ދޯހާ (ނޮވެމްބަރު 23) - ފީފާ ވޯލްޑް ކަޕްގައި މިރޭ ކެނަޑާއާ ދެކޮޅަށް ބެލްޖިއަމް ނުކުުންނައިރު، ކެނަޑާ އަށް ދޭންޖެހޭ ފުރިހަމަ އިހުތިރާމް ދޭނެ ކަމަށް ބެލްޖިއަމްގެ ކޯޗު ރޮބާޓޯ މާޓިނޭޒް ބުނެ ފިއެވެ.
މި މުބާރާތަށް ބެލްޖިއަމް ކުރިމަތިލާއިރު، އެ ޓީމު ބެލެވިފައިވަނީ އެންމެ ވަރުގަދަ އެއް ޓީމުގެ ގޮތުގަ އެވެ. އެންމެ ފަހުން 2018 ވަނަ އަހަރު އޮތް ފީފާ ވޯލްޑް ކަޕްގެ ތިން ވަނަ ހޯދީ ބެލްޖިއަމް އެވެ.
އެކަމަކު، ކެނަޑާ އަކީ ވޯލްޑް ކަޕަށް މާ އާދަވެފައިވާ ގައުމެއް ނޫނެވެ. ކެނަޑާ އެންމެ ފަހުން ވޯލްޑް ކަޕެއްގައި ކުޅުނީ މީގެ 36 އަހަރު ކުރިން، 1986 ވަނަ އަހަރު އެވެ.
"ކެނަޑާ އިން ހާސިލްކުރި ކަންތައްތަކަށް އަހަރަމެން ވަރަށް ބޮޑަށް އިހުތިރާމް ކުރަން. ކޮލިފައިންގެ އެމެރިކާ އާއި މެކްސިކޯ ފަހަތަށް ޖައްސާލުމަށް ފަހު އެއް ވަނަ ހޯދުމަކީ އާދައިގެ ކަމެއް ނޫން،" މާޓީނޭޒް ބުންޏެވެ.
މާޓިނޭޒް ބުނީ މި މެޗަށް ދެ ޓީމު ނުކުންނައިރު، ޕްރެޝަރު އޮތީ ބެލްޖިއަމް އަށް ކަމަށެވެ. އަދި އެއީ ކެނެޑާއާ ދެކޮޅަށް ކުޅެން އުނދަގޫވާނެ އެއް ސަބަބު ކަމަށް ގަބޫލްކުރެވޭ ކަމަށެވެ.
"ކެނަޑާ އަށް މި މެޗުން ގެއްލޭނެ އެއްޗެއް ނެތް. އެހެންވީމަ، އެ މީހުން މި މެޗަށް ނުކުންނާނީ ޕްރެޝަރެއް ނެތި. މި ކަހަލަ ޓީމަކާ ދެކޮޅަށް ކުޅުމަކީ ނުރައްކާތެރިކަމެއް،" މާޓިނޭޒް ބުންޏެވެ.
ވޯލްޑް ކަޕްގައި ބެލްޖިއަމް ކުޅޭ ފުރަތަމަ ދެ މެޗުގައި އެ ޓީމުގެ މުހިންމު ފޯވަޑް ރޮމެލޫ ލުކާކޫ އަކަށް ނުކުޅޭވޭނެ އެވެ. އަދި އެ ޓީމުގެ ކެޕްޓަން އެޑިން ހަޒާޑަށް ވެސް ދިމާވި އަނިޔާ އާއި ފިޓްނަސްގެ މައްސަލަތަކާ ގުޅިގެން، ރެއާލް މެޑްރިޑުގައި އޭނާ އަށް ލިބުނީ މަދު ފުރުސަތުތަކެކެވެ.
ބެލްޖިއަމް އާއި ކެނަޑާ މިހާތަނަށް ބައްދަލުކޮށްފައިވަނީ 1998 ވަނަ އަހަރު އެކުވެރިކަމުގެ މެޗެއްގަ އެވެ. އެ މެޗުން ކެނަޑާ އަތުން ބެލްޖިއަމް ވަނީ 2-0 އިން މޮޅުވެފަ އެވެ. އެކަމަކު، އޭރު ކެނަޑާ ޓީމު އޮތް ލެވަލާއި ފުޓްބޯޅައިގެ ހާލަތު މިހާރު ތަފާތެވެ. ކެނަޑާ ދިގު އިންތިޒާރަކަށް ފަހު ވޯލްޑް ކަޕަށް ކޮލިފައިވުމަކީ ވެސް އޭގެ އެއް ސަބަބެވެ.
ކެނަޑާ ވޯލްޑް ކަޕަށް ގެންގޮސްދިން ކޯޗު، ޖޯން ހާޑްމަން އަކީ ތާރީހީ ރެކޯޑެއް އޮތް ކޯޗެކެވެ. ހާޑްމަން ވަނީ މީގެ ކުރިން ނިއު ޒީލެންޑާއި ކެނަޑާގެ އަންހެން ޓީމު ގޮވައިގެން ފީފާ ވިމެންސް ވޯލްޑް ކަޕްގައި ވާދަކޮށްފަ އެެވެ. މި ފަހަރު ކެނަޑާ ފިރިހެން ޓީމު ގޮވައިގެން ވޯލްޑް ކަޕްގައި ވާދަކުރާއިރު، ހާޑްމަން އަށް ކެނަޑާ ފުޓްބޯޅަ ތާރީހުގެ އިތުރުން ފީފާގެ މުބާރާތްތަކުގައި ވެސް ހާއްސަ ޖާގައެއް އޮންނާނެ އެވެ.
ކެނަޑާ އާއި ބެލްޖިއަމް ކުޅޭ މެޗު ފަށާނީ މިރޭ ރާއްޖެ ގަޑިން 00:00 ގަ އެވެ.
