މުމްބާއި، އިންޑިއާ (ނޮވެމްބަރު 29) - އެއާ އިންޑިއާގެ 25 ޕަސެންޓު ހިއްސާ ސިންގަޕޯ އެއާލައިންސްގެ ދަށަށް ގެންދަން ނިންމައިފި އެވެ.
އެއާ އިންޑިއާ އުފެއްދީ ޓާޓާ ގްރޫޕުންނެވެ. މިދިޔަ ޖެނުއަރީ މަހު އަލުން ޓާޓާއިން އެއާ އިންޑިއާއާ ހަވާލުވި އެވެ. ޓާޓާ އާއި ސިންގަޕޯ އެއާލައިންސުން މިހާރު ވެސް އެކުގައި މަސައްކަތް ކުރެ އެވެ.
އެގޮތުން ވިސްޓާރާ ނިސްބަތް ވަނީ ޓާޓާ އަދި ސިންގަޕޯ އެއާލައިންސް އަށެވެ. އިންޑިއާގެ އެތެރޭގެ އުދުހުންތަކުގެ 10 ޕަސެންޓު ހިއްސާ ކުރާ ވިސްޓާރާގެ 51 ޕަސެންޓު ހިއްސާ އޮންނަނީ ޓާޓާ އަށެވެ. އަދި ބާކީ 49 ޕަސެންޓް ހިއްސާ އޮންނަނީ ސިންގަޕޯ އެއާލައިނަށެވެ.
ޓާޓާ އާއި ސިންގަޕޯ އެއާލައިންސްއިން ބުނީ މާޗް 2024 ގެ ކުރިން ވިސްޓާރާ އާއި އެއާ އިންޑިއާ އެއް އެއާލައިނެއްގެ ގޮތުގައި ހިންގަން އެއްބަސްވެފައިވާ ކަމަށެވެ.
ސިންގަޕޯ އެއާލައިންސްއަށް 25.1 ޕަސެންޓް ހިއްސާ ދެނީ 250 މިލިއަން ޑޮލަރުގެ އިކުއިޓީ ދިނުމުންނެވެ. ޓާޓާއިން ބުނީ އަމާޒަކީ އެއާ އިންޑިއާ ދުނިޔޭގެ ފެންވަަރުގެ އެއާލައިނަކަށް ހެދުން ކަމަށެވެ.
އެއާ އިންޑިއާ އާއި ވިސްޓާރާ އެއްކޮށްލުމުން 218 ވައިގެ އުޅަނދު އޮންނާނެ އެވެ. އޭރުން އެ އެއާލައިން ވެގެން ދާނީ އިންޑިގޯއަށް ފަހު އިންޑިއާގެ ދެ ވަނައަށް އެންމެ ބޮޑު ޑޮމެސްޓިކް އެއާލައިނަށެވެ.
މިހާރު ވެސް އިންޑިއާގެ އެންމެ ބޮޑު އިންޓަނޭޝަނަލް އެއާލައިނަކީ އެއާ އިންޑިއާ އެވެ. އެހެން ނަމަވެސް އެތެރޭގެ އުދުހުންތަކުގައި އެ އެއާލައިން ހިއްސާ ކުރަނީ އެންމެ 8.6 ޕަސެންޓެވެ.
އިންޑިއާ ސަރުކާރުގެ ދަށަށް އެއާ އިންޑިއާ ގެންދިޔަތާ 69 އަހަރު ފަހުން، އެ އެއާލައިން ވުޖޫދަށް ގެނައި ޓާޓާއިން އަލުން އެއާލައިން ގަތީ މިދިޔަ ޖެނުއަރީ މަހު 2.4 ބިލިއަން ޑޮލަރަށެވެ.
އެއާ އިންޑިއާގެ ދަރަނީގެ ގޮތުގައި އޮތް 615 ބިލިއަން ރުޕީޒްގެ ތިންބައި ކޮށްފައި އެއްބައި ސަރުކާރުން ވަނީ މައާފުކޮށްދީފަ އެވެ. އޭގެ ފަހުން ޓާޓާއިން ވަނީ އެއާލައިނަށް ބަދަލުތަކެއް ގެނެސްފަ އެވެ.
އެގޮތުން އެއާ އިންޑިއާގެ އާ ޗީފް އެގްޒެކްޓިވްގެ މަގާމަށް ކޭމްޕްބެލް ވިލްސަން އައްޔަނުކުރި އެވެ. އެއީ އެހެން ގައުމަކަށް ނިސްބަތްވާ މީހަކު ކުންފުނި ހިންގުމާ ހަވާލުވި ފުރަތަމަ ފަހަރެވެ.
ވިލްސަންއަކީ ސިންގަޕޯ އެއާލައިންސްގެ ބަޖެޓް ސަބްސިޑަޔަރީ އެއާލައިން ސްކޫޓްގެ ކުރީގެ ވެރިޔާ އެވެ. އެއާ އިންޑިއާގެ އަމާޒަކީ ކުރިއަށް އޮތް ފަސް އަހަރުގެ ތެރޭގައި އެތެރޭގެ އުދުހުންތަކުހް 30 ޕަސެންޓް ޔަގީން ކުރުމެވެ.
