ތައިލޭންޑްގެ މެދުތެރޭ ހިސާބެއްގައި ހިންގާ ފައްޅިއެއްގައި އުޅޭ ހުރިހާ ފާދިރީން މަސްތުވާތަކެއްޗަށް ޕޮޒިޓިވްވުމުން ފައްޅި ފަޅުވެއްޖެ އެވެ.
ފެޓްޗަބުން ޕްރޮވިންސްގެ ބުންގް ސަމް ފަން ޑިސްޓްރިކްޓުގައި ހުންނަ ފައްޅީގެ ހަތަރު ފާދިރީން ހޯމަ ދުވަހު ޕޮޒިޓިވްވީ މެތަމްފެޓަމައިން އަށެވެ.
އެ ޑިސްޓްރިކްޓުގެ އޮފިޝަލަކު އޭއެފްޕީ ނޫހަށް ބުނީ އެ މީހުން ފާދިރީންގެ ގޮތުގައި އުޅުން ހުއްޓުވައި، ރިހެބިލިޓޭޝަން ފަރުވާއަށް ކްލިނިކަކަށް ގެންގޮސްފައިވާ ކަމަށެވެ.
"މިހާރު ފައްޅި ހުރީ ފަޅުކޮށް. އެ އަވަށުގެ މީހުން ކަންބޮޑުވޭ ފައްޅިއަށް ގޮސް އަދާކުރަން ޖެހޭ އަޅުކަންތަކަށް ހުރަސް އެޅޭތީ،" އެ އޮފިޝަލް ބުންޏެވެ.
ބުދު ދީނުގައި އޮންނަ ގޮތުން ފައްޅީގައި ތިބޭ ފާދިރީންނަށް ކާބޯތަކެތި ހަދިޔާ ކުރުމަކީ އާއްމުކޮށް ކުރާ ކަމެކެވެ. އޮފިޝަލް ބުނީ ވަރަށް އަވަހަށް އެ ފައްޅިއަށް އާ ފާދިރީން ދާނެ ކަމަށެވެ.
ތައިލޭންޑަކީ މެތަމްފެޓަމައިން ޓްރެފިކް ކުރުމުގައި ޓްރާންސިޓް ބަނދަރެއްގެ ގޮތުގައި ޑްރަގް ޑީލަރުން ބޭނުންކުރާ ގައުމެކެވެ. އެއީ އަވައްޓެރި މިޔަންމާގެ ޝާން ސްޓޭޓުގައި އުފައްދާ މަސްތުވާތަކެއްޗެވެ. އެ ތަކެތި ލާއޯސް މެދުވެރިކޮށް ތައިލޭންޑަަށް ފޮނުވައި، އޭޝިއާ އާއި ޔޫރަޕްގެ އެހެން ގައުމުތަކަށް ވަގަށް އެތެރެ ކުރެ އެވެ.
ތައިލޭންޑުގައި މެތަމްފެޓަމައިން ގުޅައެއްގެ އަގު އުޅެނީ 0.50 ޑޮލަރަށެވެ. ފަހަކަށް އައިސް ދެކުނު އިރުމަތީ އޭޝިއާގެ ގައުމުތަކުން މެތަމްފެޓެމައިން އަތުލައިގަންނަ މިންވަރު ވަނީ ވަރަށް ބޮޑަށް އިތުރުވެފަ އެވެ.
