ދޯހާ، ގަތަރު (ނޮވެމްބަރު 23) - ގަތަރުގައި މިހާރު ކުރިއަށްދާ ފީފާ ވޯލްޑް ކަޕްގެ ގްރޫޕް އެފްގައި މޮރޮކޯ އިން އެންމެ ފަހުގެ ރަނަރަޕް، ކްރޮއޭޝިއާ ހިފަހައްޓައިފި އެވެ.
ގަތަރުގެ އަލް ބައިތު ސްޓޭޑިއަމްގައި ކުޅުނު މެޗު 0-0ގެ ނަތީޖާ އަކުން އެއްވަރުވިއިރު، މިހާތަނަށް ވޯލްޑް ކަޕްގައި ކުޅުނު މެޗުތަކުގައި ފެނުނު ގޮތަށް މި މެޗުގައި އެންމެ ރަނގަޅު ކުޅުމެއް ދައްކައިދިނީ ދެ ޓީމުގެ ކީޕަރުންނެވެ. ގޯލާ އަމާޒުކޮށް ދެ ޓީމުންވެސް ފޮނުވާލި މަދު ހަމަލާތައް ހުށިޔާރުކަމާއިއެކު ދެ ޓީމުގެ ކީޕަރުންވެސް ދިފާއުކުރި އެވެ.
ހަމަހަމަ ކުޅުމެއް ފެނުނު މި މެޗުގައި ދެ ޓީމުން ވެސް ވަނީ ގޯލު ޖަހަން ރަނގަޅު ފުރުސަތު ތަކެއް ހޯދައިފަ އެވެ. ފުރަތަމަ ހާފަށް ބަލާއިރު އެންމެ ރަނގަޅު ފުރުސަތު ހޯދީ ކްރޮއޭޝިއާ އިންނެވެ. ހާފުގެ ފަހު ކޮޅު ކްރޮއޭޝިއާގެ އަރިމަތިން ބޯނާ ސޫސާ ނަގައިިދިން ހުރަހަކުން ނިކޮލާ ވްލާސިޗު ފޮނުވާލި ބޯޅަ މޮރޯކޯގެ ކީޕަރު ޔަސިން ބޯނޯ ދިފާއުކުރި އެވެ.
އޭގެ ފަހުން، ކްރޮއޭޝިއާގެ ކެޕްޓަން ލޫކާ މޮޑްރިޗު ފޮނުވާލި ހަމަލާ ދިޔައީ ހުރަސް ދަނޑިމަތިން ބޭރަށެވެ.
ފުރަތަމަ ހާފުގައި މޮރޮކޯއަށް ގޯލެއް ޖަހަން އެންމެ ރަނގަޅު ފުރުސަތެއް ލިބުނީ ފޯވާޑް ޔޫސުފް އަލް ނަސޭރީ އެވެ. އޭރިއާ ތެރެއިން ލިބުނު ބޯޅަ ކޮންޓްރޯލްކޮށްލާފައި ގޯލަށް އަމާޒުކޮށްލުމުން ހުރަސް އެޅީ ކްރޮއޭޝިއާގެ ޑިފެންޑަރު ޑޭޔާން ލޮވްރެން އެވެ.
ދެ ވަނަ ހާފު ފަށައިގެން ރަނގަޅު ފުރުސަތުތައް ހޯދީ މޮރޮކޯ އިންނެވެ. މިގޮތުން އޭރިއާ ތެރެއިން ހުރަސްވެގެން އައި ބޯޅައެއް މޮރޮކޯގެ ނުސައިރު މަޒޮރާއި ފޮނުވާލުމުން ކްރޮއޭޝިއާގެ ކީޕަރު ޑޮމިނިކް ލިވަކޮވިޗް ދިފާއުކުރި އެވެ. އޭގެ ފަހުން އަޝްރަފް ހަކީމީ ފޮނުވާލި ބޯޅަވެސް ދިފާއުކުރީ ލިވަކޮވިޗެވެ.
މެޗުގެ ދެވަނަ ހާފުގައި ކްރޮއޭޝިއާ އަށް ލިބުނު އެންމެ ރަނގަޅު ފުރުސަތު ތަނަވަސްކޮށްދިނީ ކެޕްޓަން މޮޑްރިޗެވެ. އަރިމަތިން ލިބުނު ހިލޭ ޖެހުމަކުން އޭރިއާ ތެރެއަށް ނަގައިދިން ބޯޅަ ހުރަސް ދަނޑިމަތިން ބޭރަށް ދިޔައީ ނަސޭރީގެ ފައިގައި ޖެހި އެވެ.
މި ގްރޫޕުގައި ކްރޮއޭޝިއާ ދެން ކުޅޭ މެޗުގައި ނުކުންނާނީ ކެނަޑާއާ ދެކޮޅަށެވެ. މޮރޮކޯ ނުކުންނާނީ ބެލްޖިއަމް އާ ދެކޮޅަށެވެ. މި ގްރޫޕްގެ ދެ ވަނަ މެޗުގައި މިރޭ 12 ޖަހާއިރު، ކެނަޑާ އާއި ބެލްޖިއަމް ކުޅޭނެ އެވެ.
