމަވެސް މި ފަހަރުގެ ތަމްރީންގައި ރަޝިއާގެ އުޅަނދު ޗައިނާއަށް ތިރިކޮށް، ޗައިނާގެ އުޅަނދު ރަޝިއާ ބިމުގެ ސަރަހައްދަށް ފުރަތަމަ ފަހަރަށް ތިރިކުރި އެވެ.
ޗައިނާ އާއި ރަޝިއާގެ އިތުރުން އެމެރިކާއިން ވެސް އޭޝިއާ ޕެސިފިކް ސަރަހައްދަކީ މުހިއްމު ސަރަހައްދެއްގެ ގޮތުގައި ދެކެ އެވެ.
