އަހަރަކު ދެ މިލިއަން ޓަނުގެ ގޭސް ޖަރުމަނަށް ފޮނުވަން ގަތަރުގެ ދައުލަތުގެ ތެލާއި ގޭހާ ބެހޭ ކުންފުނި ގަތަރްއެނާޖީއިން އެއްބަސްވެއްޖެ އެވެ.
ޖަރުމަނުން ކޮންމެ އަހަރަކު ވެސް 100 ބިލިއަން ކިޔުބިކް މީޓަރުގެ ގޭސް ހަކަތަ އުފައްދަން ބޭނުންކުރެ އެވެ. އޭގެ 50 ޕަސެންޓު ހޯދަމުން ގޮސްފައި ވަނީ ރަޝިއާއިންނެވެ.
ގަތަރްއެނާޖީއާ އެކު އެކުލަވާލި އެއްބަސްވުމުގެ ދަށުން ލިބޭ ގޭހުން 2.7 ބިލިއަން ކިޔުބިކް މީޓަރުގެ ގޭސް ކަށަވަރުވާނެ އެވެ.
"ގަތަރުގެ އަމާޒަކީ ޖަރުމަނާއި ޔޫރަޕްގައި ހަކަތައިގެ ރައްކާތެރިކަން ކަށަވަރު ކުރަން އަޅާ ފިޔަވަޅުތަކަށް އެއްބާރުލުން ދިނުން،" ގަތަރްއެނާޖީގެ ސީއީއޯ ސާދް ޝެރީދާ އަލް ކާބީ ވިދާޅުވި އެވެ.
"ޖަރުމަނަކީ ޔޫރަޕްގެ އެންމެ ބޮޑު ގޭސް މާކެޓް. އަޅުގަނޑުމެން މި ތިބީ ހަކަތައިގެ ރައްކާތެރިކަން ކަށަވަރު ކުރުމުގެ މަސައްކަތަށް އެއްބާރުލުން ދޭން."
ޖަރުމަނުގެ ހުޅަނގުގައި އޮންނަ ޝްލެސްވިގް-ހޮލްސްޓެއިން ސްޓޭޓުގެ ބްރުންސްބުޓެލް ގޭސް ޓާމިނަލާ ހަމައަށް ގޭސް ސަޕްލައި ކުރާނީ ގަތަރުގެ ރާސް ލައްފާނުންނެވެ.
ގަތަރުން ގޭސް ވިއްކާނީ އެމެރިކާގެ ކުންފުނި ކޮނޯކޯ ފިލިޕްސް އަށެވެ. ޖަރުމަނާ ހަމައަށް ގޭސް ފޯރުކޮށްދޭނީ އެ ކުންފުނިންނެވެ. ދެހާސް ސައްބީހުގައި ސަޕްލައި ފަށައި، 15 އަހަރު ވަންދެން ކުރިއަށް ގެންދާނެ އެވެ.
ގަތަރުގެ ގޭހުގެ އެންމެ ބޮޑު މާކެޓަކީ ޗައިނާ، ޖަޕާން އަދި ދެކުނު ކޮރެއާ އެވެ. މިދިޔަ ހަފުތާގައި ގަތަރުން ވަނީ ޗައިނާއަށް އަހަރަކު ހަތަރު މިލިއަން ޓަނުގެ ގޭސް ފޯރުކޮށްދޭން 27 އަހަރުގެ އެއްބަސްވުމެއްގައި ސޮއިކޮށްފަ އެވެ.
ޖަރުމަނާއި ގަތަރާ ދެމެދު އެއްބަސްވުމަކަށް ދިޔުން ލަސްވީ އެއްބަސްވުމުގައި ދިގު މުއްދަތެއް ހިމަނަން ޖަރުމަނުން ބޭނުން ނުވާތީ އެވެ.
ޖަރުމަނުގެ އިކޮނޮމީ މިނިސްޓަރު ރޮބަޓް ހޭބެކް ވިދާޅުވީ ދިގު ރާސްތާގައި ހާސިލްކުރަން ކަަނޑައެޅި މޫސުމީ ބަދަލާ ގުޅޭ ލަނޑުދަނޑިތަކާ މެދު ވިސްނުން އެ ގައުމަށް މުހިއްމު ކަމަށެވެ.
ޖަރުމަނާއި ހުޅަނގު ޔޫރަޕްގެ އެހެން ގައުމުތަކަށް ހަކަތައިގެ ދަތިކަން ކުރިމަތިވެފައި ވަނީ ޔޫކްރެއިން ހަނގުރާމައާ ގުޅިގެން ރަޝިއާއިން ސަޕްލައި ހުއްޓާލުމުންނެވެ.
މިދިޔަ އޯގަސްޓު މަހުން ފެށިގެން ރަޝިއާގެ ގޭށް ޖަރުމަނަށް ނުލިބެ އެވެ. ރަޝިއާގެ ސަޕްލައި ބޭނުންކުރުން ހުއްޓާލުމަށް ޖަރުމަނުން މިހާރު ދަނީ ފަސް ގޭސް ޓާމިނަލް އަޅަމުންނެވެ.
