ދޯހާ، ގަތަރު (ނޮވެމްބަރު 22) - މި ފަހަރުގެ ވޯލްޑް ކަޕް ފުޓްބޯޅަ މުބާރާތުގައި ޖަރުމަނު ގައުމީ ޓީމަށް ލިބޭ ބޯނަހުގެ ތެރެއިން އެއް މިލިއަން ޑޮލަރު، ނޭޕާލްގެ ކުޑަކުދިންނަށް ހަދިޔާކުރަން ނިންމާފައިވާ ކަމަށް ޖަރުމަނު ފުޓްބޯޅަ ފެޑެރޭޝަންގެ ރައީސް ބާޑް ނޮއެންޑޯފް ވިދާޅުވެއްޖެ އެވެ.
ގިނަ ދުވަސްތަކަކަށް ފަހު ޖަރުމަނުގެ މީޑިއާ ކުރިމަތީގައި އެ ގައުމުގެ ފުޓްބޯޅައިގެ ވާހަކަތަކާ ގުޅޭ ސުވާލުތަކަށް ޖަވާބު ދޭން ހުއްޓިވަޑައިގެން ހުންނަވައި، ނޮއެންޑޯފް ވިދާޅުވީ، މި ފަހަރުގެ ވޯލްޑް ކަޕަށް ޖަރުމަނުން ތައްޔާރުވި ހުރިހާ ގޮތަކާ މެދު ހިތްހަމަޖެހޭ ކަމަށެވެ.
ނޮއެންޑޯފް ވިދާޅުވީ މި ފަހަރުގެ ވޯލްޑް ކަޕްގައި އިންސާނީ ހައްގުތައް ކަށަވަރުކުރުމަށް ގިނަ ކަންކަން ކުރަން ޖެހޭ ކަމަށް ބުނެ، ގިނަ ގައުމުތަކުން ކެމްޕެއިންތަކެއް ކުރަމުން އަންނަ ކަމަށެވެ. އަދި މި ކަމުގައި ޖަރުމަނުން ބައިވެރިވާން ބޭނުންވަނީ "މިސާލެއް ދެއްކޭ" ގޮތަކަށް ކަމަށް ނޮއެންޑޯފް ފާހަގަކުރެއްވި އެވެ.
އެ ގޮތުން، ޖަރުމަނުގެ ކުޅުންތެރިންނާއި އޮފިޝަލުން ފެޑެރޭޝަނާ މަޝްވަރާ ކުރުމަށް ފަހު، މުޅި ޓީމަށް އެއްބަސްވެވުނީ ދުނިޔޭގެ ނިސްބަތުން ބެލިޔަސް ކުޑަކުދިންނަށް އެހީތެރިކަން ބޭނުންވެފައިވާ ގައުމަކަށް އެހީތެރިކަން ފޯރުކޮށްދޭށެވެ.
ނޮއެންޑޯފް ވިދާޅުވީ، ގިނަ ގައުމުތަކެއްގެ ތެރެއިން ނޭޕާލް އިހުތިޔާރުކުރީ އެ ގައުމުގެ ގިނަ މީހުން އެކި ގައުމުތަކަށް މަަސައްކަތްކުރަން ދަނީ ކުޑަ މުސާރައަކަށް ކަމަށާއި އޭގެ ސަބަބަކީ އެ މީހުންގެ ދަރިންނަށް ބޭނުންވާ ކަންކަން ފުރިހަމަކުރުމަށް ކަމަށްވާތީ އެވެ.
"މި ހުރިހާ ކަމަކަށް ބަލާފައި ޖަރުމަނު ޓީމުން ނިންމީ ނޭޕާލްގެ އެހީ އަށް ބޭނުންވާ ކުޑަކުދިންނަށް މި ފައިސާ ދޭން، މިއީ ކުޅުންތެރިންގެ ފައުންޑޭޝަނުން ނިންމި ނިންމުމެއް، މި ފައިސާ އަހަރެމެން ފޯރުކޮށްދޭނީ ފަސް އަހަރަށް ބަހާލައިގެން،" ނޮއެންޑޯފް ވިދާޅުވި އެވެ. "ބޭނުމަކީ ރަނގަޅު ދިރިއުޅުމެއް ހޯދަން ނޭޕާލުގައި ތިބި ކުޑަކުދިންނަށް އެހީވާން،"
ނޮއެންޑޯފް ވިދާޅުވީ ނޭޕާލަށް މި އެހީދެނީ ދެން އޮންނަ ޖީލުތަކުގެ ތެރެއިން ހަމަހަމަ ފުރުސަތުތަކެއް ލިބިގެން ބޮޑުވާ ޒުވާނުންގެ ނިސްބަތް އިތުރު ކުރުމަށެވެ.
ނޫސްވެރިންގެ ބައްދަލުވުމުގައި ނޮއެންޑޯފް ވަނީ ފީފާ އަށް ވެސް ނުސީދާކޮށް ބަހުގެ ހަމަލާއެއް ފޮނުވާލައިފަ އެެވެ.
ނޮއެންޑޯފް ފާހަގަކުރެއްވި ކަމަކީ ފީފާ އިން ޑެންމާކު ހުއްޓުވަން މަސައްކަތްކުރި ގޮތަށް އިރާންގައި ހިނގާ ކަންކަމަށް ރިއާޔަތްކޮށް ކަންކަން ނުކުރާތީ "ހަމަހަމަ" ކަމެއް ނުފެންނަ ކަމަށެވެ.
ޑެންމާކުން ވޯލްޑް ކަޕް ކިޓްގައި އިންސާނީ ހައްގުތައް ކަށަވަރުކުރަން ގޮވާލައި މެސެޖެއް ލިޔަން އުޅުނު ނަމަވެސް ފީފާއިން އެކަން ހުއްޓުވި އެވެ. އެކަމަކު، އިރާނުގައި އަންހެނުންގެ ހައްގުތައް ކަށަވަރުކޮށްދޭން ގޮވާލާ މުޒާހަރާތަކުގައި މަރުވާ މީހުން ވެސް އިތުރުވަމުން އަންނައިރު، ފީފާ އިން އެކަމަށް ދެނީ ބީރު ކަންފަތެއް ކަމަށް ނޮއެންޑޯފް ވިދާޅުވި އެވެ.
