ޓްރާންސްޕޯޓު މިނިސްޓަރު އައިޝަތު ނަހުލާ އަދި އެ މިނިސްޓްރީގެ އެސިސްޓެންޓު ޑިރެކްޓާ ރުޝޫނާ ރަޝާދު ގެ މައްޗަށް ތުހުމަތު ކުރާ ކޮރަޕްޝަންގެ މައްސަލައެއް އެންޓި ކޮރަޕްޝަން ކޮމިޝަން (އޭސީސީ) އަށް ހުށަހަޅައިފި އެވެ.
އޭސީސީ އަށް ހުށަހަޅާފައިވާ މި މައްސަލައަކީ ނަހުލާ އަދި ރުޝޫނާ އެއްގަމު އުޅަނދު ރަޖިސްޓްރީ ކުރުމުގެ ގަވާއިދާ ހިލާފަށް ގިނަ އުޅަނދުތަކެއް ރަޖިސްޓާކޮށްދީ އެކަމުން އެ ދެ ފަރާތުން މާލީ ފައިދާ ހޯދަމުންދާ ކަމަށް ތުހުމަތުކޮށް ހުށަހެޅި މައްސަލައެކެވެ. އެގޮތުން ޖުމްލަ 57 އުޅަނދެއް ރަޖިސްޓްރީ ކުރުމުގައި ގަވާއިދާ ހިލާފުވެފައިވާ ކަމަށް އެ ފަރާތުން ވަނީ ތުހުމުތަކޮށްފަ އެވެ.
މައްސަލަ ހުށަހެޅި ފަރާތުން ބުނެފައިވާ ގޮތުން މި އުޅަނދުތައް ރަޖިސްޓްރީ ކޮށްފައިވަނީ އެއްގަމު އުޅަނދު ރަޖިސްޓްރީ ކުރުމުގެ ގަވާއިދުގެ ނާޖާއިޒް ފައިދާ ނަގައިގެންނެވެ. އެގޮތުން އުޅަނދުތައް ރަޖިސްޓްރީ ކުރުމަށް މަޖުބޫރުކުރާ އެއްގަމު އުޅަނދު އެތެރެކުރުމުގެ ހުއްދަ މި އުޅަނދުތައް ރަޖިސްޓްރީ ކުރުމުގައި ހުށަހަޅާފައިވާ ނުވާ ކަމަން ވަނީ ފާހަގަ ކޮށްފަ އެވެ.
މީގެ އިތުރުން މި އުޅަނދުތައް ރަޖިސްޓްރީ ކުރުމުގައި އުޅަނދުތައް ރަޖިސްޓްރީ ކުރުމަށް ހުށަހަޅަންޖެހޭ ސިޓީތައް މިނިސްޓްރީގައި އެންޓްރީ ހެދުމަކާއި ނުލާ އަދި ޖަވާބު ދިނުމަކާ ނުލާ ސިއްރިއްޔާތުގައި މި އުޅަނދުތައް ރަޖިސްޓްރީ ކުރުމުގެ ހިދުމަތް ދީފައިވަނީ ރުޝޫނާ ކަމަށް ވެސް އެ ފަރާތުން ވަނީ ތުހުމަތު ކޮށްފަ އެވެ. އަދި މިކަން ހިނގީ މިނިސްޓަރު ނަހުލާގެ ހުއްދަ ދީގެންކަން އެންގުމަށް ހިދުމަތާ އެކު ހުށަހަޅާ ފޯމުގައި ނަހުލާ ސޮއިކޮށްފައިވާ ކަމަށް ވެސް ވަނީ ބުނެފަ އެވެ.
ގަވާއިދާ ހިލާފަށް ރަޖިސްޓްރީ ކުރި އުޅަނދުތަކަކީ ރާއްޖޭގައި ފުޅާދާއިރާއެއްގައި އެއްގަމު އުޅަނދުގެ ވިޔަފާރި ކުރަމުންދާ ކުންފުންޏަކުން ދުރާލާ ރާވައިގެން އެތެރެކުރި އުޅަނދުތަކެއް ކަމަށާއި މިނިސްޓްރީއަށް ހުށަހެޅި ސިޓީ ތަކުގައި އެ ކުންފުނީގެ ތައްގަނޑު ޖަހާފައިހުރިކަން ވެސް މައްސަލަ ހުށަހެޅި ފަރާތުން ވަނީ ފާހަގަކޮށްފަ އެވެ.
ނަމަވެސް, މި މައްސަލާގައި ފިޔަވަޅުތައް އެޅުމަށް މިނިސްޓަރު ނަހުލާ މަސައްކަތް ކުރައްވަމުންދާ ކަމަށް އޭނާ ވަނީ ވިދާޅުވެފަ އެވެ. އެގޮތުން, އެ މައްސަލަ މިނިސްޓްރީ ތެރޭން ބަލަމުންދާއިރު ކޮރަޕްޝަނަށް އެއްވެސް ފުރުސަތެއް ނޯންނާނެ ކަމަށް ނަހުލާ ވިދާޅުވެފައިވެ އެވެ.
