ދިވެހިރާއްޖޭގެ ހައިކޯޓުގެ ފަނޑިޔާރު ކަމުގެ މަގާމަށް ފަސް ބޭފުޅަކު ކުރިމަތިލައްވައިފި އެވެ.
ޖުޑީޝަލް ސާވިސް ކޮމިޝަނުން (ޖޭއެސްސީ) މިއަދު ވަނީ ކުރިމަތިލެއްވި ފަސް ބޭފުޅުންގެ މައުލޫމާތު އާންމުކޮށްފަ އެވެ. ހައި ކޯޓުގެ ފަނޑިޔާރުކަމަށް ކުރިމަތި ލުމުގެ ފުރުސަތު ޖޭއެސްސީ އިން ހުޅުވާލީ މި މަހުގެ 17 ވަނަ ދުވަހު އެވެ. ކުރިމަތި ލުމުގެ ފުރުސަތު ހަމަވީ މިއަދުގެ 12:00 އަށެވެ.
ކުރިމަތިލެއްވި ފަސް ބޭފުޅުން:
1. ޒީނަތު އަލީ / ދަފްތަރު. ނަންބަރު 2616 މާލެ
2. މުހައްމަދު ޝަނީޒް އަބްދުﷲ / ހަނދުވަރީނާޒް، ގދ.ގައްދޫ
3. މަރްޔަމް ވަހީދު / ބެލޫން، ސ.ފޭދޫ
4. ރުޝްދުﷲ އިބްރާހީމް / ޖަވާހިރުމާގެ، ބ.މާޅޮސް
5. ފައްޔާޟު ޝާތިރު / ހަސަންކާރިގެ، ސ.މީދޫ
ޖޭއެސްސީއިން 17 ވަނަ ދުވަހު ކުރި އިއުލާނުގައި ބުނެފައިވަނީ ހައިކޯޓުގެ ފަނޑިޔާރުކަމަށް ބޭފުޅަކު ހޮވާނީ އެކަމަށް ކަނޑައެޅިފައިވާ ގަވާއިދުގައިވާ ގޮތުގެ މަތިން ކަމަށެވެ.
ހައިކޯޓު ފަނޑިޔާރުންގެ މުސާރައިގެ ގޮތުގައި މަހަކު 54300ރ. ލިބޭނެ އެވެ. އޭގެ އިތުރުން ރައްޔިތުންގެ މަޖިލީހުން ކަނޑައަޅާފައިވާ ގޮތުގެމަތިން މެޑިކަލް އެލަވަންސާއި ފޯނު އެލަވަންސް ވެސް ލިބޭނެ އެވެ.
ހައިކޯޓުގެ ފަނޑިޔާރުކަމުގެ މަގާމަށް ބޭފުޅަކު ހޮވުމަށް އިއުލާން ކުރީ އެ މަގާމުގައި ހުންނެވި ހާތިފް ހިލްމީ ފަނޑިޔާރު ކަމުން ރިޓަޔާ ކުރެއްވުމުންނެވެ.
ހާތިފް އެ މަގާމުން ރިޓަޔާކުރެއްވީ ދެ އަހަރު ދުވަހު އެ މަގާމު ފުރުއްވުމަށްފަހު އެވެ. އޭނާ ވަނީ 2019 ވަނަ އަހަރުން ފެށިގެން ހައިކޯޓުގެ ފަނޑިޔާރުކަން ކުރައްވާފަ އެވެ.
